Mark 12 - Syin Chin Bible

Sapit huan A Saapthawte taw Thu Thusonteena

¹ Tuaciang Jesus in amate tungah thusonteena taw thu son hi. “Khatvei lai in pasal khat in sapithuan vawt a, dal taw uum in, a tuisuukna set atu leidum a taw zawkciang lo hun natu teitaan daw hi. Tua zawkciang, a saapthaw nuamte in saapsakin ama khualhaw hi.

² Sapit nga law hun ciangin, ama tan tu tel teng a la tu in, a silate khat paisak hi.

³ Lo saapte in tua silapa manin, saat a, a ngawlnguak in ciasak hi.

⁴ Tua zawkciang huan neipa in, sila dang khat ma paisak hi; lo saapte in a lutang pan vel a, a maizumhuai dongin vawt uh hi.

⁵ Huan neipa in sila dang khat ma paisak lai hi; tuasia pa thatlum uh hi; a dang tam mama zongh tuabang ma in vawt uh a, pawlkhat vel in, pawlkhat thatlum uh hi.

⁶ Tuabang a sawl thei tu a taanglai mihing sia a it a tapa bek ahi hi. A khakbel ciangin ama in a tapa lo saapte munah paisak hi, ‘Ka tapa hi buang ahiciang, thasia hamtang vak’ ci hi.

⁷ Ahihang tua lo saapte in, “Hisia pa lo neipa tapa hi. Hong pai tavun, that tawng, tua hile a neisate eima aa suak tu hi!’ ci uh hi.

⁸ Tua ahiciang amate in lo neipa tapa manin thatlum uh a, a luang sapithuan pua sangah vawk hi.

⁹ “Tua hile huan neipa in bang a law tu ziam?” ci in Jesus in dongh hi. “Ama hong kuan tu a, tua mihingte a thalup zawkciang, sapithuan sia lo saap dangte tungah aap tu hi.

¹⁰ Laithiangtho sungah hi bangin a ki at sia sim ngeingawl lawlawm nu ziam? ‘Inn sate ii mannung ngawl hi ci a, a nil suangtum sia a thupibel suangtum suak hi.

¹¹ Hi thu in Topa ii zeakna ahi hi; ih et ciang lamdang hi ngawl ziam!’ ”

¹² Jew lampuite in Jesus mat sawm uh hi, banghang ziam cile amate in hi thusonteena sia amate huvau a sonna hi ci in tel uh hi. Ahihang mipite kiita ahikom amate in paisan uh hi.

Shia Piakna huvau Kidokna

¹³ Phariseete pawlkhat le Herod ii pawlmite pawlkhat in thudokna taw Jesus aitaa tu in paisak uh hi.

¹⁴ Amate Jesus kungah hong pai uh a, “Syapa awng, ngualdang ii ngaisutnate awlmawk ngawlin thumaan a son pa hi, ci in kong he uh hi. Mihing min le zate zongh thupi sim tuan ngawlin Pathian ii mihingte atu a deisak thute hil hi, ci in kong he uh hi. Ih thukham in Rome Kumpilianpa, shia ih piak tu khaam ziam? Pia tu hi ziam, pia ngawl tu hi ziam, hong son ta'n,” ci uh hi.

¹⁵ Ahihang Jesus in amate ii thimthel pilna teng tel a, ‘Banghangin kei thaang hong sia nuam nu ziam? Ngunn dangka khat hong paipui tavun, hong en sin tong,” ci hi.

¹⁶ Amate in khat paipui a, ama in “Hite akua ii maitang lim le akua ii min ziam?” ci hi. “Kumpilianpa aa hi,” ci in a zo kik uh hi.

¹⁷ Tua ahikom Jesus in, “Tua ahile pha hi, Kumpilianpa ii neisa sia Kumpilianpa ma pia vun, Pathian ii neisa sia Pathian ma pia vun,” ci hi. Tuasia ciangin amate in Jesus sia lamdang sa uh hi.

Thina pan Thawkikna Thu Dokna

¹⁸ Mihingte thina panin tho kik ngawl tu hi a ci Sadducee te pawlkhat Jesus kungah hong pai in,

¹⁹ “Syapa awng, hi thukham sia Moses in ei atu in a at ahi hi: ‘Pasal khat in a zi thi san in ta a nei buale, a pasal ii suapuipa in meingongnu sia teenpui tahen, tua hile ta a nei uh ciangin mithipa ta hi ci in kingaisun tu hi,’ ci hi.

²⁰ Khatvei lai in unau pa sali om hi: a lianbel sia in zi nei a, ta nei ngawlin thi hi.

²¹ Tua zawkciang a niina pa in, tua numei teenpui a, tuaciang ama zongh ta nei ngawlin thi hi. A thumna pa zongh tuabang ma ahi hi,

²² tuaciang a dangte theampo zongh tuabang hi siat hi: unau sali bupin tua numei teenpui tek a, ta nei ngawlin thi tek hi. A khakbel in tua numei zongh thi hi.

