Luke 5 - Syin Chin Bible

Jesus in Nungzui Masa Phitbelte Sam

¹ Ni khat Jesus Gennesaret Tuili hui ah dingin mipite in Pathian thu ngai tu in, ama sangah neak ngawp nuamin a kiphulung uh hi.

² Ama in ngunkuang nii vaalbo tungah kikaito sa in a om mu hi; ngasa paaite in a ngeen uh a sil laanin, a nusiat uh ahi hi.

³ Ngunkuangte sung pan khat sia Simon aa hi a — Jesus in tua tungah kaa in — vaalbo panin tawm a khualana ah sawnin sawl hi. Jesus ngunkuang tungah to in, mihonte hilna nei hi.

⁴ A son tu teng a man zawkciangin, Simon munah, “Na ngunkuang tui thukna munah sawn lai in, tuaciang in nang le na seppuite ngasa man tu in na ngeen uh hong khiasuk tavun,” ci hi.

⁵ Simon in, “Topa awng, zan khuateakin ka diang zo uh a, bangma man ngawl khu hi. Ahihang nangma in hong sawl na hi ciang, ngeente ka khiasuk tu uh hi,” ci hi.

⁶ Amate in a khiaksuk uh ciangin, ngasa tam mama man a, a ngeente ektham dektak hi.

⁷ Tuasia ciangin ngunkuang dang khat sung pan a seppuite, amate hu tu in sam uh hi. Amate hong pai a, ngunkuangte ngeal dimin, ngasa a sun uh ciangin, a ngunkuangte tui sungah tum dektak hi.

⁸ Simon Peter in bang thu teng piang, ci in a mu ciangin, Jesus mai ah, ama khupdin in, “Topa awng, kei kung pan kiheam in! Kei sia mimawpa khi hi!” ci hi.

⁹ Ama le a ompui dangte in, ngasa tam mama a mat uh sia lamdang sa uh hi.

¹⁰ Simon seppui ahi Zebedee tate James le John zongh in, lamdang sa uh hi. Jesus in Simon tungah, “Lau heak in; tu pan kipan mihingte na man tu hi,” ci hi.

¹¹ Amate in a ngunkuang uh vaalbo tungah kaito a, a neisa theampo nusia in, Jesus nung zui uh hi.

Jesus in Pasal khat Damsak

¹² Khatvei Jesus khuapi khat sungah om a, tua munah, a lauhuai vun natna a vei pasal khat om hi. Ama in Jesus a mu ciangin, a mai ah bok a, “Topa, nong thiangthosak nuam le hong thiangthosak thei ni hi,” ci in thum hi.

¹³ Jesus in a khut vaan a, ama tham in, “Hong thiangthosak nuam khi hi. Thiangtho ta'n!” ci hi. A natna teng thakhatin dam hi.

¹⁴ Jesus in, “Kuama munah son heak in, ahizong thiampipa kungah pai paih ta'n a, ama in vealsak ta'n; tua zawkciang, a kuama theampo in dam zo hi, ci in hong heak natu in, Moses ii sawl bangin, sangaw biakpiaknate vawt ta'n,” ci hi.

¹⁵ Ahihang Jesus ii thu thang seseam a, tuaciang mihonpite in ama thuson ngai tu le, a natnate pan damna a nga tek natu in, a kungah pai uh hi.

¹⁶ Ahihang Jesus a ngamkhingna munte ah thungen tu veu in pai hi.

Jesus in Pumzaw Pasal khat Damsak

¹⁷ Ni khat Jesus ii a thuhil laitak, Galilee ngam, Judea le Jerusalem panin Phariseete pawlkhat le, Thukham hil syate to hon uh hi. Ciinate a damsak natu in, Topa vaangletna Jesus tungah om hi.

¹⁸ Mihing pawlkhat in pumzaw khat, a lupna taw zawng a, inn sung Jesus mai ah tumpui tu in hanciam uh hi.

