Psalm Late 118 - Syin Chin Bible

Zawna hu a Lungdamko Thungetna

¹ Topa tungah lungdamko vun, banghang ziam cile ama pha hi, tuaciang ama hong itna in a tawntung kip hi.

² Israel te in: “Ama ii itna kip tawntung hi” ci tahen.

³ Pathian thiampite in “Ama ii itna kip tawntung hi” ci tahen.

⁴ Ama a bia theampo in “Ama ii itna kip tawntung hi” ci tahen.

⁵ Ka ngim ngana sungah Topa ka biakpui hi; ama in hong zo a hong suaktasak hi.

⁶ Topa in keima taw hong omkhawm a, kei ka lau buatu hi; akua in kei bang hong law thei tu ziam?

⁷ Topa sia kei hong hu pa hi a, ka ngalte ii lelna a thuak sia ka mu tu hi.

⁸ Topa muanna in mihing suan tu sangin phazaw hi.

⁹ Topa muanna in mihing lampuite suan tu sangin phazaw hi.

¹⁰ Ngal tam mamate ka kiim ah om hi; ahihang Topa vaang taw amate ka susia hi!

¹¹ Amate ka kiimkot mun theampo ah a om uh hi; ahihang Topa vaang taw amate ka susia hi!

¹² Ka kiimkot panin amate in khuai bangin hong uumci hi, ahihang lingkung kawm kaanghmei bangin amate kaanghtum paih hi; Topa vaang taw amate ka susia hi.

¹³ Kei sia nasia takin hong kisim a hong zo uh hi, ahihang Topa in kei hong hu hi.

¹⁴ Topa in vaang hong pia a hong hatsak hi; ama in kei hong hun zo hi.

¹⁵ Pathian mite tuipuan bukte sungah zawna lungdamna taw a auna ngai vun: “Topa vaanglet thahatna in tu a bang a suaksak hi!

¹⁶ Kidona sungah ama vaanglet thahatna in eite zawna ah hong then zo hi!” ci uh hi.

¹⁷ Kei ka thi buatu hi; ka nungta zaw tu a, Topa sepsate ka thangsak tu hi.

¹⁸ Ama in nasia takin kei daan hong pia zo hi, ahihang ama in kei hong thisak bua hi.

¹⁹ Biakinn kongpite kei hong hon tavun; a sungah tumin, Topa tungah lungdam ka ko tu hi!

²⁰ Hisia in Topa kongpi hi; thutangte bek tum thei hi.

²¹ Topa awng, nang kong pok hi, banghang ziam cile nangma in ka aw nong za a, zawna nong pia zo hi.

²² Inn sate in mannung sa ngawl a, a nil suangtum sia a thupibel hong suak hi.

²³ Hisia in Topa ii sepsa ahi hi; tua in bangza mu nop huai ziam!

²⁴ Hisia in Topa zawna ni ahi hi; lungdam in poai vawt tawng!

²⁵ Hong hun ta'n, Topa awng, hong hun ta'n! Kote zawna hong pia ta'n, Topa awng!

²⁶ Topa min taw hong pai pa, Pathian in thupha pia tahen! Topa Biakinn panin nang thupha kong pia uh hi.

²⁷ Topa sia Pathian hi; ama in ei tungah hong pha hi. Na khut sung uh ah thingsawlte toai in poai khaamna kipan vun a, biaknatau kiimkot in pai vun.

²⁸ Nangma in ka Pathian na hi a, lungdam kong ko hi; na letna ka thangsak tu hi.

²⁹ Topa tungah lungdamko vun, banghang ziam cile ama pha hi, tuaciang ama ii itna a tawntungin kip hi.