Mark 4 - Syin Chin Bible

Thaicii Poaipa Thusonteena

¹ Jesus in Galilee tuili hui ah hilna nei tu in kipan kik hi. A kiim ah mihing tam mama ahikom ama in ngunkuang sungah tuak in to hi. Tui tungah ngunkuang om a, mihonte tui hui vaalbo ah ding uh hi.

² Ama in thusonteena zanghin, thu tam mama hi bangin hil hi:

³ “Ngai vun! khatvei lai in, pasal khat thaicii poai tu in kuan hi.

⁴ Ama in lo sungah thaiciite a poai ciangin, pawlkhat lamzin dung ah taakin, vacimte in tawm khawng uh hi.

⁵ Pawlkhat suang tam, lei daina ah taak hi. A lei thuk ngawl ahikom hai ngawlin, thaiciite poto hi.

⁶ Ni hong sat ciangin, ankungnote kaanghlum hi, a zung thuk ngawl ahikom ankungnote ko ngawtaak hi.

⁷ Thaicii pawlkhat sia lingphung sungah taak a, tua lingte in khannelh in deapcip ahi hu in a nga zo bua hi.

⁸ Ahihang thaicii pawlkhat sia lei phana ah taak ahikom, a kung hong po a, khangin a nga hong nga hi, tua a nga pawlkhat in, a zaa sawmthum, a zaa sawmluk le a dangte in a zaa zakhat dongin nga hi.”

⁹ “Bil na nei uh le hi thu za tavun!” ci in Jesus in a thuson khup hi.

Thusonteenate ii Deina

¹⁰ Jesus ama nguakin a om laitak nungzui sawm le niite le a thuson a za pawlkhatte ama kungah hong pai a, thusonteenate a sontel natu in, dongh uh hi.

¹¹ “No tungah Pathian Ngam thuku sia hong kipia zo hi,” ci in Jesus in zo kik hi. “Ahihang a puasang om ngualdangte in, thusonteena taw veu in a za tu uh hi.

¹² Tuasia ciang: ‘Amate in e en ahihang a mu buatu hi; ngangai tu ahihang a tel buatu hi. Banghang ziam cile amate in mu thei, za thei thong le Pathian kungah heak kik tu uh a, tuaciang ama in a mawna uh maisak tu hi.’ ”

Jesus in Thaicii Poaipa Thusonteena Sontel

¹³ Tuaciang Jesus in, “Hi thusonteena tel ngawl nu ziam? Tua ahile thusonteena dangte koibangin tel tu nu ziam?

¹⁴ Thaicii poaipa in Pathian kammalte poai hi.

¹⁵ Mihing pawlkhatte lamdung ah a taak thaiciite taw kibang hi, a thu a zaak po ciangin, Satan hong pai in laaksak hi.

¹⁶ Ngualdang pawlkhatte suang tungah a taak thaicii taw kibang hi. A thu a zaak po ciang lungdam takin saang hi.

¹⁷ Ahihang a thu in amate sungah thuk bun ngawl ahikom, khuangei a khom bua uh hi. Tua ahiciang tua thu hangin ngimna le vawtsiatna hong pai ciang, thakhat thu in amate pukkik uh hi.

¹⁸ Ngualdang pawlkhatte lingphung sungah taak thaiciite taw kibang hi. Hite sia a thu a zate ahi hi.

¹⁹ Ahihang nuntakna tu thinngimna, hau nopna le a dang deinate in deapcip ahikom nga a nga thei bua uh hi.

²⁰ Ahihang mihing pawlkhatte lei phana a, a kipoai thaiciite bang ahi hi. Amate in a thu za a, saangin, a nga nga uh hi, pawlkhat a zaa sawmthum, pawlkhat a zaa sawmluk, pawlkhat a zaa zakhat dongin nga uh hi.

