Psalm Late 119 - Syin Chin Bible

Topa Thukham

¹ Topa thukham bangin nungta a, a nuntakna a sit baang ngawlte in mihing lungdamte ahi hi.

² Ama thupiakna a zuite, a thin theampo taw ama thu a nite in mihing lungdamte ahi uh hi.

³ Amate in ngamtat khial a nei ngei bua uh hi; Topa lampi a tawn uh hi.

⁴ Topa awng, na thukhamte ko nong pia zo a, thumaan takin ka zui natu nong sawl hi.

⁵ Nong hilnate thumaan tak a, ka kepcing natu sia bangza in lametna nei khi ziam!

⁶ Na thupiakte theampo ka nadon le, ka mai hong zumsak buatu hi.

⁷ Thutang taw na thu khennate ka heheak ciangin, thinsung thiangtho taw nang kong pok tu hi.

⁸ Na thukhamte ka zui tu hi; Kei hong nusia ngei heak in!

Topa Thukham Zuina

⁹ Khangno khat in ama nuntakna bangbangin a thiangtho in a keam thei tu ziam? Na thupiakte zuina taw keam thei tu hi.

¹⁰ Ka thin theampo taw nang atu sep tu ka hanciam hi; na thupiakte a zui ngawlin hong koi heak in.

¹¹ Nang tungah kong maw ngawl natu in na thukham ka thinsung ah ka keam hi.

¹² Nang kong pok hi, Topa awng; nangma paiziate hong hil ta'n.

¹³ Nong piaksa thukhamte theampo nging takin ka lo kik tu hi.

¹⁴ Hau mama tu sangin na thupiakte zuina sungah lungpilna ka nei zaw hi.

¹⁵ Nong lamlaknate ka kantel hi; nong hilnate ka mitsuan hi.

¹⁶ Na thukhamte sungah nuam ka sa hi; nong thupiaknate ka mangil buatu hi.

Topa Thukham sungah Lungdamna

¹⁷ Ka nuntak thei natu le nong hilnate kong nit thei natu in, kei na naseampa tungah hong dik ta'n.

¹⁸ Na thukham sungah a lamdang thumaante ka mu thei natu in ka mit hong honsak ta'n.

¹⁹ Hi sung leitung ah tawm vei bek ka om tu hi; na thupiakte kei kung pan seal heak in.

²⁰ Na thu khennate a tawntungin ka he nuam a, thangai in ka thin na hi.

²¹ A kiphasakte na mawsak hi; na thupiakte a ni ngawlte haamsiatna thuak tahen.

²² Na thukhamte ka kepcing hu in kei hong selno a, hong nomute taw hong kipealsak ta'n.

²³ Ngam ukte kisitua in kei hong thasawm uh hi, ahihang nangma hilnate ka kantel tu hi.

²⁴ Na lamlaknate in kei thinnopna hong pia hi; tuate in ngaisutna hong piate ahi hi.

Topa Thukham Zui natu Thin Khensatna

²⁵ Leivui sungah lelna taw ka lum hi; nong kamciamsa bangma in hong hingsak ta'n.

²⁶ Ka sepsa theampo nang tungah kong pualaak a, nangma in nong zo hi; nangma ii paiziate hong hil ta'n.

²⁷ Na thukhamte ka tel thei natu in hong hu ta'n, tua ciangin a lamdang nong hilnate ka ngaisusun tu hi.

²⁸ Heena in keima hong khucip hi; nong kamciamsa bangin hong hatsak ta'n.

²⁹ A maan ngawl lampi ka zui ngawl natu in hong keam ta'n a, na phatna zui in na thukham hong hil ta'n.

³⁰ Thu nit tu ka teal zo hi; na thu khennate ka nadon zo hi.

³¹ Na lamlakna ka zui zo hi, Topa awng; maizum hong ngasak heak in.

³² Na thupiakte thalawp takin ka zui tu hi, banghang ziam cile nangma in tel theina a tamzaw nong pia tu hi.

