Mi Simna 27 - Syin Chin Bible

Zelophehad ii Tanute

¹ Joseph tapa Manasseh, Manasseh tapa Machir, Machir tapa Gilead, Gilead tapa Hepher, Hepher tapa, Zelophehad ii tanute sia Mahlah, Noah, Hoglah, Milcah le Tirzah te ahi hi.

² Amate pai in Moses, thiampi Eleazar, lampuite le taangpi bup ii mai, Topa ompuina Puanbuk kongbiang ah ding a,

³ “Ka pa uh in tapa nei ngawlin duisung ah hong thi san hi. Ama sia Topa a langpan Korah ii nungzuite sungah kihel ngawl a; ama mawna hangin thi hi.

⁴ Tapa a nei ngawl hu bekin ka pa ii min banghangin Israel sung pan bo tu ziam? Kote ii pa ii mealheakte taw in ko zongh ngamh hong pia tavun,” ci hi.

⁵ Moses in amate thu Topa tungah ko a,

⁶ tuaciang Topa in,

⁷ “Zelophehad tanute ii ngetna maan hi; a pa mealheakte taw in ngamh piakhawm in. A pa ngamh amate in lua tahen.

⁸ Pasal khat in tapa nei ngawlin a thi ciang a tanu in a neisa lua tu hi, ci in Israel mite son in.

⁹ Ama in tanu a nei buale ama ii suapui pate in lua tu hi.

¹⁰ Ama in suapui pa a nei buale, a pa ii suapui pate in lua tu hi.

¹¹ Ama in suapui pa ahibuale papi, pano a nei buale a bee kuungbel khat in lua tu a, ama ii neisa suak hi. Hi thu sia Keima Topa ii kong thupiak hi a, Israel mite zui tu thukham ahi hi,” ci hi.

Moses a lai tu in Joshua Kiteal

¹² Topa in Moses tungah, “Abarim Mualte tungah kaato in a, Israel te ka piak tu ngam le lei sia ngal et in.

¹³ Tuasia na mu zawkciang na suapuipa Aaron thi bangin na thi tu hi,

¹⁴ banghang ziam cile Zin duisung ah kong thupiak sia noma ngeal in nong langpan uh hang hi. Meribah ah Israel taangpi bup in keima hong phutsat lai in, a thiangtho ka vaangletna amate mai ah ahi tubangin nong saang nuam bua uh hi,” ci hi. (Meribah sia Zin duisung Kadesh khua ah a om ciktui naak ahi hi.)

¹⁵ Moses thungen a,

¹⁶ “Nuntakna theampo ii naak ahi Topa Pathian awng,

¹⁷ na mipite tuucing nei ngawl tuute bang ahi ngawl natu in a lampui thei tu le ngal kisimna ah thu a pia thei tu mihing khat nong tealsak natu in, thu kong ngen hi,” ci hi.

¹⁸ Topa in Moses tungah, “Kicinna a nei Nun tapa Joshua sam in, a lu tungah na khut nga in.

¹⁹ Thiampi Eleazar le taangpi bup mai ah ama dingsak in a, amate theampo ii mai ah nangma hong laih a hina thu thangsak in.

²⁰ Israel taangpi bup in a thu a nit thei natu in, na thuneina pawlkhat ama pia in.

²¹ Joshua in thiampi Eleazar suang tu a, Eleazar in keima deina a heak natu in Urim le Thummim zangh tu hi. Tuabangin Joshua le Israel taangpi bup sia thu theampo ah Eleazar in vaihawm tu hi,” ci hi.

²² Topa thupiakna bangin Moses in seam hi. Ama in Thiampi Eleazar le taangpi bup mai ah Joshua dingsak hi.

²³ Topa thupiak bangin Moses in Joshua lu tungah a khut nga in, ama a laih a hina thu thangsak hi.