Mi Simna 16 - Syin Chin Bible

Korah, Dathan le Abiram te ii Leedona

^1-2 Levi mi Kohath bee le phung pan Izhar tapa Korah in Moses ii lampuina langpanin leedo hi. Ama sia Reuben nam mihing thumte — Eliab tapate Dathan le Abiram, le Peleth tapa On — tuaciang mihonpite ii teal a minthang Israel lampui 250 te in pawlpui hi.

³ Amate teng Moses le Aaron mai ah kikhawm in, amate tungah, “Pai leet zo nu hi! taangpi theampo Topa aa hi a, eite theampo taw Topa omkhawm hi. Tua hikasap Moses awng banghangin Topa ii taangpite tungah om in thu kineisak tuan ni ziam?” ci uh hi.

⁴ Moses hi thu a zaak ciang lei ah kilumliik in thungen hi.

⁵ Tuaciang ama in Korah le a nungzuite tungah, “Zing ciang zingsang in Topa in ama mihing sia akua ziam ei hong lak tu a; ama in a teal sa, a mi sia biaknatau ah ama kung neaksak tu hi.

^6-7 Zing ciang zingsang in nangma le na nungzuite in meikam kuangte kengin tuate sungah meikam le ngimnamtui koi in, biaknatau ah paipui vun. Tuaciang Topa in eite akua hong teal ziam ci ih mu tu hi. A pai leet sia noma Levi te na hi uh hi!” ci hi.

⁸ Moses in Korah tungah a thuson zomin, “Levi mite awng, ngai vun!

⁹ Ama kung na neak thei natu, Topa Puanbuk sungah na nasep thei natu uh le taangpite atu na a seam tu in Israel te ii Pathian in taangpi dang teng sung pan note hong tuam koina thu sia thuno in ngaisun nu ziam?

¹⁰ Ama in nang le a dang Levi mi theampo hi bang hong upat zo a — tu in thiampi za zongh nga nuam in hanciam nu ziam!

¹¹ Aaron na phutsat uh ciang a tatakin ci leang nangma le na nungzuite in Pathian langpan na hi uh hi,” ci hi.

¹² Tuaciang Moses in Dathan le Abiram sam a, ahizong amate in, “Hong pai bua vak ung!

¹³ Hilai duisung ah a thi tu in Egypt ngamnuam pan nong pusuapui sia pha zo hi ngawl ziam? Kote tungah to hong seam nuam lai ni ziam?

¹⁴ Ngamnuam leiphana ah nong paipui bua het a, kote neisa tu in lote le sapithuante zongh nong piak ngawl banah tu in theam tu hong hanciam lai ni hi. Hong pai bua vak ung!” ci uh hi.

¹⁵ Moses thin uuk in Topa tungah, “Hi mihingte ii hong ken biakpiakna khat zongh saang heak in. Amate khat tungah zongh ka khial ngei bua a; a laate khat zongh ka laaksak ngei bua hi,” ci hi.

¹⁶ Moses in Korah tungah, “Zing ciang Topa ompuina Puanbuk ah nangma le na nungzui 250 te hong pai nanak tu nu hi; Aaron zongh tua munah om tu hi.

¹⁷ Na meikamkuang tek kengin, a tungah ngimnamtui buakin, biaknatau ah pia tu nu hi ci hi.

¹⁸ Tuaciang a meikamkuang keng tek a, meikam le ngimnamtui a tungah koi in Puanbuk kongbiang ah Moses le Aaron taw ding uh hi.

¹⁹ Tua zawkciang Korah in taangpi bup kaikhawm in amate Puanbuk kongbiang ah Moses le Aaron maingat in ding uh hi. Thakhat thu in Topa ompuina khuavak taang velvol sia taangpi bup tungah kilangh a,

²⁰ Topa in Moses le Aaron tungah,

²¹ “Hi mihingte kung pan nungkin vun, thakhat thu amate thatlum tu khi hi,” ci hi.

²² Ahizong Moses le Aaron lei ah kunsuk a, “Aw, Pathian awng, nuntakna theampo ii naak na hi hi. Mihing khat a maw a khial ciang taangpi bup tungah thin uuk ni ziam?” ci uh hi.

²³ Topa in Moses tungah,

²⁴ Mipite sia Korah, Dathan le Abiram te ii buk pan a kikhiin natu in son in,” ci hi.

²⁵ Tuasia ciang Moses sia Israel lampuite in zui in, Dathan le Abiram kungah pai hi.

²⁶ Moses in mipite tungah, “Hi mi seksolte buk pan kiheam vun a, a neisa khat zongh tham heak vun. Tuabang na hi bua uh le a maw a khialnate hangin amate taw hong kimaimot khawm tu hi,” ci hi.