Tel thei natu Thungetna khat

³³ Topa awng, na thukhamte ii khiakna hong hil ta'n, tua hile a tawntungin ka zui tu hi.

³⁴ Na thukham kei tungah hong thiangson ta'n, tua hile ka zui tu hi; ka thin theampo taw ka keam tu hi.

³⁵ Na thupiakte hong zuisak ta'n, banghang ziam cile tuate sungah lungdamna ka mu hi.

³⁶ Hau natu sangin na thukhamte zui nopna thin hong pia zaw ta'n.

³⁷ A man nei ngawl nate nadon na panin hong keamcing ta'n a, nong ciamsa bangma kei tungah hong dik ta'n.

³⁸ Na thu hong nite tungah na piak kamciam sia na naseampa kei tungah hong tungsak ta'n.

³⁹ Selnona thuak tu ka launa panin hong hun ta'n; na thu khennate bangza in lamdang ziam!

⁴⁰ Na thupiakte ka zui nuam hi; nuntakna thak hong pia ta'n, banghang ziam cile nangma in thumaan thutang na hi hi.

Topa Thukham Muanna

⁴¹ Topa awng, kei bangza hong it ni ziam hong lak ta'n a, na kamciamsa taw kizui in, kei hong ngum ta'n.

⁴² Tuasia ciang kei hong selnote pauna ka zo thei tu hi banghang ziam cile na kammal ka muang hi.

⁴³ A tawntungin thumaan hong pausak thei ta'n, banghang ziam cile ka lametna sia nangma thukhen nate sungah om hi.

⁴⁴ Na thukham sia a tawntung a tawntungin ka zui tu hi.

⁴⁵ A cialcing suatakna sungah ka nungta tu hi, banghang ziam cile na hilnate zui tu ka hanciam hi.

⁴⁶ Kumpipate munah na thupiaknate ka son tu a, ka mai a zum buatu hi.

⁴⁷ Na thupiakte zuina sungah thinnopna ka nga hi, banghang ziam cile tuate ka it hi.

⁴⁸ Na thupiakte thasia in ka it hi; na lamlaknate thuk takin ka ngaisusun tu hi.

Topa Thukham tungah Kimuanna

⁴⁹ Na naseampa kei tung a, nong kamciam sia phawk in; tuasia in lametna hong pia hi.

⁵⁰ Ka ngimna sung ngawngawn ah keima hong kiheneam hi, banghang ziam cile na kamciamna in kei nuntakna hong pia hi.

⁵¹ A kiphasakte in kei hong zawnsak tawntung hang, na thukham panin ka pial ngei bua hi.

⁵² Topa awng, taanghlai a na thukhennate ka ciamtee a, tuate in heenepna hong pia hi.

⁵³ Mihing seksolte ii na thukham a paltan ka mu ciangin thin uukna taw ka kidim hi.

⁵⁴ Leitung ka nuntak hun tom no sungah na thupiakte huvau la in ka phuak hi.

⁵⁵ Topa awng, zanin nang kong phawk a, na thukham ka ngaisun hi.

⁵⁶ Na thupiakte zuina in ka lungdamna ahi hi.

Topa Thukham tungah Kipiakna

⁵⁷ Topa awng, ka dei theampo sia nangma na hi hi; na thukhamte zui tu in kong kamciam hi.

⁵⁸ Nong kamciamsa bangma kei tungah hesuakna nong nei natu in ka thin theampo taw kong ngen hi!

⁵⁹ Ka ngamtat nate ka ngaisun zo a, nong lamlaknate zui natu kamciam kong pia hi.

⁶⁰ Na thupiakte zui natu ka haisaang bua a, ka manlang hi.

⁶¹ Mihing seksolte in kei thaang hong sia zo hi, ahihang na thukham ka mangil bua hi.

⁶² Thutang taw na thu khennate hangin nangma pok tu in zan kimlai in ka khanglo hi.

