Nehemiah 9 - Syin Chin Bible

Mipite in A mawnate Pualaak

^1-2 Tua tha ni 24 ni in, a mawnate hangin khuangaina lakna in antang tu in Israel mite kikhawm uh hi. Amate sia ngamdangmite theampo taw kikhen zo uh hi. Amate in a khuangai lakna in khau-ip puan silhin a lu tungah leivui poai uh hi. Tua zawkciang dingin amate le a taanghpupite mawnate a pualaak tu kipan uh hi.

³ Nai thum sung Topa a Pathian ii Thukham teng amate tungah kisim a, tua zawk nai thum sung a mawnate pualaak in, Topa a Pathian bia uh hi.

⁴ Levi te atu in dawtuam khat om a, tua ii tungah Jeshua, Bani, Kadmiel, Shebaniah, Bunni, Sherebiah, Bani le Chenani te ding uh hi. Amate in Topa a Pathian tungah a ngingin thungen uh hi.

⁵ A nuai a Levi te: Jeshua, Kadmiel, Bani, Hashabneiah, Sherebiah, Hodiah, Shebaniah le Pethahiah te in biak sapna sam uh hi. Amate in: “Ding vun a, Topa na Pathian pok vun; a tawntung a tawntungin ama pok vun! mihing pokna sia a cingtaak zo bua zong, a minthang ama min mi theampo in pok tahen.”

Maw Pualaak Thungetna

⁶ Tua zawkciang Israel mite in hi bangin thungen uh hi. “Topa awng, nangma bek Topa na hi a; Vantungte le van a aksite na vawt hi. Lei le tuipi le a sungah, na theampo na piangsak a; nuntakna na pia siat hi. Vantung ah a vaangnei theampote in kun a nang hong bia uh hi.

⁷ Topa Pathian awng, nangma in Abram tealin, Babylon ngam Ur khua pan na paipui a; a min Abraham ci in na kheal hi.

⁸ Na tungah hong thumaanna na mu a, ama taw thuciamna khat na vawt hi. Nangma in Canaan te ngam, Hit te le Amor te ngam, Periz te, Jebus te, Girgash te ngam teng a suan a paalte teenna ngam tu in ama piak tu in kamciam na pia hi. Nangma thumaan na hikom na kamciam na len hi.

⁹ “Egypt ah koma ii taanghpupite ii thuakna na mu a; San Tuipi ah hu hong ngetna na za hi.

¹⁰ Kumpipa, a uliante le a ngammite langpanin nalamdang laknate na vawt hi, banghang ziam cile amate in na mite a zawnsakna na he hi. Tuni dongin na nei minthanna sia tua hunlai pan na nga ahi hi.

¹¹ Na mite atu in tuipi kaantanin lampi khat na vawt a, leiko tungah amate na paipui hi. Tuipi kihual sungah suangtum khat a tumsuk bangin, amate a del a ngalte tuithuk sungah tuitaa uh hi.

¹² Sun in amate meei taw lam na pui a, zanin mei taw a lampite na taangsak hi.

¹³ Vantung panin Sinai Mual tungah na tuaksuk a; na mite paupui in thukham phate le hilna maante na pia hi.

¹⁴ Na Sabbath nite a thianthosak natu in amate na hil a, na naseampa Moses tungtawnin na thukhamte na pia hi.

¹⁵ “Amate a ngilkial ciang vantung pan anluum na pia a, a dangko ciang suang sung pan tui na pia hi. Amate tungah piak tu in na kamciam sa ngam le lei uk tu in amate na sawl hi.

¹⁶ Ahizong koma ii taanghpupite kiphasak in thinpui a, na thupiakte zui tu nial uh hi.

¹⁷ Na thu ni nuam ngawl a; na nasep sate theampo amate in mangil uh hi, na vawtsa nalamdang laknate mangil uh hi. Saltanna Egypt ah a heakpui kik tu in, kiphatsakna taw amate in lampui khat teal uh hi. Ahizong nangma in maw maisak Pathian na hi a; thuthiamna le itna nei in na thin uai hi. Na hesuakna lian a; amate na nusia bua hi.

¹⁸ Amate in khuitalno bang milim khat vawtin Egypt pan a paipui pathian hi ci uh hi! Topa awng amate in bangzata nang hong selno ziam!

¹⁹ Ahizong tualai sennealngam ah amate na nusia bua hi, banghang ziam cile na hesuakna lian hi. Sun le zanin amate lampi a lak tua meei ahibuale tua mei na lakeak bua hi.

