Nehemiah 2 - Syin Chin Bible

Jerusalem ah Nehemiah Pai

¹ A tha li zawk ni khat ni in Artaxerxes kumpilianpa ii an a neak laitakin sapittui ka pia hi. Ama in nidang in ka hee maipuak hong mu ngeingawl ahiciang,

² ama in, “Banghangin hee tuak mama ni ziam? Na ci le na ngawl ahiciang na thin nop ngawlna om hi tu hi,” ci in hong dongh hi. Ka patau a,

³ “Kumpipa awng, na khansau tahen! Ka taanghpupite a kiphumna khuapi laltham a, a kongpite kaanghtum siatin a om laitak bangbangin khuangai ngawlin om thei tu khi ziam?,” ci in ka zo hi.

⁴ Kumpilianpa in, “Na dei sia bang ziam?” ci in hong dongh hi. Vantung Pathian tungah thu ka nget zawkciang,

⁵ kumpilianpa tungah, “Kumpipa awng kei tungah nong lungkim a, kong ngetna nong pia nuam le ka taanghpupite kiphumna khuapi ka pua kik thei natu in Judah ngam ah hong paisak ta'n,” ka ci hi.

⁶ Kumpilianpa in kumpiliannu taw tokhawm a, ka ngetna hong saang hi. Ama in bang tanvei ngei tu a, bang hun ciang hong heak kik tu ni ziam ci in hong dongh a, ka son hi.

⁷ Tua zawkciang, nong hesuak zo le Judah ngam dong hong paisak thei natu in Euphrates Nitumna sang ngamukmangte tungah lai hong thaaksak ta'n, ci in ka ngen hi.

⁸ Kumpi thingtaamte a keam pa Asaph tungah Biakinnpi cinna kulh kongpite, khuapi luphungte le ka teen natu ka innthingte atu in thing hong piak natu zongh lai hong thaaksak natu ka ngen hi. Pathian in kei hong ompui ahikom ka nget theampo kumpilianpa in hong pia hi.

⁹ Kumpilianpa in keima taw ngalkapbu pawlkhat le siphu ngalkap pawlkhat hong paisak a, Euphrates Nitumna ngam ah khual ka haw uh hi. Tualai ah kumpilianpa ii laithakte ngamukmangte tungah ka pia hi.

¹⁰ Ahizong Beth Horon khua pan Sanballat le Ammon ngamkhen pan ulian Tobiah in Israel mite ii phattuam natu in na a seam tu mihing khat hong pai ci thu a zaak uh ciang thin uuk mama uh hi.

¹¹ Jerusalem ah ka paisuak a, ni thum sung

¹² Jerusalem atu in ka nasep tu Pathian ii hong heaksak thute kuama tungah ka son bua hi. Tuaciang zankim laitakin tho in ka pusuak a, ka lawmte pawlkhat ka paipui hi. Keima tona laa sia ngawl buang nganhing dang ka keng bua uh hi.

¹³ Zan lai ma in khuapi nusia in nitumna sang Kuam Kongpi tawnin thangsang Ngulpui Tuinaak kaantan in Ninthuk Kongpi ah ka pai hi. Ka pai kawmin khuapi luphung cimhthamte le mei ii kak kongpite ka en kawkoai hi.

¹⁴ Tuaciang khuapi nisuana sang pan saksang Tuinaak Kongpi le Kumpipa Tuili ah ka pai hi. Ka tona laa sia in suangkawm ah lampi mu zo ngawl ahikom,

¹⁵ Kidron kuam ah ka tuaksuk a, laa tung to kawmin luphung ka en hi. Tuaciang ka paina lampi tawnin ka heak kik a, Kuam Kongpi kaantan in khuapi sungah ka tum kik hi.

¹⁶ Tualsung uliante khat zongh in ka omna mun ahibuale ka nasepte he ngawl hi. Jew ka mipuite — thiampite, lampuite, uliante, ahibuale nasepna ah hong kihel mihing khat pawpo tungah tu dong bangma ka son bua hi.

¹⁷ Ahizong tu in amate tungah, “Jerusalem lalcip in a kongpite kisusia ahikom ih ngim ngana teng en vun! Khuapi luphungte ciang kikin ih minsiatna teng bosak tawng,” ka ci hi.

¹⁸ Tuaciang amate tungah Pathian ii kei hong ompuina a hong panpuina le kumpilianpa ii kei tungah hong ci teng ka son hi. Amate in, “Puua kik tu nasep kipan tawng!” hong ci kik hi. Tuaciang amate nasep kipan tu in kithoai uh hi.

¹⁹ Sanballat, Tobiah le Arab mi Geshem in sep tu ka ngealna te a zaak uh ciang amate in hong nuisan a, “Bang teng sep sawm nu ziam, kumpilianpa langpan tu nu ziam?” hong ci uh hi.

²⁰ Keima in, “Vantung Pathian in kote zawna hong pia tu hi. Kote ama naseamte hi a, nasep ka kipan tu uh hi. Ahizong note in Jerusalem ah neisa te taw kisai in thu na nei bua uh a, tuaciang a taanghthute sungah no kihelna uh om ngawl hi,” ci in ka zo hi.