⁶³ Keima in nang atu hong sepsakte theampo le, na thukhamte a zuite theampo ii lawm ka hi hi.

⁶⁴ Topa awng, leitung in na itna kip taw kidim hi; na thupiakte hong hil ta'n.

Topa Thukham ii Manphatna

⁶⁵ Topa awng, na kamciam, na kholet zo a, na naseampa keima ii tungah nong dik hi.

⁶⁶ Ciimna le heakna hong pia ta'n, banghang ziam cile na thupiaknate ka muang hi.

⁶⁷ Daan nong piak ma in ka pai khial bul hi, ahihang tu in na pau kong ni hi.

⁶⁸ Nang sia na pha a, na thuthiam hi! Na thupiakte hong hil ta'n.

⁶⁹ Mihing kiphasakte in kei huvau leilot thu son zo uh hi, ahihang na lamlaknate ka thinsung theampo taw ka zui hi.

⁷⁰ Hi mihingte in tel theina bangma nei ngawl hi, ahihang kei in na thukham sungah nuam ka sa hi.

⁷¹ Daan ka thuakna in kei atu in pha hi, banghang ziam cile na thupiakte hong hesak hi.

⁷² Leitung ah a om sum le vanh manpha theampo sangin nong piak na thukham in kei atu in khiakna nei zaw hi.

Topa Thukham sungah Thutang khenna

⁷³ Nangma in kei nong bitphua a, nong keamcing hi; tel theina hong pia ta'n, tua hile na thukhamte ka he tu hi.

⁷⁴ Nang hong upatte in kei hong mu ciangin a lung uh dam tu hi, banghang ziam cile na kamciam ka muang hi.

⁷⁵ Topa awng, na thukhennate tang hi ci in ka he hi, tuaciang daan nong piak zongh nangma thumaan hang ahi hi.

⁷⁶ Na naseampa kei tungah nong kamciamsa bangma in na itna kip in kei hong heeneam tahen.

⁷⁷ Kei hong hesuak ta'n, tua hile ka nungta tu hi, banghang ziam cile na thukham sungah thinnopna ka nei hi.

⁷⁸ A kiphasakte in a maan ngawl bulin kei hong suanhkhial ahikom maizumna nga tahen; kei ka hile nangma lamlaknate thuk takin ka ngaisusun tu hi.

⁷⁹ Nang hong zaktate na thupiakte a hete theampo kei kungah hong pai tahen.

⁸⁰ Lelna maizumna taw ka kipeal natu in na thupiakte a cing takin hong zuisak thei ta'n.

Suatak natu Thungetna

⁸¹ Topa awng, nong ngup tu kong ngakna in, ka tha tul zo hi; na kammal sungah muanna ka nei hi.

⁸² “Bang hun ciang hong hu tu ni ziam?” ci in kong dok kawmin nong kamciamte muangmaw a ka e etna in ka mit taak zo hi.

⁸³ A kivawk sa savun tuithawl bangin kei sia kimanna ka nei nawn bua hi; ahihang na thupiakte ka mangil bua hi.

⁸⁴ Bang tanvei hong ngak lai tu khi ziam? Kei hong vawtsiate bang hun ciangin daan pia tu ni ziam?

⁸⁵ Na thukham a zui ngawl mihing kiphasakte in kei thaang hong sia natu in vuum a to zo uh hi.

⁸⁶ Na thupiak theampo muan thamman hi; mihingte in leilot thu taw kei ngim hong pia hi — kei hong hu ta'n!

⁸⁷ Amate in kei hong thatlum dektak zo hi, ahihang na thupiakte ka ngaingon ngei bua hi.

⁸⁸ Na itna kip hu in kei tungah hong dik ta'n, tua hile na thukhamte ka zui thei tu hi.

Topa Thukham Upna

⁸⁹ Topa awng, na kammal in kikhomsuan tu hi; tua in vantung ah kip tawntung hi.

⁹⁰ Na thumaanna sia khang theampo dong kikhomsuan hi; nangma in simlei sia a om natu munah na nga a, tuabang ma in om top hi.

