Psalm Late 105 - Syin Chin Bible

Pathian le Ama Mite

¹ Topa tungah lungdamkona pia vun a, ama ii letna thangsak vun; ama ii sep sate minam tuatuamte tungah son vun.

² Topa tungah pokna lasa vun; a lamdang a sep sa nate thu son vun.

³ Ama ii neisa ih hi hu in lungdam vun; ama a bia theampo lawp tahen.

⁴ Hu ngen tu in Topa zuan vun; a kizom suakin ama bia vun.

^5-6 A naseampa Abraham ii suante, a teal pa Jacob ii suante awng: Pathian ii a sep nalamdang laknate le a thukhennate phawk vun.

⁷ Topa in ih Pathian hi; ama thupiakte in leitung bup atu ahi hi.

⁸ Ama in a thuciam sia a tawntung kholet tu a, ama kamciamte khang tul dongin kipsak tu hi.

⁹ Abraham taw a vawt thukimna sia le Isaac tungah a kamciam sia ama in kipsak tu hi.

¹⁰ A tawntungin a kikhom tu thuciamna khat Topa in Jacob taw vawt hi.

¹¹ “Canaan ngam nang kong pia tu a, nangma ii neisa hi tu hi,” ama in ci hi.

¹² Pathian mite sia citawm a, Canaan ngam ah zin tang uh hi.

¹³ Amate sia ngam khat pan ngam khat ah, kumpi ngam khat pan ngam khat ah vak kawkoai uh hi.

¹⁴ Ahihang Pathian in amate kuama in a zothawsak bua hi; amate a dal natu in kumpipate tungah hi bangin kidop natu thupia hi:

¹⁵ “Ka tealsa ka naseamte susia heak vun; ka kamsaangte thutha heak vun,” ci hi.

¹⁶ Topa in amate ngam ah kialpi tungsak a, a an uh a vekpi in laaksak hi.

¹⁷ Ahihang ama in sal bangin a kizuak Joseph a kici mihing khat amate mai ah paikholsak hi.

¹⁸ Ama sonkhol thu a taangtun mateng in Joseph ii peangte thikkhau kibul a, thikkol sia a ngawng ah kibul hi.

¹⁹ Pathian kammal in ama sia maan hi ci in lak hi.

²⁰ Tuasia ciangin Egypt ngam kumpipa in ama suaktasak hi; minamte a ukpa in ama suaktasak hi.

²¹ Ama in Joseph sia a ngamukna teng lampui tu le, a ngam bup ukpa tu in koi a,

²² kumpipa ii uliante tungsia ah vaangneina le kumpipa ngaisutna a piate lamlak tu in thuneina pia hi.

²³ Tua zawkciang Jacob sia Egypt ngam ah pai a, tua ngam ah teang hi.

²⁴ Topa in a mite tungah ta tam mama pia a, a ngalte sangin hatsak zaw hi.

²⁵ Ama in a mite Egypt te ii a ngaimawk natu in vawt a, ama in a naseamte theambawl hi.

²⁶ Tua zawkciang ama in a naseampa Moses le a teal pa Aaron paisak hi.

²⁷ Amate in Pathian ii a nasia mama sepnate seam a Egypt ngam ah a lamdang laknate vawt hi.

²⁸ Tua ngam sungah Pathian in khuazing puak hi, ahihang Egypt te in ama thupiakna a ni bua uh hi.

²⁹ Ama in nguntuite chisan suaksak a, a ngasate theampo thisak hi.

³⁰ A ngam bup sia ulolte dimteak a, kumpipa inn ngawngawn ulol taw kidim hi.

³¹ Pathian in thupia a, tho le thataa sia a ngam sung bup ah a hataak in om hi.

³² Nguatui taangin ngialtang le khualeng te amate ngam sungah puak hi;

³³ amate ii sapitkungte le theikungte lalsak a, thingkungte theampo nuaitan hi.

³⁴ Ama in thupia a khaumawte hong pai in, sim zawk ngawl awn tampi pha uh hi:

³⁵ tuate in a ngam sungah thingno lopa theampo netum uh a, lo ante theampo khawng siat uh hi.

³⁶ Ama in Egypt ngam ah innkuante theampo sung pan tapaciil teng thatlum hi.

³⁷ Tua zawkciang ama in Israel te pusua pui hi; amate in ngunn le khamh pua uh a, amate a vekpi in ciidam in thahat uh hi.

³⁸ Egypt te in amate kiita ahikom amate ii a nusiat ciangin a lungdam uh hi.

³⁹ Pathian in a mite tungah meeilom khat koi a, zan in khuavak pia tu in mei khat koi hi.

⁴⁰ Amate in ngen a, ama in vamimte puak hi; ama in amate lungkim natu in vantung pan an khiak hi.

⁴¹ Ama in suangpi khat hong a, tui hong phulkeak hi, tua tui in sennealngam sungah ngun bangin luang hi.

⁴² A naseampa Abraham tungah a kamciam thiangtho a piak teng ama in ciamtee hi.

⁴³ Tua ahikom ama in a tealsa a mite pusuapui a, amate in lawpna taw lasa in au uh hi.

⁴⁴ Ama in midangte ii leitangte amate tungah pia a, tuaciang a lo teng a tansak sia,

⁴⁵ a mihingte in ama thukhamte a zui natu le a thupiak theampo a zui natu in a vawt ahi hi. Topa pok vun!