Joshua 3 - Syin Chin Bible

Israel Mite in Jordan Ngun kaantan

¹ A zing ciang zingsang in Joshua le Israel te tho pal a, Acacia ah a ngiaphual sia nusia in Jordan ah pai in, a kaantan tu ngakin tua munah ngiaphual saat uh hi.

² Ni thum zawkciangin lampuite ngiaphual sung tengah pai in,

³ mipite tungah, “Topa na Pathian ii Thuciamna Thingkuang sia thiampite in a puak na mu uh ciang, ngiaphual pan vaiding in zui vun.

⁴ No hi sungah a om ngei kuama om ngawl nu hi, tua ahiciang amate in na pai natu lampi hong lak tu hi. Ahihang Thuciamna Thingkuang nai neak heak vun; kilometre khat bang kihal in a nungah om vun,” ci hi.

⁵ Joshua in mipite tungah, “Noma le noma kithiansua vun, banghang ziam cile zing ciang Topa in note sungah nalamdang laknate vawt tu hi,” ci hi.

⁶ Tua zawkciang Joshua in thiampite sia, Thuciamna Thingkuang la in mipite mai ah pai a sawl hi. A ci bangin amate ngamta uh hi.

⁷ Topa in Joshua munah, “Tu ni a ka sep tu sia nangma sia mihing thupi mama khat in Israel theampo ii hong zatak vawt tu a kipatna hi tu a, Moses ka ompui bangin nang zongh kong ompui hunlam amate in hong tel tu uh hi.

⁸ Thuciamna Thingkuang pua thiampite ngun a thet uh ciang, ngun sung tansakin a, ngunvaal taw a kinaina ah dingsak in,” ci hi.

⁹ Tuasia ciang Joshua in mipite munah, “Hong pai tavun a, Topa na Pathian ii pauna ngai vun.

¹⁰ Maisang ah na manaw uh ciang ama in Canaan te, Hit te, Hiv te, Periz te, Girgash te, Amor te le Jebus te notkeak takpi tu hi.

¹¹ Leitung theampo ii Topa Thuciamna Thingkuang sia no mai ah Jordan a kaantan tak ciang, a nungta Pathian sia no sungah hong om hi ci in na tel tu uh hi.

¹² Tu in, no Israel namte khat sim sung pan khat tek mihing sawm le nii teal vun.

¹³ Leitung theampo ii Topa ii Thuciamna Thingkuang a pua thiampi te in tui sung hong si tak ciang, Jordan ngun sia a luan tawlnga tu hi, tuaciang hong luangsuk tuite sia mun khat ah cing tu hi” ci hi.

^14-15 Tua hun sia anlaak hun hi a, nguntui pawm hi. Jordan ngun kan tu in mipite ngiaphual a nusiat uh ciang, thiampite sia Thuciamna Thingkuang pua in pai masa uh hi. Thiampite ngun sungah a kalsuan suk po ciang

¹⁶ tui luan tawlnga a, Zarethan khua mawk Adam khuapi dong tuilu sangah tui hong cingto hi. Tuipi Thi sungah a luangsuk tui sia kikhaktan ik-ek a mipite in Jericho khua hui panin kaantan thei uh hi.

¹⁷ Mipite in leiko tung tawn tan in a pai uh laitakin, Topa ii Thuciamna Thingkuang a pua thiampite sia mi theampo ii kaantan zawk mateng Jordan ngun laizang lei kona ah ding uh hi.