²⁰ Na phatna taw a sep tu te na son a; manna taw vaakin a neak tu tui na pia hi.

²¹ Sennealngam ah kum sawmli tawntung a kisap theampo na sik a; a puante sia ngeingawlin, a peangte nasa in tum ngawl hi.

²² “Minamte le kumpi ngamte, amate taw a kingamngi mun le ngamte na zothalsak hi. Amate in Sihon ukna Heshbon ngam le Og ii kumpi a sepna Bashan ngam te zothal uh hi.

²³ Van ah aksite za in amate ta tam mama na pia a, a taanghpupite tungah piak tu in na kamciamsa ngam le lei sia na zothalsak a, tuaciang tua ngam ah na teangsak hi.

²⁴ Amate in Canaan ngam zothal a; nangma in tualai a teang mite na zo hi. Canaan kumpite le a mite tungah, a uuk bang po a vawt natu in na mite vaangletna na pia hi.

²⁵ Na mite in kulh taw a ki uum khuapite, ngamphate, nei le lamh taw a kidim innte, a kito sa tuikhukte, olive kungte, thingnga kungte, le sapithuante la uh hi. Amate in a du a dei theampo ne in thau uh hi; amate in na piak naphate theampo taw lungdamin nuamsa uh hi.

²⁶ “Ahizong na mite in nang hong leedo a, na thu hong nial hi; amate in na Thukham nungngat uh hi. Amate in nangma kung hong heak kik natu a son, a kidop thei natu in thu a pia kamsaangte that uh hi. Amate in hun khat zawk hun khat nang hong simmaw uh a,

²⁷ tua ahikom a ngalte in na zothalsak a, na uksak hi. Ngim nga in, na hu tu dei a nang hong ko uh ciang, vantung panin na zo hi. Na hesuakna lianpi taw lampuite na puak a, amate in a ngalte khut sung pan suatak uh hi.

²⁸ Kilemna a om kik ciang amate hong khial kik a, a ngalte in amate na zothalsak kik hi. Ahitazong amate kisiik kikin, hut tu hong nget ciang vantung pan na za a, hun khat zawk hun khat na hesuakna lian taw amate na suatak hi.

²⁹ Na hilnate ni in a kidop natu thu na pia a, ahizong na Thukham zuina in nuntakna lampi hi napi, amate kiphasak a, na thukhamte nial uh hi. Amate a thin sahin a thinpui a, thu ni ngawl uh hi.

³⁰ Kum khat zawk kum khat amate kidop natu thinsau takin na hil hi. Na kamsaangte thinsung ah a thuson tu na hil a, ahizong na mite in nangonthaak ahikom, minam dangte in amate na zothalsak hi.

³¹ Ahitazong na hesuakna lian ahikom amate na nusia bup bua a, na lalsak bua hi. Nang sia hesuakna le thuthiamna a nei Pathian na hi hi!

³² “Oh, Pathian, kote Pathian awng, bangzata lian ni ziam! Bangzata kiitakhuai a, bangzata na vaanglian ziam! Na thuciamte thumaan takin na len hi. Assyria kumpite ii kote hong nencip hun pan kipan, tu dong ciang ngawngawn bangzata ngimna thuak khu ziam! Koma ii kumpite, lampuite, thiampite le kamsaangte, taanghpupite le mite theampo in ngimna thuak uh hi. Bangzata ngim nga zo khu ziam hong phawk ta'n!

³³ Kote daan nong piak sia nong piak tu ma hi a; kote maw kale ung zongh nang na thumaan hi.

³⁴ Koma taanghpupite, kumpite, lampuite le thiampite in na Thukham zui ngawl uh hi. Amate in na thupiakte le a kidop natu thu te ngai ngawl uh hi.

³⁵ Amate na piak ngamzai le kamsaangte, ngampha na ah a teen ciangin, na thupha piakna taw kumpite in na mite uk hi; ahizong amate in a mawna a khialna kisiik ngawlin, na na seam ngawl uh hi.

³⁶ Tu in nong piakna ngam, kote an hong vaak, hi ngampha ah sila ka suak uh hi.

³⁷ Ngamsung pan a piang peuma kumpite kipia a, kote mawnei ka hi uh kom, amate in nong uksak hi. Amate in ko le ka ngannote a uuk bang po in hong vawt uh a, kote ka khuangai mama uh hi!”

Mipite in Thukimna Minthu

³⁸ Hi thupiangte theampo hangin ko Israel mite in ciliap huai takin thukimna lai khat ka vawt uh a, tuaciang koma ii lampuite, Levi te le thiampite in tua lai tungah a tazeik uh tum hi.