⁹¹ Tuni dong na theampo amate om babang tekin om hi, banghang ziam cile nangma thupiak hang le amate theampo sia na naseamte a hi siat uh hang ahi hi.

⁹² Na thukham in ka lungdamna ii naak hi buathong le ka thuaknate taw ka thi zo tu hi.

⁹³ Na lamlaknate ka ngaingon ngei buatu hi, banghang ziam cile tuate taw keima a nungta in nong keam hi.

⁹⁴ Kei sia nangma aa ka hi hi — kei hong hun ta'n! Na thupiakte zui tu ka hanciam zo hi.

⁹⁵ Mihing seksolte in kei hong thatlum tu in hong ngak hi, ahihang na thukhamte a thukin ka ngaisusun hi.

⁹⁶ Na theampo sia a kiciangtan in om hi ci in ka he hi; ahihang na thupiakna sia sitbaang ngawl hi.

Topa Thukham Itna

⁹⁷ Na thukham bangza in it khi ziam! Tua thu nitangtumin ka ngaisun hi.

⁹⁸ Na thupiak sia kei taw a tawntungin omkhawm a, kei sia ka ngalte sangin hong ciimsak zaw hi.

⁹⁹ Ka syate theampo sangin ka tel zaw hi, banghang ziam cile keima in nong lamlaknate thuk takin ka ngaisusun hi.

¹⁰⁰ Pasal haamte sangin ciimna lianzaw ka nei hi, banghang ziam cile na thupiakte ka zui hi.

¹⁰¹ Ngamtat sia theampo ka pial hi; banghang ziam cile na thu ka ni nuam hi.

¹⁰² Na lamlaknate ka ngaingon bua hi; banghang ziam cile nangma in ka syapa na hi hi.

¹⁰³ Na lamlaknate thum mama a, khuaitui sang ngawngawn in thum zaw hi!

¹⁰⁴ Na thukhamte panin ciimna ka nga hi; tua ahikom a sia ngamtatna theampo ka ensan hi.

Topa Thukham pan Khuavak

¹⁰⁵ Na kammal in kei lam hong lak tu meiinn hi a ka lampi atu khuavak ahi hi.

¹⁰⁶ Na lamlakna maante zui natu in, a ciliaphuai ka kamciam sia ka len tu hi.

¹⁰⁷ Topa awng, ka thuaknate sia lauhuai takpi hi; nong kamciamsa bangma in hong nungtasak ta'n.

¹⁰⁸ Topa awng, lungdamko ka thungetna hong saang ta'n a, na thupiakte hong hil ta'n.

¹⁰⁹ Ka nuntakna khaamh tu in ka kinging tawntung hi; na thukham ka mangil bua hi.

¹¹⁰ Mihing seksolte in thaang taw kei hong sia hi; ahihang na thupiakte zui ngawlin ka om bua hi.

¹¹¹ Na thupiakte sia a tawntungin keima neisa ahi hi; tuate in ka lungdamna ahi hi.

¹¹² Ka thi ni matengin na thukhamte zui tu in ka khensat zo hi.

Topa Thukham sungah Ngammuanna

¹¹³ Nang tungah a pha tak hong thumaan ngawlte ka ensan hi, ahihang na thukham ka it hi.

¹¹⁴ Nangma in kei hong hungpa le hong dalpa na hi a; na kamciam sungah lametna ka nei hi.

¹¹⁵ No, mawnei mite awng, kei kung panin tai vun. Ka Pathian thupiakte ka zui tu hi.

¹¹⁶ Nong ciamsa bangma in thahatna hong pia ta'n, tua hile ka nungta tu hi; ka lametna sungah hong thinkiamsak heak in!

¹¹⁷ Ka ngammuan natu in hong len ta'n, tuaciang na thupiakte a tawntungin ka nadon tu hi.

¹¹⁸ Na thukhamte a zui ngawl peuma na nial hi; amate thimthel ngiimnate sia a mannung bua hi.