²⁷ Tua ahiciang Korah, Dathan le Abiram te ii buk pan amate kiin uh hi. Dathan le Abiram hong pusuak in a buk kongbiang ah a zite le a tate taw dingkhawm uh hi.

²⁸ Moses in mipite tungah, “Hi bang teng seam tu in Topa in kei hong sawl a, keima deiteal bangin a seam ka hi ngawlna thu na heak natu uh ahi hi.

²⁹ Pathian daan pawlkhat thuak ngawlin hi mite thi ngeina in, a thi le Topa hong sawl ka hi buatu hi.

³⁰ Ahizong Topa in a kiza ngeingawl thu khat a sepna taw in amate le a neisa theampo sia lei in valh ahi hu in amate a hingtangin mithi khua a zot ciang amate in Topa nial a hina thu na he tu uh hi,” ci hi.

³¹ Hi thu teng a son zawk po ciang Dathan le Abiram dinna leitang kihongin

³² amate le a innkuanpuite, Korah nungzui theampo le a neisate theampo taw valh siat hi.

³³ Tuabangin, a neisa theampo taw a hingtangin mithi khua zuansuk uh hi. A tung pan lei in huk a, amate bomang siat hi.

³⁴ Amate auna aw a zaak ciang tualai a om Israel mipite theampo tai siat uh hi. Amate in, “Tai vun! Ei zongh lei in hong valhlum tha tu hi!” ci in au uh hi.

³⁵ Tua zawkciang Topa in mei puak a, ngimnamtui a pia mi 250 te sia a meileng in haltum hi.

Meikamkuangte

³⁶ Tuaciang Topa in Moses tungah,

³⁷ “Thiampi Aaron tapa Eleazer tungah taau meikamkuangte thiangtho ahikom mei ii kaklup mithi luangte kung pan taau meikamkuangte heam tu le tua kuangte pan meiholte mundang ah thethaang tu in son in.

³⁸ Tuate Topa biaknatau ah a kipiak ciang a thiangtho suak hi. Tua ahiciang a mawna hangin thina a thuakte ii meikamkuangte la in biaknatau sit natu in pakan a paa in seak in. Hisia Israel mipite kidop natu thu hi tu hi,” ci hi.

³⁹ Tua ahiciang thiampi Eleazar in meikam kuangte la a, biaknatau sit natu in pakan a paa in seaksak hi.

⁴⁰ Hi thu sia Aaron suan le paal simngawl kuama in biaknatau ah Topa atu in ngimnamtui hal in a pai ngawl natu, Israel te kidop natu ahi hi. Tua bangin a kidawm buale Korah le a mite bangin kithatlum tu hi. Moses tungtawnin Topa ii Eleazar tung, a thupiak bangin hite theampo kiseam hi.

Aaron in Mipite Hun

⁴¹ A zing ciang taangpi bup in Moses le Aaron phunsan a, “Topa ii mihing pawlkhat that zo nu hi,” ci hi.

⁴² Moses le Aaron langpan tu in a kikhop zawk, amate teng Puanbuk sang a maingat ciang, meei in Puanbuk tuam a, Topa ii ompuina khuavak taang velvol sia mu uh hi.

⁴³ Moses le Aaron pai in Puanbuk mai ah ding uh a,

⁴⁴ Topa in Moses tungah,

⁴⁵ “Hi mihingte kung pan kiheam vun, amate thakhat thu in thatlum siat tu khi hi!” ci hi. Amate nii lei ah kunsuk in,

⁴⁶ Moses in Aaron tungah, “Na meikam kuang la in a, biaknatau pan meikamte a sungah koi in, tua tungah ngimnamtui buak in. Tuaciang manlangin mihingte kungah paipui in, amate atu a zeksa thiansuana vawt in. Manlang in! Topa a thin uuk keak zo a, natna ngilo sia kipan zo hi,” ci hi.

⁴⁷ Aaron in a thu ni a, a meikamkuang la in mihonpite kikhopna laizang ah tai hi. Tua natna kipan zo ci in a mu ciang, Aaron in meihol tungah ngimnamtui buakin mihonte atu in a zeksa thiansuana vawt hi.

⁴⁸ Tua in natna ngilo sia vengsak a, a thi le a hingte kilaklaw ah Aaron ding hi.

⁴⁹ Korah ii leedona sungah a thite sim ngawlin a thi 14,700 pha hi.

⁵⁰ Natna ngilo a ven zawkciang Moses omna Puanbuk kongbiang ah Aaron heak kik hi.