Paunakte 2 - Syin Chin Bible

Ciimna ii Tel

¹ Ka tapa awng, kong hilte sin in a, vawt a kong sawlte bangma hunin mangil heak in.

² Ciimna thute ngai in a, tuate heak tu in hanciam in.

³ Hi hi, ciimna ngen in; a thuk mu theina nei natu maangkaa in.

⁴ Ngunn ahizong a kiseal sum manphate ahizong na zon tu bangin nasia takin zong in.

⁵ Tuabangin na ngamta le Topa kiitakna sia bang ziam ci in na he tu a, Pathian thu heakna in na nei tu hi.

⁶ Ciimna a pia sia in Topa hi; ama kung pan heakna le tel theina hong pai hi.

⁷ Ama in huna pia a, thutang, thumaante a sungsia hi.

⁸ Midangte tungah a kilawm tu bangin a ngamtate ama in sungsia a, ama tungah a kipiate ama in cing hi.

⁹ Ka pau nong ngai le, a maan, a tang le a kilawmte na he tu hi. Na vawt tute na he tu hi.

¹⁰ A ciim na suak tu a, na heakna in nopsakna hong pia tu hi.

¹¹ A thuk na mu theina le na telna in nang hong sungsia tu hi,

¹² tuaciang a maan ngawlte na vawt ngawl natu in hong khaam tu hi. Amate pauna taw ngimna a piangsak mite kung panin tuate in hong keam tu hi,

¹³ tuabang mite in thutang nuntakzia nusia in mawna khuazing sungah a teang uh hi,

¹⁴ tuabang mite in a maan ngawl sepna sungah nuamsa a, tuaciang in khiakna nei ngawl siatnate ah thanuam uh hi,

¹⁵ amate sia mihing suantaak ngawl a muan thamman ngawlte ahi uh hi.

¹⁶ Nangma in numei paktat khat po ii kamthum taw hong zolnate na nalh zo tu hi,

¹⁷ ama in a pasal tungah thumaan ngawlin kiciamna thiangthote a mangil nu ahi hi.

¹⁸ Ama inn ah na haw le thina lampi ah khual a hawhaw na hi hi. Tua munah pai tu sia mithi khua a neak na hi hi.

¹⁹ Ama kung a haw peuma hong heak kik ngeingawl hi. Tua pa in nuntakna lampi ah hong kilee kik ngei nawn ngawl hi.

²⁰ Tua ahikom mihing phate lamlaknate zui in thutang nuntakna taw nungta hamtang in.

²¹ Thutang mi, thumaan takkhate, hisung eima ii leitang tungah a nungta tu hi.

²² Ahihang Pathian in mihing seksolte leitung panin dokkhe tu a, hi mawneite leitung panin thingnote baw bangin bot tu hi.