Mark 14 - Syin Chin Bible

Jesus A Kithasawmna

¹ Tu in Paisan Poai le Tol saw ngawl Anluum Poai sia ni nii samh lai hi. Thiampi liante le Thukham hil syate in Jesus sia a thimtham in man a thalup thei natu in lampi zong uh hi.

² “Poai sungah vawt ngawl tu hi, tuabang ahibuale mihingte ngamlum tu hi,” ci uh hi.

Bethany ah Jesus Sathau Kinoai

³ Jesus sia Bethany khua ah a lauhuai vun natna a vei ngei Simon a kici khat inn ah a om hi. Jesus in an ne in a om laitak numei khat hong pai in, suangngo thawl khat dim a manpha mama sathau namtui hong keng a, Jesus lu tungah buak hi.

⁴ Tua munah a om mihing pawlkhatte thin uuk a, khat le khat ii munah, “Sathau namtui pakvawt sia bang a phattuamna om ziam?

⁵ Ngunn dangka zathum sangin a tamzaw kikhawng thei tu a, mizawngte kipia thei tu hi,” ci in, nasia takin numei nu ngamtatna mawpusak uh hi.

⁶ Ahihang Jesus in, “Ama koi po vun! Note in ama sia bang nuam maw nu ziam? Ama in kei atu in, nasep pha khat a seam hi.

⁷ Mizawngte note taw hong omkhawm tawntung tu a, na hu nop uh simin na hu thei tu uh hi. Ahihang kei note taw hong omkhawm tawntung ngawl tu khi hi.

⁸ Ama in a hi thei tawpin seam zo hi, ka kivui tu hun hong thet ma in, ka pumpi sathau hong noai a hong pua khol ahi hi.

⁹ A tatakin ka ci ciang, leitung theampo ah lungdamna thu a kihil lai tengin ama ii vawt teng sia ama phawna taw kison tu hi,” ci hi.

Judas in Jesus Leeheak tu Thukim

¹⁰ Tua zawkciang nungzui sawm le nii sungah a kihel Judas Iscariot sia thiampi liante kungah Jesus leeheak tu in pai hi.

¹¹ Ama son teng amate lungkim a, sum piak tu in kamciam pia uh hi. Tuabangin Judas in amate khut sungah Jesus a aap thei natu hunpha khat zong hi.

Jesus in A Nungzuite taw Paisan Poai An Nekhawm

¹² Tol saw ngawl Anluum Poai ni phitbel ni in, Paisan poai atu tuuno a kingo hi a, nungzuite in, “Paisan poai an sia koisungah pai in hong vawt kholsak tu khu ziam?” ci in dongh uh hi.

¹³ Tuasia ciang Jesus in amate sung pan nii paisak a, “Khuapi sungah pai le uhte pasal khat tuibeal taw tuitoai sia na mu tu uh hi.

¹⁴ Ama tumna inn ah va zui tavun, tuaciang innteakpa munah, ‘Syapa in, ka nungzuite taw Paisan poai an ka neak natu inn doituam sia koisung ziam ci hi, va ci tavun,’ ci hi.

¹⁵ Tuasia ciangin ama in inndawl tungnung ah doituam lian khat hong lak tu a, an lui natu le to natu kipua kholsa in om tu hi. Tua munah a kul teng, ei atu in a kipua kholsa in om tu hi,” ci hi.

¹⁶ Nungzuite zongh pai in, khuapi sung a thet uh ciang na theampo Jesus ii sonsa bang tatak ma in a om mu uh hi. Tua munah Paisan poai an tu vawt uh hi.

¹⁷ A nitak ciangin Jesus a nungzui sawm le niite taw hong pai hi.

¹⁸ Sabuai ah an ne in a om laitak Jesus in, “No sung pan kei taw an nekhawm khat in, kei hong leeheak tu nu hi,” ci hi.

¹⁹ Nungzuite a thin uh nuam ngawl a, khat zawkciang khat in, “Kei hong ci nuam na hi bua na ziam?,” ci in dongh uh hi.

²⁰ Jesus in “Noma sawm le nii sung pan khat hi tu nu hi, ankuang sungah anluum keima taw a sawk khawm sia hi tu hi.

²¹ Laithiangtho ii ci bangin, Mihing Tapa ahile thi tu a, ahihang Mihing Tapa a leeheakpa atu in bangza in lauhuai ziam? Tua pa atu in pian awl zaw le phazaw hi!” ci hi.

Topa ii Zan an

²² Amate an a neak uh laitakin, Jesus in anluum bek khat la in, lungdamkona thungen a, balneen in a nungzuite pia hi. “Hisia in ka pumpi ahi hi. Ne vun,” ci hi.

