Joshua 4 - Syin Chin Bible

Khansuangte Kiphut

¹ Minam buppi Jordan a kaantan zawk uh ciang Topa in Joshua mun ah,

² “Nam khat pan mihing khat veu, mihing sawm le nii teal in,

³ Jordan ngun laizang thiampite ii dinna san tak panin suangtum sawm le nii lasak in. Amate in hi suangtumte pua in zan ciang ngiaphual na saat natu munah koi in sawl in,” ci hi.

⁴ Tuaciang Joshua in mihing sawm le nii a teal teng sam a,

⁵ “Topa na Pathian ii Thuciamna Thingkuang ii mai Jordan ngun sungah na pai tavun a, Israel namte khat sim atu suangtum khat tek na liang uh ah hong pua tavun.

⁶ Topa in bang seam zo ci in hi suangtumte in mipite phawksak tu hi. Mai sangah na tate in hi suangte ii a cinopna bang ziam ci hong dok ciangin

⁷ Topa Thuciamna Thingkuang ii ngun a kaantan ciangin Jordan ngun sia a luan tawlnga hi, ci in na son tu uh hi. Hi lai munah bang thu piang ci sia hi suangte in Israel mite phawksak tawntung tu hi,” ci hi.

⁸ Tua pasalte in Joshua ii thupiakna te zui uh hi. Topa ii Joshua thu a piak bangma amate in suangtum sawm le nii Jordan ngun sung pan la a, Israel nam khat atu suangtum khat veu pua in a ngiaphual saat na munah koi uh hi.

⁹ Thuciamna Thingkuang a pua thiampite ii dinna san Jordan ngun laizang ah Joshua zongh in suangtum sawm le nii ciang hi. (Tua suangtumte tua munah om lai hi.)

¹⁰ Topa ii Joshua tungah a thupiak, mite ii sep tu vawt tu a ci teng theampo a kizaw dong thiampite sia Jordan ngun laizang ah ding uh hi. Hi sia Moses ii thupiak sa ahi hi. Mipite sia ngun kaantan in pai memeang uh hi.

¹¹ Amate ngun langkhat a thet siat zawk uh ciang Topa Thuciamna Thingkuang a pua thiampite sia mipite mai ah pai uh hi.

¹² Reuben le Gad namte le Manasseh nam a khenlang sung pan ngal sim tu in a kinging te sia Moses ii sawl bangin a taang lai mipite mai ah ngun kan masa uh hi.

¹³ Topa ii a ompui ngal sim tu in a kinging sa mihing 40,000 bang sia ngun kaantan in Jericho hui zaangtam theng uh hi.

¹⁴ Topa ii tua ni a sep a vawt teng in Joshua sia Israel te ngaisutna ah mihing thupi mama khat suaksak hi. Amate ii Moses a zatak vawt uh bangma, ama zongh a khan tawntungin zatak vawt uh hi.

¹⁵ Tua zawkciang Topa in Joshua munah,

¹⁶ Thuciamna Thingkuang a pua thiampite Jordan ngun sung pan hong kaato natu thupia tu in sawl hi.

¹⁷ Joshua in tuabang ma in seam hi,

¹⁸ Tuaciang thiampite ngun vaal a thet uh ciang, nguntui luansuk kipan kik a, ngun vaal teng tuiliim hi.

¹⁹ Mipite sia a tha khatna ni sawm ni in Jordan kaantan uh a, Jericho ii nisuana sangah a om Gilgal ah ngiaphual saat uh hi.

²⁰ Tua munah Jordan ngun sung pan a laak uh suangtum sawm le nii teng sia Joshua in ciang hi.

²¹ Ama in Israel te mun ah, “Mai sangah na tate in hi suangtumte sia bang a cinopna ziam ci in hong dok ciang

²² Jordan ngun sia leiko tungah Israel te ii kaantan hun lai thute na son tu uh hi.

²³ Topa na Pathian in ei atu San Tuipi sung leiko a suasak bangma in Jordan ngun zongh ih kaantan siat dong leiko a suasakna thu na son tu uh hi.

²⁴ Hi sia hu in leitung mi theampo in Topa ii vaangletna sia bangza in lian ci in he tu a, tuaciang note in Topa na Pathian sia a tawntungin na zatak vawt tu uh hi,” ci hi.