Pianciilna 10 - Syin Chin Bible

Noah Tapate ii Suan le Paalte

¹ Hite sia Noah ii tapa ahi Shem, Ham le Jepheth te ii suan le paalte ahi hi. Tuipi liim zawkciang hite thum in tapate nei uh hi.

² Japheth ii tapate — Gomer, Magog, Madai, Javan, Tubal, Meshech le Tiras — sia amate ii min a pu mite ii taanghpupite ahi hi.

³ Gomer ii suan le paalte sia Ashkenaz, Riphath, le Togarmah mite ahi uh hi.

⁴ Javan suan le paalte sia Elishah, Spain, Cyprus le Rhodes mite ahi uh hi;

⁵ amate sia tuikulhte tung le tuipi dung a, a teangte ii taanghpupite ahi uh hi. Hite sia Japheth ii suan le paalte hi a, a mihon simin amate kampau tek zangh a, ngam tuatuam ah minam tuam tekin teang uh hi.

⁶ Ham ii tapate — Cush, Egypt, Libya le Canaan — sia amate ii min a pu, mite ii taanghpupite ahi hi.

⁷ Cush ii suan le paalte sia Seba, Havilah, Sabtah, Raamah le Sabteca mite ahi uh hi. Raamah ii suan le paalte sia Sheba le Dedan mite ahi uh hi.

⁸ Cush in Nimrod a kici tapa khat nei a, leitung ah a masabel a minthang ngalzopa ahi hi.

⁹ Topa huna taw savai minthang khat hi a, tua ahi hu in mihingte in “Topa in nang sia Nimrod bangin savai minthang khat hong suaksak tahen!” ci uh hi.

¹⁰ A masa phitin ama ii kumpi ngam sia, Babylon ngam sungah a om Babylon, Erech le Accad ngam thum teng ahi hi.

¹¹ Tua ngam panin Assyria ah pai a, Nineveh, Rehoboth Ir, Calah khuapite,

¹² tuaciang Nineveh le Calah khuapi lian kilaklaw ah a om, Resen khuapi saat hi.

¹³ Egypt suan le paalte sia Lydia, Anam, Lehab, Naphtuh,

¹⁴ Pathrus, Casluh mite, tuaciang Philistine te ii pianna Crete mite ahi uh hi.

¹⁵ Canaan ii tapate — a ubel Sidon le Heth — sia amate ii min a pu mite ii taanghpupite ahi uh hi.

¹⁶ Canaan mite sia Jebus te, Amor te, Girgash te,

¹⁷ Hiv te, Ark te, Sin te,

¹⁸ Arvad te, Zemar te le Hamath te ii taanghpupi zongh ahi hi. Canaan mite kithethaang a,

¹⁹ amate ngam sia, Sidon panin thangsang ah Gaza nai Gerar ngam dong hi a, nisuana sang ah Sodom, Gomorrah, Admah, tuaciang Lasha khua nai Zeboiim dong ahi hi.

²⁰ Hite sia Ham ii suan le paalte hi a, amate kampau tek zanghin ngam tuatuam ah a minam tuam tekin teang uh hi.

²¹ Japheth ii upa Shem sia Hebrew mi theampo ii taanghpupi ahi hi.

²² Shem ii tapate — Elam, Asshur, Arpachshad, Lud le Aram — sia amate ii min a pu mite ii taanghpupite ahi uh hi.

²³ Aram suan le paalte sia Uz, Hul, Gether le Meshek mite ahi hi.

²⁴ Arpachshad sia Shelah pa hi a, Shelah sia Eber ii pa hi.

²⁵ Eber in tapa nii nei a: khat ii min sia Peleg ci hi, banghang ziam cile ama ii hun sungin leitung mihingte kikhenthaang hi; a khat sia ii min Joktan kici hi.

²⁶ Joktan suan le paalte sia Almodad, Sheleph, Hazarmaveth, Jerah,

²⁷ Hadoram, Uzal, Diklah,

²⁸ Obal, Abimael, Sheba,

²⁹ Ophir, Havilah le Jobab mite ahi hi. A vekpi in Joktan suan le paalte ahi hi.

³⁰ Amate teenna ngam sia Mesha pan nisuana sang mualtung ngam Sephar dong kithung hi.

³¹ Hite sia Shem ii suan le paalte hi a, amate kampau tek zanghin ngam tuatuam ah a minam tuam tekin teang uh hi.

³² Hi mite theampo sia Noah ii suan le paalte hi a, a khang simna taw kizui in, minam tuam veu suak hi. Leitung minam theampo sia tuipi liim zawkciang Noah tapate ii suan le paalte ahi hi.