Joshua 20 - Syin Chin Bible

Bukna Khuapite

¹ Tua zawkciang Topa in Joshua munah,

² Israel mite a son tu in, “Moses ii hong sonsawn tu ka sawl bukna khuapite teal vun.

³ Mihing khat in ngual dang khat a thalup thaak ciang, a phulam tu in a zong pa khut pan a suatak natu in tua munah pai thei hi.

⁴ Ama in hi khuapi te khat pawpo ah tai thei a, hi khuapi tumna kongbiang thukhenna munah a om lampuite tungah thupiang babang son thei tu hi. Amate in khuapi sungah a om thei natu in ama tumsak a, a teen natu mun khat pia tu hi.

⁵ A phulam nuam pa in tua mun dongah a zuizen le khuapi mipite in ama ii khut sungah a tai pa sia aap ngawl het tu hi. Amate in ama hung nanak tu hi, banghang ziam cile ama thin uukna hang hi ngawlin a thalup thaak ahi man hi.

⁶ Taangpi mai ah thu a kikhen dong le tua laitak Thiampi Lianbel a seam sia ii thi dong ama sia tua munah om thei tu hi. Tua zawkciangin tua pa hong taina a khua a inn ah cia kik thei tu hi,” ci hi.

⁷ Tua ahikom amate in Jordan nitumna sang Naphtali mualtung ngamsung Galilee ngam ah Kedesh; Ephraim mualtung ngam ah Shechem; Judah mualtung ngam ah Hebron tuamkoi hi;

⁸ Jordan nisuana, Jericho nisuana sang sennealngam mualtung, Reuben ngam sungah Bezer; Gad ngamsung Gilead ah Ramoth; Manasseh ngamsung Bashan ah Golan teal uh hi.

⁹ Hi teng sia bukna khuapi tu in Israel te theampo le ngamdangmi amate sungah a teangte atu a kiteal teng ahi hi. Khat po in midang khat a thatlum tha le phulam tu in ama a zong sia ii khut pan dalna nga thei tu hi; taangpi mai ah thukhenna a thuak phot buale ama kithatlum thei ngawl hi.