Psalm Late 116 - Syin Chin Bible

Thina pan A kingum khat ii Pathian Pokna

¹ Topa ka it hi, banghang ziam cile ama in ka aw hong za hi; ama in ka thungetnate hong ngai hi.

² Ka biapui simin ama in hong ngai hi.

³ Thi tu lau huaina sia ka kiimkot ah om hi; thaankuul kiitakhuaina in kei hong neak hi; kei sia launa le thintoina taw ka kidim hi.

⁴ Tuasia ciang Topa sia hi bangin ka sam a, “Hong thuum khi hi, Topa awng, kei hong hun ta'n!” ka ci hi.

⁵ Topa sia hesuak thei a, pha hi; ih Pathian in khuangai huai hong sa thei hi.

⁶ A hun tu a nei ngawlte Topa in sungsia a; a lau huaina sungah ka om ciangin ama in kei hong hun hi.

⁷ Ka lungtang awng, kimuang in, banghang ziam cile Topa in kei tungah pha hi.

⁸ Topa in thina panin kei hong suatak hi; ama in ka thitui hong khaamsak a, hong lelsak ngawl hi.

⁹ Tua ahikom Topa ii mai, a nungtate teenna leitung ah ka vak hi.

¹⁰ “Hong kisucip hi,” ka ci ciang ngawngawn ahizong,

¹¹ kei lau in, “Kuama muan thei tu om bo” ka ci ciang ngawngawn zongin ka upna ka thasua bua hi.

¹² Topa ii kei tungah a phatna theampo hu in ama bang pia thei tu khi ziam?

¹³ Kei hong hutna lungdamkona in Topa tungah sapittui biakpiakna ka pia tu hi.

¹⁴ A mite theampo kikhopna ah ka kamciamsa sia ama ka pia tu hi.

¹⁵ A mite khat a thi ciangin Topa in bangza in na sa ziam!

¹⁶ Kei sia na naseampa khi hi, Topa awng; ka nu ii nang atu hong sepsak bangma in kei zongh in nang atu ka seam hi. Thina panin nong hun zo hi.

¹⁷ Lungdamko biakpiakna kong pia tu a, nang tungah thungetna kong nei tu hi.

^18-19 Na mite theampo kikhopna mun, Jerusalem na Biakinnpi thiangtho sungah, ka kamciamsa sia kong pia tu hi. Topa pok vun!