Philemon 1 - Syin Chin Bible

¹ Christ Jesus atu a, thong a taak Paul le ih suapuipa Timothy in — koma ngualtamh le ka nasep puipa uh Philemon tungah,

² Tuaciang Philemon le na inn ah a kikhawm pawlpi le koma suapuinu Apphia le ngalkap bang a ka seppui uh Archippus tungah lai kong thaak uh hi:

³ Ih Pa Pathian le ih Topa Jesus Christ in thuthiamna le thinnopna hong pia tahen.

Philemon ii Itna le Upna

⁴ Suapui Philemon awng, thu ka nget simin na min kong lo a, ka Pathian tungah lungdam ka ko hi.

⁵ Banghang ziam cile, Pathian mihing a kici peuma na itna le Topa Jesus sungah upna na neina thute ka za hi.

⁶ Ka thungetna sia, thu umte ih hina taw ih kipawl khopna in Christ taw kipumkhat a, ih nuntakna sungah ih nei thupha a minpiang a thuk zaw in hong telsak thei natu ahi hi.

⁷ Suapui awng, nong itna in, kei atu lungdamna lianpi le hanthotna tam ma hong pia hi! Pathian ii mihingte theampo ii thin nong nuamsak hi.

Onesimus atu Ngetsakna

⁸ Hi thu hu in, Christ sungah na suapui khat ka hina taw, sep tu a kul khat sia hangsan takin kong sawl ngam hi.

⁹ Ahihang nang hong it ka hikomin, kong thuum zaw hi. Keima Paul sia Christ Jesus ii tongciin hi a, ama hu in tu laitak mama in thongtaak zongh hi napi, hi bangin thuumna kong zangh zaw hi.

¹⁰ Tua ahikom, Onesimus luangin ngetsakna khat kong nei hi, ama sia Christ sungah ka tapa hi zo hi; banghang ziam cile thong sungah ka om sung ma in, thaa vai ah ama ii a pa ka suak zo hi.

¹¹ Hun khat lai in ahile ama sia nang atu in, a kimanna om ngawl hi, ahihang tu in, ama sia nang le kei atu in a kizangh thei khat hong suak hi.

¹² Tu in nang kungah ama kong puak kik a, ka thinsung theampo taw ka phawk nginge hi.

¹³ Lungdamna thu hu in, luangta in ka om laitak, nangma luangin kei hong hu thei tu, ama sia hi sungah ka keam nuam hi.

¹⁴ Ahitazong, nong hu natu kong sawl hamtang nuam bua hi; tua sangin, nangma thu in na ngamtat tu kong dei zaw hi. Tua ahikom, na thukim ngawl po bangma ka vawt buatu hi.

¹⁵ Onesimus sia nang kung panin tawmvei sung a tai sia, a tawntungin na omkhop kik thei natu uh hang hizaw tha tu hi.

¹⁶ Tu in ama sia sila khat lel po hi nawn ngawlin, sila dinmun tungsia ah om zo hi: ama sia Christ sungah ih it suapuipa khat hi zo ta hi. Ama sia kei atu in bangza in, manpha ziam! Tuaciang nang atu zonghin, sila khat a hina le, Topa sungah suapuipa khat a hina taw bangza in manpha zaw lai tu ziam!

¹⁷ Tua ahikom nangma ii na naseppui bangin, kei nong ngaisun le, keima nong saan tu bangin, ama na saang kik in.

¹⁸ Nang tungah ngamtat khialna hong nei a, ahibuale, leiba hong nei le zong, keima ii kong bat bangin na ciamtee in.

¹⁹ Hi sungah keima khut tatak taw ma in lai hong at tu khi hi: Keima Paul in, kong lo kik vateei tu hi. (A tatakin ci leang, nangma pumpi mama kei tungah hong ba nginge na hi sia, kong phawsak tu kul ngawl hi.)

²⁰ Tua ahikom suapui awng, Topa atu in, thupha hi sia hong seam ta'n; Christ sungah suapui khat hina taw ka thin hong nuamsak ta'n!

²¹ Lai hi sia kong at laitakin, kong sawl bangin vawt hamtang tu in kong muang hi — a tatakin kong sawl za sangin a tamzaw vawt tu ci in kong he hi.

²² Tuaciang kei atu in inn doituam khat, na koi kholsak in, banghang ziam cile note theampo ii thungetna sia, Pathian in hong saang tu a, note kungah kei hong zuansak kik tu hi, ci in lametna ka nei hi.

A khakbel Vaithakna

²³ Christ Jesus atu in ka thongtaakpui Epaphras in note hong paupui hi,

²⁴ tuabang ma in ka naseppui Mark, Aristarchus, Demas le Luke in note hong nukset uh hi.

²⁵ Topa Jesus Christ ii thuthiamna sia note theampo taw hong omkhawm tahen.