Mi Simna 36 - Syin Chin Bible

Pasal nei Numeite ii Ngamhluana

¹ Joseph ii tapa ahi Manasseh ii tupa, Machir ii tapa le Gilead bee le phung sung innkuan lutang teng sia, Moses le lampui dangte kungah pai hi.

² Amate in, “Topa in ngam le lei Israel mite tungah lai meetang sawk a hawmsak tu in note thu hong pia hi. Ama in no tungah ka suapuipa uh Zelophehad ii neisa teng a tanute piak natu in thu hong pia si hi.

³ Ahizong a tanute in nam dang taw a kiteang le, a neisate tua nam dangte neisa suak tu a, ko ii nga tu theampo kikhiam tu ahi sia phawk vun.

⁴ Kipiak kikna Jubilee kumin, a kizuaksa theampo a nei ciilte tungah a kipiak kik ciang, Zelophehad tanute neisa sia a teenna nam ii neisa belapna hi paisuak tu a, ko nam ii supna hi tu hi,” ci uh hi.

⁵ Tua ahiciang Moses in Israel mite tungah Topa ii Thupiak om bangin thupia sawn hi. Ama in, “Manasseh namte ii a ci teng maan hi.

⁶ Tua ahiciang Topa in Zelophehad tanute in a dei po teenpui thei tu hi, ahizong amate nam sung pan bek hi tu hi, ci hi.

⁷ Israel mi peuma ii neisate ama ii nam sungah kip tu hi.

⁸ Israel nam khat sungah ngamhlua numei peuma in tua nam sung pan pasal khat teenpui hamtang tu hi. Tu a bangin Israel mikim in a taanghpupite neisa teng lua tu a,

⁹ nei le lam sia minam khat pan nam dang khat tung theng ngawl tu hi. A neisate a nam tek in neisuak tu uh hi,” ci hi.

^10-11 Tua ahiciang Zelophehad tanute, Mahlah, Tirzah, Hoglah, Milcah le Noah te in Moses tungah Topa thupiak bangin a suapui sealhte teenpui uh hi.

¹² Amate in Joseph tapa Manasseh nam ii bee le phungte taw kiteang uh a, a neisate a pa ii nam sungah kip hi.

¹³ Hite sia Jericho khua pan Jordan Ngun ngalkhat Moab zaangtam ah Topa ii Moses tungtawnin a piak Israel mite zui tu ngeinate ahi hi.