Psalm Late 129 - Syin Chin Bible

Israel ii Ngalte Langpan Thungetna

¹ Israel te awng, na khangmoi lai pan ma kipan na ngalte in bangza in hong vawtsia zo ziam ko tungah hong son ta'n.

² “Khangmoi ka hi lai pan ma kipan ka ngalte in hong vawtsia zazaan hi, ahihang amate in hong zo zo ngawl hi.

³ Amate in ka nungzaang nasia takin hong liamsak a, lo kitho vuungsa khat bangin hong vawt hi.

⁴ Ahihang a thutang pa Topa in saltanna panin hong suatak zo hi.”

⁵ Zion a ensante theampo in lelna le nawkeakna thuak tahen.

⁶ Amate sia innkhum tungah a po, a khan ma a kocip lopate bang hi tahen;

⁷ tuate sia kuama in khawmtua ngawl a, a lom in zongh kipua ngawl hi.

⁸ Tuate kaantan in a pai a kuama po in, “Topa in thupha hong pia tahen! Topa min taw thupha hong pia khu hi” ci ngawl tu hi.