Psalm Late 10 - Syin Chin Bible

Thumaan natu Thungetna

¹ Banghangin a khuala ah om ni ziam, Topa awng? Ngimna ka nga uh hun sungah banghangin buu ni ziam?

² Mi seksolte in kiphasak a, mizawngte vawtsia hi, amate ii thaangsia sungah amate ma awksak in.

³ A seksol pa in ama ii a sia deinate kiphatsak pui hi, a duhop pa in Topa haamsiat in nial hi.

⁴ Mihing seksol pa in Topa awlmaw ngawl a, a kiphatsakna in, Pathian thupi sim ngawl hi.

⁵ Mi seksol pa in na theampo sungah zawna nga hi, Pathian thukhennate tel thei ngawl hi; amate in ngalte nunau uh hi.

⁶ Amate in, “Kei lel ngei bua vak ing; ngim nga ngei bua vak ing” amate le amate kici uh hi.

⁷ A kam uh sia haamsiatna, theamna le ngual tawnna taw kidim a; amate in ngaimawkna le ngitlona kammalte pau memeang hi.

⁸ Khuanote sungah amate mama buu in, mawnei ngawl mite that tu in pang hi. Akua cimaw ziam ci in kankuu uh a;

⁹ tawpite bangma in ama in a bukna pan mizawngte pang hi. A thaang sungah amate manin kaikeak hi.

¹⁰ Mat a thuak a cimawte kisucip hi; ngoltol thahatna in amate zo zo hi.

¹¹ Mi seksolte in amate le amate, “Pathian in phamaw sa ngawl hi! Ama a mit si a, hong mu ngeingawl tu hi,” ci hi.

¹² Topa awng, mihing seksolte daan pia in! ngim a thuakte phawk in!

¹³ Banghangin mihing seksol pa in Pathian sia thusim ngawlin a thinsung ah “Daan hong pia buan te” ci thei ziam?

¹⁴ Ahihang nang in a ngimna le a thuaknate na mu a, a hu tu in na kinging tawntung hi. A cimawte in nang tungah hong ki aap a, a kitaangsamh te na hu tawntung hi.

¹⁵ Mihing seksolte le mihing ngilote ii thahatna nuaitan in; khialna a vawt kik nawn ngawl dong daan na pia in.

¹⁶ Topa in a tawntung a tawntungin kumpipa ahi hi; pathian dang a biate sia ama ii leitang tung panin mong tu hi.

¹⁷ Topa awng, mihing a kinengniamte ii thungetna na ngai tu hi; amate thinletna na pia tu hi.

¹⁸ Zawthawk thuakte le tangate kaana na za tu hi; a thithei mihingte ii liinna launa a piansak nawn ngawl natu in amate sang pangin thu na khen tu hi.