Kuang taw A Kikhup Meiinn

²¹ Jesus in, “Mihing khat pawpo in meiinn hong sungtan pui in kuang nuai ah ahibuale lupna nuai ah koi ngei ka na ziam? Mei vakna khuam tungah koi hi ngawl ziam?

²² A kisealcip thute peuma a kipualaak tu a, a kisiin theampo kihongkeak tu hi.

²³ Bil na nei uh le za tavun!” ci in zomto hi.

²⁴ Jesus in, “Na zaak uh sia pha takin ngai vun! Ngual tungah na zak thukhenna sia Pathian in no tungah thukhenna in hong zangh tu hi — a nasia zaw lai in thu hong khen tu hi.

²⁵ Na pawlkhat a nei sia tungah kipia thua tu hi, bangma a nei ngawl sia tung pan tawm bek a nei sun teng zongh kilaaksak tu hi,” ci hi.

Thaicii Pote Thusonteena

²⁶ Jesus in a ci lai na panin, “Pathian Ngam sia hi bang ahi hi. Pasal khat in ama lo sungah thaicii poai hi.

²⁷ Ama zanin mu a, sunin diang hi, tua laan theampo in thaicii hong po a hong khang hi. Ahihang bangbangin piang ziam ci in a he bua hi.

²⁸ Leitang mama in ankungnote posakin, ngasak hi, a masabel in a kung moi suakin ngap hong toai a, a khakbel in a ngapte sungah a tang a dim in om hi.

²⁹ An a ngau ciangin a kungte mihingte in a phiau taw attan uh hi, banghang ziam cile anlaak hun hong theng ahi hi.

Ankamhci Thusonteena

³⁰ “Pathian Ngam sia bang taw kibang ih ci tu ziam?” ci in Jesus in dongh hi. “Bang thusonteena taw sontel tu hi ziam?

³¹ Tuasia hi bang hi. Pasal khat in ankamhcii, leitung a thaicii a nobel sia la in leisung tu hi.

³² Tawmvei zawkciang poto a, ankungte sung pan a lianbel hong suak hi. A baakte zongh lian mama ahikom vacimte hong pai in, a lim bealhin bu vawt uh hi,” ci hi.

³³ Jesus in mihingte munah hi thuhil a, hi bang thusonteena dang tam mama zongh zangh hi, amate ii tel thei zaza son hi.

³⁴ Amate tungah thusonteena ngawl taw thuson nuam ngawl a, ahihang a nungzuite bek a om ciang, amate munah a vekpi in sontel hi.

Jesus in Vuipi suangval Thimsak

³⁵ Tua nitakin Jesus in a nungzuite munah, “Tuili langkhat ah pai tawng,” ci hi.

³⁶ Tuasia ciang amate in mihonte tua munah nusia hi, A nungzuite zongh ngunkuang tungah kaa uh a, tua ii sungah Jesus to khol zo hi, tuaciang amate in ama ngunkuang taw paipui uh hi. Tua munah ngunkuang dang zongh om hi.

³⁷ Thakhat thu in nasia tak vuiva a, tuihual ngunkuang sungah kisepsuk hi, tuasia ciangin ngunkuang sung tui dim dektak hi.

³⁸ Jesus sia ngunkuang nungsang ah lukham khat khamhin mu hi. Nungzuite in phong a, “Syapa awng, thilum siat dek ih hi sia awlmawk ngawl ni ziam?” ci uh hi.

³⁹ Jesus tho a, vuipi tungah “Thim vun,” ci a, tuihual tungah “Kilok heak vun!” ci in thupia hi. Vuipi tawlnga in tuihual thim dikdek hi.

⁴⁰ Jesus in nungzuite munah, “Banghangin lau nu ziam? Tu dong upna nei ngawl lai nu ziam?” ci hi.

⁴¹ Ahihang amate lau mama uh a, “Hisia pa a bang mihing hi thong ziam? Vuipi le tuihualte ngawngawn in a thu ni hi!” khat le khat kici uh hi.