Micah 3 - Syin Chin Bible

Micah in Israel ii Lampuite Sonsia

¹ No, Israel a ukte awng, ngai vun! Note in thumaan thutang dei tu hong kimuangmaw hi,

² tua hi napi, note in a phate ngaimaw in a siate na it uh hi. Ka mite a hingtangin a vun hoai in, a ngute tung pan a sa na sem uh hi.

³ Ka mite na netum uh hi. A vun hoai in, a ngu siiktanin beal sung huan tu sa bangin na sem uh hi.

⁴ Topa tungah na ko tu hun hong theng tu a, ahihang ama in hong zo ngawl tu hi. Note thungetna ama in hong ngai ngawl tu hi, banghang ziam cile a sia na vawt uh hi.

⁵ Sum a pia zote tungah kilemna om tu hi ci in kamciam pia a, ahihang a pia zo ngawlte tungah ngal om tu hi ci in a tawng kamsaangte ii theamna sia ka mite in thuak hi. Hi kamsaangte tungah Topa in,

⁶ “Kamsaangte awng, na ni uh bo dektak hi; no tungah ni tum tu hi. Ka mite lam khialsak na hi uh ciang kamsaan mukholnate na nei nawn buatu uh a, bangma na sonkhol thei nawn buatu uh hi.

⁷ Mailam atu a sonkholte, a son bang a taangtut ngawl hu in minsia tu uh hi. Amate theampo ki enthaw tu hi, banghang ziam cile Pathian in amate ci bangin zo ngawl hi.

⁸ Ahihang kei ka hile Topa in a thaa le a vaangletna taw hong dim a, thukhaikim heak theina le Israel mite tungah amate mawna khialna teng son ngam natu hanna hong pia hi.

⁹ Thukhaikim ngaimaw in, a maan sia a khial a sua, no Israel ngamukte awng, hong ngai tavun.

¹⁰ Pathian khuapi Jerusalem sia mihing thalupna le thutan ngawlna tawdap tungah na sa uh hi.

¹¹ Khuapi ukte in sumnguk neak natu in uk a, thiampite in thaman nga natu in Thukham pheen a, kamsaangte in sum nga natu in thupualaakna pia hi — a vekpi ma in Topa in amate ompui hi ci tek hi. Amate in “Ko tungah siatna hong theng ngawl tu hi. Topa in ko hong ompui hi,” ci uh hi.

¹² Tua ahikom note hu in Zion sia lo khat bangin kitho tu a, Jerusalem sia nin kholna suakin, Biakinnpi mual sia dui suak tu hi.