Matthew 1 - Syin Chin Bible

Jesus Christ ii Taanghpupite

¹ Abraham ii suan, David ii tu le ta ahi, Jesus Christ ii taanghpupite ii min tepteena lai sia hi bang hi a, Abraham pan David kumpipa dong, a taanghpupite ii minte a nuai a bang ahi hi.

² Abraham ta Isaac, Isaac ta Jacob, Jacob ta Judah le a suapuite ahi hi.

³ Judah in a zi Tamar taw Perez le Zerah hing a, Perez ta Hezron, Hezron ta Ram,

⁴ Ram ta Amminadab, Amminadab ta Nahshon, Nahshon ta Salmon,

⁵ Salmon ta Boaz hi. Boaz ii nu sia Rahab ahi hi. Boaz in a zi Ruth taw Obed hing a Obed ta Jesse hi.

^6a Jesse ta sia David Kumpipa ahi hi.

^6b David pan Babylon khua ah Israel mite salin a kimat hun dong, a nuai a bangin taanghpupite khang kiciamtee hi. David in Uriah zi taw Solomon hing a,

⁷ Solomon ta Rehoboam, Rehoboam ta Abijah, Abijah ta Asa,

⁸ Asa ta Jehoshaphat, Jehoshaphat ta Jehoram, Jehoram ta Uzziah

⁹ Uzziah ta Jotham, Jotham ta Ahaz, Ahaz ta Hezekiah,

¹⁰ Hezekiah ta Manasseh, Manasseh ta Amon,

¹¹ Amon ta Josiah, Josiah ta Jehoiachin le a suapuite ahi uh hi.

¹² Babylon ah salin a kiciapui pan kipan Jesus khang dong a nuai a bangin taanghpupite khang kiciamtee hi. Jehoiachin ta Shealtiel, Shealtiel ta Zerubbabel,

¹³ Zerubbabel ta Abiud, Abiud ta Eliakim, Eliakim ta Azor,

¹⁴ Azor ta Zadok, Zadok ta Achim, Achim ta Eliud,

¹⁵ Eliud ta Eleazar, Eleazar ta Matthan, Matthan ta Jacob,

¹⁶ Jacob ta Joseph hi a, Christ kici Jesus Nu Mary pasal ahi hi.

¹⁷ Tua ahikom Abraham khang panin David khang dong khang sawm le khang li hi a, David khang pan Babylon ah salin a kipaipui uh dong khang sawm le khang li, Babylon te mat hun pan Messiah sua dong khang sawm le khang li ahi hi.

Jesus Christ Suana

¹⁸ Jesus Christ suana sia hi bang ahi hi. A nu Mary sia Joseph taw teang tu in a kidongh sa ahi hi. Ahihang a kiteen uh ma in, ama Thaa Thiangtho taw naungil om hi.

¹⁹ Joseph sia thumaan a ngamta tawntung pa khat hi a, ahizong ngual mai ah Mary maimawlsak nuam ngawl ahikom amate nii bek vaihawm in kikhen sawm hi.

²⁰ Tuabangin a ngaisut laitakin, Vantunglalang khat a mang sungah hong kilak a “David ii suan Joseph awng, Mary sia na zi tu in teenpui kiita heak in. Banghang ziam cile ama sia Thaa Thiangtho in ngaisak hi.

²¹ Ama in tapa khat hong hing tu a, a min Jesus ci in na phuak tu hi — banghang ziam cile ama in a mite mawna pan a hun tu hi,” ci hi.

²² “Tu in hite theampo a pianna sia Topa kamsaangpa sonkhol teng a taangtun natu ahi hi.

²³ Ngaknu thiangtho khat naungil om tu a, tapa khat hing tu hi, a min Immanuel kiphuak tu hi.” (Tua in “Eite taw Pathian omkhawm hi,” a cinopna hi.)

²⁴ Joseph khanglo in vantunglalang ii sawl bangma in Mary teenpui hi.

²⁵ Ahihang taciil nau a sua dong a zi ompui ngawl hi. Tuaciang Joseph in nau min Jesus ci in phuak hi.