Matthew 9 - Syin Chin Bible

Jesus in Pumzaw khat Damsak

¹ Jesus in ngunkuang tungah to kik in tuili langkhat ama khuapi ah cia kik hi.

² Tua munah mihing pawlkhat in pumzaw pasal khat lupna tungah a lum sa in, Jesus kungah hong paipui uh hi. Jesus in amate upna bangza lian ziam ci in a mu ciang, pumzaw pa munah, “Na thin kiliansak in, ka tapa awng. Na mawna hong kimaisak zo hi,” ci hi.

³ Tuasia ciangin Thukham hil syate pawlkhat in, “Hisia pa in Pathian zawnsakna kampau hi,” ci in phun uh hi.

⁴ Jesus in amate thinsung a ngaisut uhte he ahikom, “Banghangin tuabang thinsiatnate ngaisutin nei nu ziam?

⁵ ‘Na mawna hong kimaisak zo hi,’ ci le ‘tho in a lampai in,’ ci koisia ol zaw ziam?

⁶ Mihing Tapa in leitung ah mawmaisak theina thu nei hi, ci in kong lak tu hi,” ci hi. Pumzaw pa munah, “Tho in, Na luppha luakin, na inn ah cia ta'n,” ci hi.

⁷ Pasal pa tho in a inn ah cia hi.

⁸ Mihonte in a mu uh ciangin liinglawng uh a, mihingte tungah tuabang thu nei theina a piak hu in, Pathian pok uh hi.

Jesus in Matthew Sam

⁹ Jesus in tua mun nusia in lamdung zui in a pai laitak Matthew a kici shiadong khat a zum sungah a to mu hi. Tua pa munah, “Hong zui ta'n,” ci hi. Matthew zongh dingin zui hi.

¹⁰ Jesus Matthew inn ah an ne in a om laitak, shiadong tam mamate le a dang a kipuavawk te hong pai a, Jesus le a nungzuite taw an nekhawm uh hi.

¹¹ Hi bangin a om uh, Pharisee te pawlkhat in mu a, “Banghangin na Syapa uh hi bang mihingte taw an nekhawm ziam?” ci uh hi.

¹² Jesus in za a, “Mihing a ciidamte in syavuan kisamh ngawl a, ciinate bek in kisamh uh hi.

¹³ ‘Sangaw biakpiakna ka dei bua a, cikna thuthiamna bek ka dei hi,’ ci laithiangtho ii khiakna sia kan phot tavun. Mihingphate sam tu in kong pai bua a, mawneite sam tu in kong pai hi,” ci in zo kik hi.

An tanna huvau Dokna

¹⁴ Tua zawkciang, Tuiphumpa John nungzuite hong pai a, Jesus tungah, “Ko le Pharisee te in an tang nithi a, banghangin na nungzuite in an tang ngawlhet ziam?” ci in dongh uh hi.

¹⁵ Jesus in, “Mopoai sungah zi neipa a om lai teng a leangnate khuangai thei tu in na um uh ziam? Ni khat ni ciang zi neipa amate sung pan kila tu a, tuasia ciang amate an tang tu uh hi.

¹⁶ “Kuama in laktong puasilh luisa khat puanbek thak taw phaw ngeingawl hi. Tuabangin phaw le puan thak sia hong ton tu a puan lui sia, ekkeak seseam tu hi.

¹⁷ Tuabang ma in savun thawl lui sungah sapittui a thak kithaal ngeingawl hi, banghang ziam cile sapittui in savun thawl hong saantham tu hi. Sapittui buakeak in a thawl lalcip tu hi. Tua hi ngawl zaw in, sapittui a thak sia savun thawl thak sungah kithaal le a nii ma in lal ngawl tu hi,” ci hi.

Ulian khat ii Tanu le Jesus Puanmong A Tham Numei

¹⁸ Jesus in hi bang a pau laitakin, Jew ulian khat hong pai a, a mai ah khupdin in, “Ka tanu a thi zawk hiat bek ahi hi. Ahitazong hong pai lete a, ama tungah na khut nga lete, ama nungta kik tu hi,” ci hi.

¹⁹ Tuasia ciang Jesus dingin ama zui a, nungzuite in tonpui uh hi.

²⁰ Kum sawm le kum nii tawntung chibua natna a vei numei khat Jesus nung pan hong pai a, a puanmong tham hi.

²¹ “A puan bek ahizong tham leng dam tu khi hi,” ama le ama kici hi.

²² Jesus hong kingeilee kik a, numei sia a mu ciangin, “Na thin kiliansak in, ka tanu awng! Na upna in hong damsak zo hi,” ci hi. Tua hun lianin, numeinu dam thiang hi.

²³ Tua zawkciang Jesus ulianpa inn sungah tum hi. Mithi vui tu music thiamte le a ngamlum lialua mihonte a mu ciang,

²⁴ “Na vekpi pusuak vun. Numeino sia thi ngawl hi, a mu hi bek hi,” ci hi. Tuasia ciangin amate in Jesus nuisan uh hi.

²⁵ Ahihang mihonte a kipusuasak siat zawkciang, numeino ii inndoi tuam sungah Jesus tumin a khut a let ciangin, numeino thoto hi.

²⁶ Hi thu huvau tua ngamkhen sung bup ah thang hi.

Jesus in Mittawte Nii Damsak

²⁷ Jesus in tua mun nusia in a pai ciang, mittaw niite in ama zui tu in kipan uh hi. “David Tapa awng, ko hong hesuak ta'n,” ci in au uh hi.

²⁸ Jesus inn sungah a sungtan zawkciang, mittaw nii ama kungah hong pai a, Jesus in, “No hong damsak thei tu in nong um uh ziam,” ci in dongh hi. “Topa, hong um ung,” ci uh hi.

²⁹ Tuasia ciangin Jesus in, a mitte thamsak a, “Na up uh bangin piang tahen!” ci hi.

³⁰ Tuasia ciangin amate in khuamu thei uh hi. Jesus in, “Hi thu kuama tungah son heak vun,” ci in nasia takin khaam hi.

³¹ Ahihang amate pai in, Jesus thu, tua ngamkhen bup sungah kizel in thangsak uh hi.

Jesus in A Pau thei ngawl Pasal khat Damsak

³² Mittawte a pai zawkciang mihing pawlkhat in, doaivei in a pau thei ngawl pasal khat Jesus kungah hong paipui uh hi.

³³ Ahihang a doai a kinawkeak zawk po ciangin ama hong pau paih a, a om theampo in lamdang sa uh hi. “Hi bang peuma Israel ngam sungah mu ngei bua hing!” ci uh hi.

³⁴ Ahihang Pharisee te in, “Jesus tungah doaite nawkeak thei natu vaang a pia sia in doaimangpa ahi hi,” ci uh hi.

Jesus in Mihingte Hesuak huai sa

³⁵ Jesus in khuapi khuanote ah vakkotin haw kawkoai hi. Synagogue te ah hilna nei in Kumpingam Lungdamna Thu, thuhil in nei a, natna satna namcin le ciluang natna damsak hi.

³⁶ Mihonte a et ciangin, hesuakhuai sa hi, banghang ziam cile tuucing om ngawl tuuhonte bangin, amate thinngim cimaw in, om uh hi.

³⁷ Tua ahikom nungzuite munah, “Anlaak tu tam mama a, ahihang lo sungah anla tu, mi tawm hi.

³⁸ Tua ahikom anneipa tungah, anla tu mi tam mama hong sawl natu, thu na ngen vun,” ci hi.