¹¹⁹ A seksol theampo sia ninteak bangin na ngaisun hi, tua ahikom na lamlaknate ka it hi.

¹²⁰ Nangma hu in ka lau hi; na thukhennate hu in launa taw ka kidim hi.

Topa Thukham Zuina

¹²¹ A phate le a maante ka seam zo hi; ka ngalte khut sungah hong nusia heak in!

¹²² Na naseampa na hu tu sia kamciam pia in; a kiphasakte in hong zothawsak heak in.

¹²³ Nong hut natu kong etna, nong kamciamsa ngupna ka etna in ka mit taak zo hi.

¹²⁴ Nong itna kip taw kizui in kei tungah hong vawt ta'n a, na thupiakte hong hil ta'n.

¹²⁵ Keima in na naseampa ka hi hi; na hilnate ka heak thei tu in, tel theina hong pia ta'n.

¹²⁶ Topa awng, na sep tu hun zo hi, banghang ziam cile, mihingte in na thukham hong zui ngawl hi.

¹²⁷ Khamh le, khamh ciitak sangin na thupiakte ka itzaw hi.

¹²⁸ Tua ahiciang na lamlaknate theampo ka zui a, lam khialna theampo ka ngaimaw hi.

Topa Thukham Zui nopna

¹²⁹ Na hilnate lamdang hi; ka thin theampo taw ka zui hi.

¹³⁰ Na hilnate na thiang sonna in khuavak pia a, a he ngawlte ciimna pia hi.

¹³¹ Na thupiakte ka deina hangin kamkaa in ka haihaw liang hi.

¹³² Kei sang hong nga ta'n a, nang hong itte theampo tungah na ngamtat bangmain kei hong hesuak ta'n.

¹³³ Nong kamciamsa bangin liik natu pan hong keam ta'n; siatna in hong zosak heak in.

¹³⁴ Na thupiakte ka zui thei natu in kei hong zothawte kung panin hong hun ta'n.

¹³⁵ Nong ompuina taw thupha hong pia ta'n a, na thukhamte hong hil ta'n.

¹³⁶ Mihingte in na thukham hong zui ngawl hu in ka thitui ngun bangin luang hi.

Topa Thukham ii Thukhaikimkhenna

¹³⁷ Topa awng, nangma in thumaan thutang na hi a, na thukhamte maan hi;

¹³⁸ zui tu ngeina na piakte sia pha tatak a, maan hi.

¹³⁹ Ka ngalte in, na thupiakte thusim ngawl ahikom ka thin uukna sia, ka sungah mei bangin kuang hi.

¹⁴⁰ Na kamciam sia bangza in maan ziam! Tuasia bangza in diksa khi ziam!

¹⁴¹ Kei sia a thupi ngawl ka hi a, zawnsak ka thuak hi, ahihang na hilnate ka ngaingon bua hi.

¹⁴² Na thutang sia a tawntungin kikhomsuan tu a, na thukham sia maan tawntung hi.

¹⁴³ Ngimna le thintoina taw ka kidim hi, ahihang na thupiakte in lungdamna hong puak hi.

¹⁴⁴ Na lamlaknate a tawntungin thutang ahi hi; telthiamna hong pia ta'n, tua hile ka nungta tu hi.

Suatak natu Thungetna khat

¹⁴⁵ Ka thin theampo taw nang kong sam hi; Topa awng, hong zo ta'n, tuaciang na thupiakte ka zui tu hi!

¹⁴⁶ Nang kong sam hi; hong hun ta'n, na thukhamte ka tang tu hi.

¹⁴⁷ Nisua ma in hu ngenin nang kong sam hi; na kamciam sungah ka lametna om hi.

¹⁴⁸ Na lamlaknate ka thuk ngaisusutna in zankhuateakin khangciim in ka lum hi,

¹⁴⁹ Topa awng, nong itna in kip ahikom hong za ta'n; nong hesuakna hong lak ta'n a, ka nuntakna hong keamcing ta'n.