²³ Tu in thaw kik ni ciang, tua nu sia akua zi hi tu ziam? A sali in teenpui tek hi,” ci uh hi.

²⁴ Jesus in, “Bangza in telkhial nu ziam! Na telkhial uh sia banghang ziam, ci in na he uh ziam? Banghang ziam cile no sia Laithiangtho ahizong Pathian vaang ahizong na he bua uh hi.

²⁵ Banghang ziam cile a thite sia nuntakna sungah a thaw kik ciangin, amate vantunglalangte bang hi tu a, a kiteang buatu hi.

²⁶ Tu in a thite phoktona taw kisai in: Moses ii Laibu sungah sawlpaang kuang sia ii thu, sim ngeingawl nu ziam? Tua ii sungah ki at a, Pathian in Moses tungah, ‘Kei sia Abraham ii Pathian, Isaac ii Pathian, Jacob ii Pathian ka hi hi,’ ci hi.

²⁷ Ama in a nungtate ii Pathian hi a, a thisate ii Pathian ahi bua hi. Telkhial mama nu hi!” ci in zo hi.

A Lian Thupiak

²⁸ Thukham hil sya khat, tua kam kikupna sungah om hi. Jesus in Sadducee te pha takin zo kik thei ahi sia mu hi, tua ahikom ama in, thudok nop khat taw Jesus kungah pai hi, “Thupiak sung teng pan koisia thupibel ziam,” ci hi.

²⁹ Jesus in zo a, “A thupibel sia hisia hi, ‘Israel awng, ngai vun! Topa ih Pathian sia ama bekma Topa ahi hi.

³⁰ Topa na Pathian sia na thin theampo, na thaa theampo, na ngaisutna theampo le, na thatang theampo taw it in.’

³¹ A niina a thupibel thupiak sia, ‘Nangma le nangma na ki it bangin na innpaamte it in’ Hite nii sangin a thupizaw thupiak dang om ngawl hi,” ci hi.

³² Thukham hil syapa in, Jesus munah, “Pha mama hi, Syapa awng, na ci bangin Topa bekma Pathian hi a, ama ngawl pathian dang om ngawl hi na ci sia thumaan hi.

³³ Tuaciangin mihingte in Pathian sia a thin theampo, a ngaisutna theampo, le a thatang theampo taw a it tu uh kul hi; tuaciangin ama a ki it bangma in a innpaamte a it tu kul hi. Pathian tungah nganhing taw biakpiaknate le a dang biakpiaknate sangin, hi thukham niite zui tu thupi zaw hi,” ci hi.

³⁴ Jesus in tua pa ii zo kikna sia ciim kammal hi ci in mu ahikom, ama munah, “Nang sia Pathian ngam taw kikhuala ngawl ni hi,” ci hi. Hisia zawkciang kuama in Jesus thudang a dongh ngam nawn bua uh hi.

Messiah taw kisai Thudokna

³⁵ Biakinn sungah hilna a nei laitak Jesus in, “Thukham hil syate in bangbangin Messiah sia David ii suan hi ci thei ziam?

³⁶ Thaa Thiangtho in David sia hi bangin pausak hi: ‘Topa in ka Topa tungah: Na ngalte na peang nuai ah kong koisak mateng, hi sung ka ziatsang ah hong to ta'n ci hi.’

³⁷ “David mama in, ‘Topa’ ci hi; tua ahile Messiah sia David ii suan hi thei tu ziam,” ci hi. Mihon khat in Jesus ii thuson lungdam takin ngai uh hi.

Jesus in Thukham hil Syate kung pan Kikep natu Hil

³⁸ Amate a hil kawmin hi bangin ci hi, “Puantual silhin sumzuakna munah, ngual in zatak vawtin a biak tu thangai in, a vak thanuam Thukham hil syate kung panin kikeam vun,

³⁹ synagogue sungah a kikoituam tokhumte le poai sungah a nuambel na munah to thanuam uh hi,

⁴⁰ Amate in meingongte zothaw in, a inn uh suttol in, a sau pupui a thungetna taw amate ngamtatna phualseal uh hi. Tua hu in amate daan thuak tu nasia seseam tu hi!” ci hi.

Meingongnu ii Sumkhiak

⁴¹ Biakinn sum kholna hui ah Jesus a to laitak, ama in mihingte sumkhiak zia en hi. Sumhau tam mama in sum tam ma khia uh hi;

⁴² tuaciangin a zawng meingongnu khat hong pai a, pya khat tang taw a kikim dangkasan pheak nii khia hi.

⁴³ Ama in nungzuite sam in, “A tatakin ka ci ciang midangte sangin, hi meingongnu in tam khia zaw hi.

⁴⁴ Banghang ziam cile a dangte in a nei vaal a lamh vaal uh teng khia uh hi, ahihang hi meingongnu in a zawn kawm pan, a nei theampo khia siat hi — a nuntak a kivaak natu a nei sun teng pia siat hi,” ci hi.