Pianciilna 8 - Syin Chin Bible

Tuipi Liim A bona

¹ Pathian in Noah le ama taw teambaw sungah a om nganhingte theampo mangil ngawl hi; ama in vuivasak a, tuaciang tui kiamsuk tu kipan hi.

² Leinuai pan tui phulna vangte le van ii tui kongpite kikhak siat hi. Nguazu nawn ngawl hi,

³ tuaciang ni 150 sung dadam in tui kiamsuk hi.

⁴ A tha sali na, ni sawm le ni sali ni in, teambaw sia Ararat mual tungah hong tawlnga hi.

⁵ Tui kiam susuk a, a tha sawmna, ni khat ni in mualdawnte kilangh hi.

⁶ Ni sawmli zawkciang Noah in khelki khat hong a,

⁷ va-ak khat tha hi. Va-ak hong heak kik ngawl a, ahihang tui a kiam siat mateng leang kawkoai hi.

⁸ Tua hun sungin, tui kiam siat zo ziam ci sia a heak natu in, Noah in vakhu khat tha a,

⁹ ahizong lei theampo tui in khum lai ahikom vakhu in a tuk natu mun mu ngawl hi. Teambaw kungah vakhu hong leang kik a, Noah in manin sungtan pui hi.

¹⁰ Ama in a dang ni sali a ngak zawkciang tua vakhu tha kik hi.

¹¹ Nitak sang ciangin ama kungah olive tee hing khat a muk ah pu in tua vakhu hong heak kik hi. Tua ahiciang tui kiamsuk zo a hina thu Noah in he hi.

¹² Tua zawk ni sali ngak lai in khatvei ma tua vakhu tha kik hi; tu sia ciang, vakhu hong heak kik nawn ngawl hi.

¹³ Noah kum 601 a phak zawk, a tha khatna, ni khat ni in tui kiam siat hi. Noah in teambaw sitna hongin khua en kawkoai a, leikote mu hi.

¹⁴ A tha niina, ni kul le ni sali ni ciang leitung ko thiang hi.

¹⁵ Pathian in Noah tungah,

¹⁶ “Na zi, na tapate le a zite taw teambaw sung pan pusuak vun.

¹⁷ No nei kik a leitung theampo ah a kizel natu in, vacim theampo le nganhing theampo nangma pusua pui in,” ci hi.

¹⁸ Tua ahiciang Noah sia teambaw sung pan a zi a tapate le a zite taw pusuak uh hi.

¹⁹ Nganhing theampo le vacim theampo a nam zui in, a pawl a pawl in teambaw sung pan pusuak uh hi.

Noah in Biakpiakna Vawt

²⁰ Noah in biaknatau khat Topa atu vawt hi; biakna taw kisai a thiangtho nganhing nam le vacim nam sim pan khat tek la in, biaknatau tungah pum bup meihal biakpiakna in pia hi.

²¹ Topa sia biakpiakna ngimnamtui in lungdamsak hi, tuaciang a thinsung ah, “Mihing ngamtatna hangin leitung ka haamsiat kik ngei buatu hi; a no lai pan a khuangaisutnate a siat hunlam ka he hi. Tu a ka vawt bangin nuntakna nei theampo ka mon kik ngei buatu hi.

²² Leitung a om laiteng lopoai hun le anlaak hun om tu hi. A vot le a sa, khuakhaal le phalbi, sun le zan om tawntung tu hi,” ci hi.