¹⁵⁰ A ngilo kei hong vawtsiate in hong neak vaial hi; amate sia na thukham a tang ngeingawlte ahi hi.

¹⁵¹ Ahihang Topa awng, nangma in keima nai ah nong om a, na thupiakte theampo kho top hi.

¹⁵² Na lamlaknate ka heak zawk ngei zo hi; tuate sia a kikhomsuan tu in na vawt ahi hi.

Hu nget Maangkaana

¹⁵³ Ka thuakna hong en ta'n a, hong ngum ta'n, banghang ziam cile na thukham ka ngaingon bua hi.

¹⁵⁴ Ka vai hong panpui ta'n a, hong suaktasak ta'n; nong kamciamsa bangin hong hun ta'n.

¹⁵⁵ A seksolte kingum ngawl tu hi, banghang ziam cile amate in na thukhamte a ni bua uh hi.

¹⁵⁶ Ahihang, Topa awng, na mulkimna in lian hi; na hesuakna hong lak ta'n a hong hun ta'n!

¹⁵⁷ Keima in ngalte le hong zothaw theite tam mama ka nei hi, ahihang na thukhamte ka zui khial ngei bua hi.

¹⁵⁸ Tua ngual leeheak theite ka et ciangin kiihuai ka sa hi, banghang ziam cile amate in na thupiakte a len bua uh hi.

¹⁵⁹ Topa awng, na lamlaknate bangza in it khi ziam cisia, hong mu ta'n. Na itna in kikheal ngeingawl ahiciang hong hun ta'n!

¹⁶⁰ Na thukham laingil in thumaanna hi a, a tangin na thukhennate theampo sia kip tawntung hi.

Topa Thukham sungah Ki aapna

¹⁶¹ Mihing vaang neite in a maan ngawlin kei hong do hi, ahihang na thukham ka thasia hi.

¹⁶² Na kamciamte hu in bangza ka lungdam ziam — Sumngum kikholna a mu khat bangin ka lungdam hi.

¹⁶³ Leilot thu theampo ngaimaw in ka huatsa hi, ahihang na thukham ka it hi.

¹⁶⁴ A tang na thukhennate hu in ni simin salivei nang tungah lungdam kong ko hi.

¹⁶⁵ Na thukham a itte in ngammuanna tatak nei a, amate a puksak thei bangma a om bua hi.

¹⁶⁶ Topa awng, nong ngup tu ngakin ka om a, nong sawl po ka seam hi.

¹⁶⁷ Na hilnate ka ni hi; ka thinsung theampo taw tuate ka it hi.

¹⁶⁸ Na thupiakte le nong lamlaknate ka zui hi; ka sep ka vawt theampo na mu hi.

Hu natu Thungetna

¹⁶⁹ Hu ngen a kong auna nang kung hong theng tahen, Topa awng! Nong kamciamsa bangin tel theina hong pia ta'n!

¹⁷⁰ Kong thungetna hong ngai ta'n a, na kamciamsa om bangin hong hun ta'n!

¹⁷¹ A tawntungin nang kong pok tu hi, banghang ziam cile nangma in na thukhamte nong hil hi.

¹⁷² Na thukham tungtaang ah la ka sa tu hi, banghang ziam cile na thupiaknate maan hi.

¹⁷³ Kei hong hu tu in a tawntungin hong kinging ta'n, banghang ziam cile na thupiakte ka zui hi.

¹⁷⁴ Topa awng, hong ngum tu nong huna sia bangza in thangai khi ziam! na thukham sungah lungdamna ka mu hi.

¹⁷⁵ Nang kong pok thei natu in nuntakna hong pia ta'n; na lamlaknate in kei hong hu tahen.

¹⁷⁶ Ngam amh tuuno khat bangin ka vakthap hi; Tua ahikom hong pai in, na naseampa keima hong zong ta'n, banghang ziam cile na thukhamte ka ngaingon bua hi.