Paunakte 9 - Syin Chin Bible

Ciimna le Mawmawtna

¹ Ciimna in a inn sa a, khuam sali phut hi.

² Ama in poai vawt natu nganno khat ngosakin, sapittui sungah hel thei tuatuamte a hel zawkciang sabuai phaasak hi.

³ Ama in a naseam numeite sam a, khua sung a saang belna mun pan hi bangin ausak hi;

⁴ “Heakna nei ngawl mite awng, hong tum tavun!” Tuaciang mi mawmawte munah ama in;

⁵ “Hong pai tavun a, ka an ne in, ka hel sa sapittui ne vun.

⁶ Heakna nei ngawl mihingte taw kitholna nusia vun a, nungta vun. Heakna lampi zui in” ci hi.

⁷ Mihing kisathei khat na hil na pau le hong lanna bek na thuak tu hi. Mihing tatsia khat na teih le thinnatna bekma na nga tu hi.

⁸ A kisathei khat bangma hunin hilin pau heak in; ama in tua hu in nang hong ensan tu hi. Ahihang mihing ciim khat hilin pau lete ama in nang hong zakta tu hi.

⁹ A ciimte khat ii tungah na ci pawpo in ama ciimsak seseam tu hi. A thutang khat ii tungah na son khat sia in ama ii heakna belap hi.

¹⁰ Ciim natu in Topa na thasia maksak kul hi. A Thiangtho Pa na he le telthiamna nei na hi hi.

¹¹ Ciimna in kum tam mama na khan hong sausak tu hi.

¹² Ciimna na nei le a hampha tu sia in nangma na hi a, ciimna na nial le a thuak tu sia nangma na hi hi.

¹³ Mawmawtna sia a au vazak, heakna nei ngawl, a maizum maw numei khat taw kibang hi.

¹⁴ Ama in a kongbiang ah to a, ahibuale khua sung a saangbelna munah to in,

¹⁵ amate nasep tek ngaisun a, hong papai mihingte tungah:

¹⁶ “Hong tum tavun, heakna nei ngawl mihingte awng!” ci hi. A mawmawte mun ah:

¹⁷ “A kingu tuidam in thum zaw hi. A kingu anluum in lim zaw hi” ci hi.

¹⁸ Ama ii inn sungah a tumte thi a, a tum sate sia tu in mithi khua, a thukbelna ah a om hunlam tua numeinu ii a theam zawkte in a he bua uh hi.