Psalm Late 111 - Syin Chin Bible

Topa Pokna

¹ Topa pok vun! Ama ii mite kikhopna ah ka thin theampo taw Topa ka pok tu hi.

² Topa ii septe bangza in lamdang ziam! Tuate hu in a lungpilte in tuate thu a tel nuam uh hi.

³ Ama ii sep theampo sia patoaina le vaangneina taw kidim hi; ama ii thutang in kip tawntung hi.

⁴ Topa in ama ii a lamdang a septe eite makngil tu a dei bua hi; ama dik a hesuak thei hi.

⁵ Ama a zaktate atu in ama in an pia hi; ama ii thuciam a mangil ngei bua hi.

⁶ Ngamdang mite ii leitangte amate a piakna taw in a mite tungah ama in a vaang lak hi.

⁷ A sep a vawt theampo sungah ama thumaanin thutang hi; ama ii thupiakna theampo in muan thamman hi.

⁸ Tuate in a tawntungin kikhomsuan hi; thumaan thutak le thutang taw a kipia ahi hi.

⁹ Ama in a mite suaktasak a, amate taw a kip tawntung thuciamna khat vawt hi. Ama thiangtho in vaanglian hi!

¹⁰ Topa zatakna in ciim natu lampi ahi hi; ama thupiakte a zui theampo tungah thu khentel thiamna pia hi. Ama sia a tawntungin pok tu ahi hi.