Obadiah 1 - Syin Chin Bible

¹ Hi sia in Obadiah ii kamsaanna — Edom ngam taw kisai Vaanglianpipa, Topa ii thusonte ahi hi. Topa in a kamtaipa minam tuatuamte kungah paisak zo a, tuaciang eite in ama ii thupiakna ih za zo hi: “Kithoai vun! Edom sim tu in kuan tek tawng!” ci hi.

Topa in Edom Daan pia tu

² Topa in Edom tungah, “Na tha kong zawmsak tu a; kuama theampo in nang hong zawngsak tu hi.

³ Na kiphatsakna in nang hong theam zo hi. Na khuapi sia suang taw kivawt kulhpi hi a; na inn sia mualtung a saangna ah om hi, tua ahikom nang le nang ‘Akua peuma in kei hong kaivawk zo tu ziam?’ na kici hi.

⁴ Na inn sia aksi kawmah a om bang na hisak natu in muvanlai bu saanna za in a saangna ah na vawt hial zongin, Keima in kong kaisuk tu hi.

⁵ “Zan in ngutate hong pai ciang, amate in a dei teng bek la uh hi. Mihingte in sapitnga a law uh ciang, amate in a sangh tawm khe tawntung uh hi. Ahizong na ngalte in hong diitmaai zo hi.

⁶ Esau suan le paalte awng, na sumngumte hong kilaaksak zo hi.

⁷ Na kipawlpuite in hong theam zo a; amate in na ngam pan hong notkeak zo hi. Na kilempui minamte in tu in hong zothal zo hi; Na an neak khoppui na lawmte in nang thaang hong sia zo hi; amate in, ‘A pilna teng koi sungah koi ziam?’ hong ci uh hi.

⁸ “Edom daan ka piak ni in, a mipilte ka susia tu a, tuaciang a ciimna theampo ka zutmaai tu hi.

⁹ Teman ii a ngalkapte kilausak vadil tu a, tuaciang Edom a om ngalkap theampo kithatlum tu hi.

Edom Daan piakna ii A hangte

¹⁰ “Jacob ii suan le paal na suapui pate ii neisa suttol in that na hi ciang nang hong kisusia tu a a tawntungin na min hong kidaisak tu hi.

¹¹ Ngalte ii a kongpite a sukthap ni in na tungh nuam bua hi. Jerusalem ii nei le lamh te laaksak a, amate sungah a hawmtham khualmite za ma in nang a sia na hi hi.

¹² Judah ah a om na suapuite kaamsiat a thuak lai in diksa ku buale teh pha hi. Amate ii kisiat ni in na lungdam tu hi ngawl hi. Amate ii ngim nga ciang na nuisan buatu hi.

¹³ Amate ii tuasiat ni in ka mite ii khuapi sungah diksa ku in na tum buatu a, a tuasiat ni in a haunate na sut buatu hi.

¹⁴ Suatak tu a hanciamte a man tu in lamkaa ah na ding buatu hi. Amate ii ngim nga ni in ngalte khut sungah na aap buatu hi.

Pathian in Minamte Thukhen tu

¹⁵ “Keima, Topa in Minamte theampo tungah thu ka khen tu ni nai zo hi. Edom awng, na ngamtatna bangin nang hong kivawt tu hi. Na piak bangin na nga kik tu hi.

¹⁶ Ka mual thiang tungah ka mite in daan khakna hai khaa sia dawn zo hi. Ahizong a kiimkot ah minam theampo in a khaa zawlai daan khakna hai dawn lai tu uh a; a dawn khawng zawkciang mangthang tu uh hi.

Israel ii Ngalzawna

¹⁷ “Ahizong Zion Mual tungah pawlkhatte suakta tu uh a, tuaciang tuasia a thiangtho mun hi tu hi. Jacob mite in amate nga tu ahi a leitang sia tang tu uh hi.

¹⁸ Jacob le Joseph mite meikuang bang hi tu uh hi; amate in Esau mite sia ninteakte mei ii kak bangin susia tu uh hi. Esau suan le paalte khat zongh suakta ngawl tu hi, Keima, Topa pau zo khi hi.

¹⁹ “Judah thangsang mite in Edom la tu a; nitumna sang mualpeang ah a teang mihingte in Philistia la tu hi; Israel mite in Ephraim le Samaria ngam tang tu a; Benjamin mite in Gilead la tu hi.

²⁰ Israel saksang pan saltaang ngalkaphonpi hong heak kik in, Phoenicia sia saksang ah Zarephath dong zothal tu uh hi. Sardis ah Jerusalem pan saltaangte in Judah thangsang khuate la tu uh hi.

²¹ Jerusalem ngalzote in Edom ngam simin, uk tu uh hi. Tuaciang Topa ama mama kumpi hi tu hi,” ci hi.