Paunakte 28 - Syin Chin Bible

¹ Mihing seksolte sia kuama ii del ngawl bulin tai hi, ahihang a thumaan mihing khat in tawpi bangin hang hi.

² Minam khat a maw ciang ngam uk khat zawkciang khat kilaih tu hi. Ahihang ngam khat sia a pilvang, khuangaisun thei lampuite a nei le, thahat tu a, kip tu hi.

³ Mizawngte a zawthawk vawt thunei mihing khat sia lo an a lalsak vui le ngua taw kibang hi.

⁴ Thukham na thusim buale mihing seksolte sangah pang na hi hi; ahizong thukham na ni le amate a langpan na hi hi.

⁵ Mihing ngilote in thukhaikim sia bang ziam ci in a he bua uh hi, ahihang Topa a biate in pha takin tel uh hi.

⁶ Zawng a, thumaan tu sia, hau a thumaan ngawl sangin phazaw hi.

⁷ Thukham a zui khangno khat in mihing pilvang ahi hi. A mannung ngawl ngualtamh a nei pa sia a pa maimawlna ahi hi.

⁸ Mihingte tungah summeet thaakna le ngual duupna taw na hau le na hauna teng mizawngte tungah a thudik khat ii khut sung theng tu hi.

⁹ Thukham na zui buale na thungetnate sia Pathian atu in a ngaimawk huai, a zaak thada suak tu hi.

¹⁰ Mihing thumaan khat a sia vawt tu in na theam le nangma thaang sung ma ah na taaksuk tu hi. Mawbaang ngawlte thaman a pha kipia tu hi.

¹¹ Mihaute sia amate ciim kisa tawntung a, ahihang ngual ii ngamtatzia a thuk a mu thei mizawng khat sia ciimzaw hi.

¹² Mihing phate in ukna za hong nga ciang mihing theampo lungdamin poai khaam uh a, ahihang mihing siate in ngam a uk ciang mihingte buu uh hi.

¹³ Na mawnate seal tu na hanciam le nuntak sungin zawna na nga ngei buatu hi. Mawna pualaak vun a, nusia vun; tuasia ciang Pathian in na tungah hesuakna hong lak tu hi.

¹⁴ Topa thu ni tawntung in, tua hile na lungdam tu hi. Na thin na puisak le siatna sung na theng tu hi.

¹⁵ A seksol ngamuk khat ii lang ah, mizawngte a hu tu a om bua hi; ama sia tawpi hawk le an zongin a vakkot vompui bangin kiitakhuai hi.

¹⁶ Khua ngaisutna pha a nei ngawl ngamuk khat sia a ngilo zawthawk thu taw ngamuk khat ahi hi. Thumaan ngawlna a ngaimaw khat in khuangei mama ngam uk tu hi.

¹⁷ Mihing that pa khat sia ama atu thaankuul a manlang thei za in a to pa ahi hi. Na tho heak vun.

¹⁸ Thumaan le uhte ngammuangin na om tu uh hi. Na thumaan buale thakhat thu in na puk tu hi.

¹⁹ Nasia tak a diang lotho pa in neak tu tam mama nei hi. Hun a bosak thawthong mihingte sia, zawng tawntung tu uh hi.

²⁰ Thumaan mihingte in nuntakna kicing taw lungdamin a nungta tu uh hi. Ahihang hau tu kaal na ngakla uh le daan na thuak tu uh hi.

²¹ Mi doidanna in khialna hi. Ahihang thukhenmang pawlkhat in sumnguk tawmno po deina ngawngawnin a maan ngawlin naseam tu hi.

²² Kaangsung bek a he mihing duhopte in hau tu ngakla in diang ahiciang, zawnna ii vaat tu hun a he bua uh hi.

²³ Khat pawpo pau in hil vun, a zawkciangin ama in sialpokna sangin diksa zaw tu hi.

²⁴ A nu a pate neisa ngukna in mawna in a ngaisun ngawlte sia nguta dangte taw kilamdang ngawl hi.

²⁵ Duhopna in ngimna bek piangsak hi. Topa na muan tu sia phazaw pek hi.

²⁶ Nangma bek ii ngaisutna teng zuina in mawmawtna hi. Ngammuangin om vun a, tuaciang a ciimzawte ii hong hilnate zui vun.

²⁷ Mizawngte pia vun, tua hile bangma hun na kitaangsamh buatu uh hi. A zawngte na en bua uh le mihing tam mama in hong haamsiat tu hi.

²⁸ Mihing pha ngawlte in ukna za a nga ciang mihingte buu uh hi. Ahihang amate a za a taak uh ciang a thutang mite in uk kik tu hi.