Psalm Late 101 - Syin Chin Bible

Kumpipa ii Kamciam

¹ Keima ii la in thumaanna le thukhaikim huvau hi a, nangma kong sak hi, Topa awng.

² Ka ngamtatna sia sitbaang ngawl tu hi. Bang hun ciang kei kungah hong pai tu ni ziam? Ka inn sungah nuntakna thiangtho taw ka nungta tu a,

³ a pha ngawl sia ka thuak zo buatu hi. Pathian kung pan a nungkinte ii ngamtatnate ka ngaimaw hi; amate taw kipee-awna bangma ka nei buatu hi.

⁴ Thumaan ngawlin ka om buatu a, ngitlona sungah ka kihel buatu hi.

⁵ Ngualdang khat po a thimtham in a ngensia thei te ka pawlvawt buatu hi; a kiphasak a kisathei mihing khat sia ka dual zo buatu hi.

⁶ Pathian tungah a thumaante sia ka thukim tu a amate sia ka kumpi inn sungah ka teangsak tu hi. A thumaan a citakte sia keima na ka seamsak thei tu hi.

⁷ Ka kumpi inn sungah leilot thu son thei kuama a teang buatu hi; a kihi theamsak peuma kei omna munah a om buatu hi.

⁸ Ih ngam sungah a om mihing seksolte sia ni khat zawk ni khat ka susia tu hi; mi ngilo theampo Topa khuapi panin ka hawlkhia siat tu hi.