Mi Simna 34 - Syin Chin Bible

Ngam le Lei ii Ngamngite

¹ Topa in Moses tungah,

² Israel mite atu in a nuai a hilnate pia hi: “Keima kong piak Canaan ngamsung na tum uh ciang na ngamngi uhte a nuai a bang hi tu hi.

³ Thangsang ngamngi sia Zin duisung pan kipan tu a, Edom ngamngi dung zui in pai tu hi. Nisuana sang ngamngi sia Tuipi Thi thangsang mong pan kipan tu hi.

⁴ Tuaciang thangsang zuan in Akrabbim Mualciangh sangah kotin Zin kaantan suak tu a, thangsang Kadesh Barnea dong kipee hi. Tuaciang nitumna saksang zuan in Hazar Addar ah paito a, Azmon dong hi tu hi,

⁵ tua mun pan Egypt ngamngi kuam sangah kot tu a, Mediterranean ah tawp tu hi.

⁶ “Nitumna sang ngamngi sia Mediterranean Tuipi hi tu hi.

⁷ “Saksang ngamngi sia Mediterranean pan Hor Mual dong kithung tu a,

⁸ tua mun pan Hamath Mualciangh dong hi tu hi. Tuasia Zedad le

⁹ Ziphron dong paisuak in Hazar Enan ah tawp tu hi.

¹⁰ “Nisuana sang ngamngi sia Hazar Enan pan Shepham dong kithung tu hi.

¹¹ Tuasia Ain ii nisuana, thangsang ah a om Harbel ah pai tu a, Galilee Tuili vaalbo nisuana sang mualte tungah pai in,

¹² tuaciang Jordan ngun zui in thangsang Tuipi Thi dong hi tu hi. Hite sia na ngam king li ii ngamngi hi tu hi,” ci hi.

¹³ Tua ahiciang Moses in Israel te tungah, “Hi ngam sia Topa in nam kua le langte tungah a piak ngam hi a, lai meetang sawkin na nga tu uh hi.

¹⁴ Reuben le Gad namte le nisuana sang Manasseh nam a khenlangte in,

¹⁵ Jordan ngun langkhat nisuana sang Jericho ngalkhat ah amate innkuante taw kizui in ngam hawm siat zo uh hi,” ci hi.

Ngam Hawmna ah Vaipuak nei Lampuite

¹⁶ Topa in Moses tungah,

¹⁷ “Thiampi Eleazar le Nun tapa Joshua in mipite atu in ngam hawmsak tu hi.

¹⁸ Ngam hawmna ah amate hu tu in, a nam sim pan lampui khat veu teal in,” ci hi.

^19-28 Hite sia Topa ii teal mite hi: Anam Lampui Judah Jephunneh ii tapa Caleb Simeon Ammihud ii tapa Shelumiel Benjamin Chislon ii tapa Elidad Dan Jogli ii tapa Bukki Manasseh Ephod ii tapa Hanniel Ephraim Shiphtan ii tapa Kemuel Zebulun Parnach ii tapa Elizaphan Issachar Azzan ii tapa Paltiel Asher Shelomi ii tapa Ahihud Naphtali Ammihud ii tapa Pedahel

Anam Lampui

²⁹ Hi mite sia Canaan ngam ah Israel mite atu neisa hawm tu in Topa sawlte ahi hi.