²³ Tua zawkciang hai la in, Pathian tungah lungdam a ko zawkciang, amate pia hi, tuaciangin amate in dawn uh hi.

²⁴ “Hisia in mihing tam mamate atu a kibua ka chisan hi, Pathian thuciamna a kipsak ka chisan ahi hi.

²⁵ A maan takin ka ci ciang, Pathian Ngam sungah sapittui thak ka dawn mateng, hi sapittui thak ka dawn nawn buatu hi,” Jesus in ci hi.

²⁶ Tua zawkciang amate lasa in Olive Mual ah pai uh hi.

Jesus in Peter Nial tu teng Sonkhol

²⁷ Jesus in “Note theampo in kei nong taisan tu uh hi. Banghang ziam cile laithiangtho in, ‘Pathian in tuucingpa thatlum tu a, tuaciang a tuute kithethaang tu hi,’ ci hi.

²⁸ Ahihang nuntakna sungah hong kiphokto ciangin, note mai Galilee ah ka na paikhol tu hi,” ci hi.

²⁹ Peter in, “A dang theampo in hong nusia zong, kei kong nusia buatu hi!” ci hi.

³⁰ Jesus in Peter munah “A tatakin kong ci ciang, zan ciangin ak niivei a khuan ma in thumvei kei nong nial tu hi,” ci hi.

³¹ Peter in, “Nangma taw thi khop keak a kul zongin, tuabang peuma hong nial ngawl tu khi hi!” ci in kho takin zo hi. Nungzui dangte zongh in tuabang ma in ci tek uh hi.

Jesus Gethsemane ah Thungen

³² Amate Gethsemane a kici mun hong theng uh a, Jesus in a nungzuite munah, “Thu ka nget lanin hi sungah na to vun,” ci hi.

³³ Ama in Peter, James le John te paipui hi. Ama sia heena le thinngimna taw kidim hi,

³⁴ tuaciang amate tungah, “Ka thinsung ah ka heena lian mama ahikom ka thi dektak hi. Hi sungah na om vun a, mu heak vun,” ci hi.

³⁵ Ama tawm pai thua lai a, lei ah bokin, ahithei le ngim thuak natu hun a peal thei natu in thungen hi.

³⁶ “Pa awng, Ka Pa awng! Na theampo nang atu in suak thei hi. Hi thuakna hai sia kei kung pan hong laaksak ta'n. Ahihang kei deina bang hi ngawlin, nangma deina bang hi tahen,” ci in thungen hi.

³⁷ Tua zawkciangin hong heak kik a, a nungzuite thum sia mutthip sa in a om mu hi. Ama in Peter munah, “Simon awng, mu ni ziam? Nai khat zongh hong ngak zo ngawl ni ziam?”

³⁸ A nungzuite tungah, “Na ngak vun a, ze etna sungah na puk ngawl natu in, thungen vun. Thinsung in uukna nei ahihang pumpi sia thazawm hi,” ci hi.

³⁹ Ama khatvei ma pai kik a, a kammal zak ngei teng taw ma in thu ngen kik hi.

⁴⁰ Tua zawkciangin ama nungzuite kungah hong heak kik a, nungzuite mutthip sa in a om mu hi. Amate in Jesus tungah bang son tu ci a he bua uh hi.

⁴¹ Ama a thum veina hong heak kik ciangin, nungzuite munah, “Tu dong mu lai in, tawlnga lai nu ziam? Tu a teng pha zo hi! A hun hong theng zo hi! En vun, Mihing Tapa sia mimawte khut sungah ki aap tu hi zo hi.

⁴² Tho vun a, pai ka tawng. En vun, kei hong leeheak tu pa hi sungah om hi!” ci hi.

Jesus Kimatna

⁴³ Jesus tuabangin a pau laitakin, nungzui sawm le niite sung pan khat ahi Judas hong theng hi. Thiampi liante, Thukham hil syate le upate ii sawl mihon khat namsau le moltawng toai in, Judas taw hong kithawl khawm uh hi.

⁴⁴ “Ka nap pa sia na mat nop uh sia hi tu hi, man vun a, a cing tu kisepin paipui tavun,” ci in Judas in mipite limlakna piakhol hi.

⁴⁵ Judas hong thet po ciangin Jesus kungah pai in, “Syapa awng!” ci in namh hi.

⁴⁶ Tuabangin Jesus man uh a, lencip uh hi.

⁴⁷ Ahihang tua munah a ding khat in, a namsau dokin Thiampi Lianbelpa ii salpa saat a, a bil saattan hi.

⁴⁸ Jesus in amate tungah, “Mihing that taiku man tu bang phetin, kei hong man tu takpi namsau le moltawng taw hong kuan nu ziam?