¹⁹ Ahizong mihonte hangin a tumpui natu, lampi a mu zo bua uh hi. Tua ahikom amate in ciina sia innkhum tungah puato in, suangpheak pawlkhat a lokkeak zawk uh ciang, mihonte laizang Jesus mai ah a lupna taw ma in khiasuk uh hi.

²⁰ Tua mite in bangza in upna nei ci, Jesus in a mu zawkciang pasalpa tungah, “Na mawna hong kimaisak zo hi, lawm awng,” ci hi.

²¹ Thukham hil syate le Phariseete in, “Pathian zawnsakna kampau hisia pa akua ziam! Mawna maisak thei sia, Pathian khat simngawl a dang om ngawl hi,” amate tetek kici uh hi.

²² Jesus in amate ii ngaisutna teng he ahikom hi bangin ci hi. “Banghangin tuabangin ngaisun nu ziam?

²³ ‘Na mawna hong kimaisak zo hi,’ ci sia le ‘Tho in a lampai in,’ ci sia koisia ol zaw ziam?

²⁴ Tua ahikom mihing Tapa in, leitung ah mawnate maisak theina thu a nei hunlam kong lak tu hi,” ci hi. Tua zawkciangin pumzaw pasalpa munah, “Tho in, na lupna luak in a, inn ah cia ta'n, hong ci khi hi!” ci hi.

²⁵ Thakhat thu in, amate mai ah pasalpa tho a, lupna luakin, Pathian min pokna taw inn ah cia hi.

²⁶ Amate theampo in lamdang tatak sa uh hi. Launa taw kidim in, Pathian pok kawm a, “Tuni in, bangza in a tumdang nate mu thong hi ziam?” ci uh hi.

Jesus in Levi Sam

²⁷ Tua zawkciang Jesus pusuak a, Levi kici shiadongpa a zum sungah to in a om mu hi.

²⁸ Jesus in ama tungah, “Hong zui ta'n,” ci hi. Levi zongh dingin na theampo nusia in zui hi.

²⁹ Tua zawkciangin Levi in ama inn ah, Jesus atu in anvaakna poai lian khat vawt a, a leangnate sungah shiadongte tam ma le midangte kihel hi.

³⁰ Pharisee pawlkhat le tuate sung pan Thukham hil syate in Jesus nungzuite tungah lungkim ngawlna hi bangin ci uh hi. “Banghangin shiadongte le a kipuavawkte taw annekhawm tuidawn khawmin om nu ziam?” ci in dongh uh hi.

³¹ Jesus in, “Mihing ciidamte in syavuan a kitaangsamh bua hi, ciinate bek in kitaangsamh uh hi.

³² A zatakhuai mihingte a kisiik natu a sam tu in kong pai bua a, a kipuavawkte a sam tu in kong pai hi,” ci in zo kik hi.

An tanna taw kisai Thudokna

³³ Mihing pawlkhat in Jesus tungah, “John ii nungzuite sia an tang mun mama in thungen hi, tuabang ma in, Phariseete ii nungzuite zongh in, ngamta uh hi; ahihang na nungzuite in anne tuidawn in om uh hi,” ci uh hi.

³⁴ Jesus in, “Mopoai sungah zineipa a om laiteng, leangnate an kidan thei na ziam? Kidan thei ngawl hi!

³⁵ Ahihang zineipa amate kung pan a kilaak zawkciangin amate in an a tang tu uh hi,” ci in zo hi.

³⁶ Jesus in hi thusonteena sia zongh amate tungah son thua hi. “Kuama in puan thak khat leapin, puan luisa phawna in nei ngeingawl hi. Tuabang hile, puan thak sia lalsak a, puan lui sia zongh a phawna taw kilawm ngawl tu hi.

³⁷ Savun thawl luisa sungah kuama in sapittui thak thaal ngeingawl hi, banghang ziam cile sapittui thak in savun thawl lui sia saantham tu a, sapittui bua in, savun thawl lal tu hi.

³⁸ Tua sangin sapittui thakte sia savun thawl thak sungah kithaal zaw tu hi.

³⁹ Tuaciangin sapittui kumlui a dawn sate in sapittui thak a du buatu hi, ‘A lui sia phazaw hi,’ ci hi.”