⁴⁹ Ni simin Biakinn sungah no taw omkhawm in hilna kong nei a nong man bua uh hi. Ahizong Laithiangtho a taangtut kul hi,” ci hi.

⁵⁰ Tuaciangin nungzuite theampo in ama nusia in taikeak uh hi.

⁵¹ Puankaang neal khat bek a silh tangval khat in, Jesus zui hi. Amate in tangvalpa man tu in kithoai uh hi.

⁵² Ahihang ama in a puan nusia in, a nguaktangin tai hi.

Council te in Jesus Thusit

⁵³ Tua zawkciang Thiampi Lianbelpa inn ah Jesus paipui uh hi. Tua munah thiampi liante theampo, upate le Thukham hil syate kikhawm uh hi.

⁵⁴ Peter in a khuala thithimna panin Thiampi Lianbelpa ii leitual dong zui hi. Tua munah ngalkapte taw meilum oai in to hi.

⁵⁵ Thiampi liante le Council buppi in, Jesus a thalup thei natu, a mawna zong ahihang a mu zo bua uh hi.

⁵⁶ Mihing tam mama in leilot thu taw Jesus mawsak hikale amate khat le khat zongh a thu a kisi bua uh hi.

⁵⁷ Tuaciangin pawlkhat hong ding a, Jesus mawsak natu in, leilot thu hi bangin son uh hi.

⁵⁸ “Mihingte vawt Biakinn hisia ka baltham tu a, ahihang ni thum zawkciang mihingte vawt ngawl khat ka sa kik tu hi,’ ci in a pauna ka za uh hi,” ci hi.

⁵⁹ Ahitazong amate ngawngawn a thu uh a kisi thei bua uh hi.

⁶⁰ Thiampi Lianbelpa amate theampo ii mai ah ding a, Jesus thu dongh hi. “Hong mawsaknate na zo kik natu nei ngawl ni ziam?” ci hi.

⁶¹ Jesus huthe ngawlin om a, kam khat zongh a pau bua hi. Tuaciangin Thiampi Lianbelpa in, khatvei ma, “Nang Thupha toai Pathian Tapa Messiah na hi ziam,” ci hi.

⁶² “Hi khi hi, no theampo in, Mihing Tapa sia Vaanglianbelpa ziatsang ah to in, vantung ah meeikaaite taw hong pai na mu tu uh hi,” ci in Jesus in zo hi.

⁶³ Thiampi Lianbelpa in, a puantual eautham a, “Tetti dang kul nawn ngawl hi.

⁶⁴ Pathian min a simmawk hunlam na zaak tek uh hi. Bangbangin thukhen tu nu ziam?” ci hi. Amate theampo in ama a langpan siat uh hi. Ama maw hi, thalup kul tu hi, ci uh hi.

⁶⁵ Amate pawlkhat in Jesus cilphii in, a mit a sawmsak zawkciang saat uh hi. “Akua in nang hong saat ziam, son thei ta'n,” ci uh hi. Tuaciangin ngalkapte in la in beang uh hi.

Peter in Jesus Nial

⁶⁶ Thiampi Lianbelpa ii naseam numei khat hong pai laitakin, Peter leitual ah om lai hi.

⁶⁷ Ama in Peter mei oai in om a mu ciang, encian a, “Nang zongh Nazareth mi Jesus taw kithawl ni hi,” ci hi.

⁶⁸ Ahihang ama in nial hi. “Na son thu sia he ngawl khi hi,” ci in lampi ah paisan hi. Tuasia laitakin aklui khat khuang hi.

⁶⁹ Naseam numeinu in tua munah a mu ciang, a dingte zaak tu in, “Ama sia amate sung pan khat ahi hi,” ci kik hi.

⁷⁰ Ahihang Peter in nial kik hi. Tawmvei zawkciang tua munah a dingte in Peter munah, “Nang, amate mi khat na hina sia nial zo ngawl tu ni hi, banghang ziam cile nangma zongh Galilee ngam pan na hi hi,” ci uh hi.

⁷¹ Tuasia ciangin Peter in, “Thumaan son khi hi, ci in ka kiciam hi, thumaan ka son buale Pathian in daan hong pia tahen. Na son uh sia pa hong heaksak ngawl khi hi,” ci hi.

⁷² Tuasia ciangin aklui a nii veina khuang hi. Tuaciang Peter in Jesus ii ama tungah, “Aklui niivei a khuan ma in, hong he ngawl khi hi, ci in kei thumvei nong nial tu hi,” a ci teng phawk hi. Tuaciang ama in thuak zo ngawlin kap hi.