Joshua 14 - Syin Chin Bible

Jordan Nitumna sang Ngam Hawmna

¹ Jordan nitumna sang Canaan ngam le lei, Israel mite sungah a kihawmna thu a nuai a bangin kizom hi. Thiampi Eleazar, Nun tapa Joshua le Israel nam innkuante ii lampuite in tuasia a mite teng tungah hawmsak hi.

² Topa ii Moses tungah a thupiak bangma in nam kua le nam lang te ii nga tu ngamte sia laimee sawkin khensat uh hi.

^3-4 Moses in Jordan nisuana ngam sia nam nii le namlangte atu a seesak sa hi. (Joseph ii suante sia Manasseh nam le Ephraim nam ci in nam nii in kikhen hi.) Ahihang Moses in Levi te sia ngam bangma a pia bua hi. Tua taangin a teen natu khuapite, a khui le a tuu honte tat natu lote nga hi.

⁵ Israel mite in Topa ii Moses tung a thupiak bangin ngam khen uh hi.

Hebron sia Caleb atu Kipia

⁶ Ni khat ni in Judah nam pan mihing pawlkhat sia Gilgal, Joshua kungah hong pai hi. Amate sung pan khat Keniz mi Jephunneh tapa Caleb in, “Kadesh Barnea ah Topa in nang le kei huvau Pathian mihing ahi Moses tungah a ci teng na heak hi.

⁷ Topa naseampa Moses ii hi ngam a vil ku tu hong paisak lai in kei sia kum sawmli ka pha zo hi. Ahi bang tatak teng ama tungah thu ka puak kik hi.

⁸ Kei taw a paikhawm pasal dangte in ahile ih mite lauthawn hi. Ahihang keima in Topa ka Pathian thu ka mang hi.

⁹ Tuabang ka ngamtat hu in, Moses in kamciam hong piakna pan, ka paina sa ngam le lei sia kei le ka tate neisa in hong kipia tu ci hi.

¹⁰ Ahihang tu in en in! Topa in Moses tungah a ci sia tu in kum sawmli le kum nga pha zo hi. Tuasia Israel te ii sennealngam kaantan in a pai hun hi a, tuaciang Topa in ama kamciam bangma hong nungtasak lai hi. Hong en ta'n! Kum sawmliat le kum nga pha khi hi,

¹¹ Moses ii hong paisak lai bangma in thahat ngawp lai khi hi, ngal sim tu ahizong bangdang khat po seam tu ahizong naap lai khi hi.

¹² Ka ngalvilpui pasalte taw thu ka puak ni in, Topa kei hong kamciamsa mualtung ngam teng, tu in hong pia ta'n. Tuasia lai in Anakim a kici thatang lian mama minamte sia luphung taw a ki uum khuapite sungah teang hi ci in kong son uh hi. Topa sia kei taw hong omkhawm po tahen, Topa ci bangma in amate ka hawlkhia tu hi,” ka ci hi.

¹³ Joshua in Jephunneh tapa, Caleb thupha pia in Hebron khuapi sia ama tan tu in pia hi.

¹⁴ Hebron khuapi sia Keniz mi Jephunneh tapa Caleb suante ii neisa in om lai hi, banghang ziam cile ama in Topa, Israel ii Pathian tung thumaan in a thu ni hi.

¹⁵ A masa in Hebron sia Arba khuapi kici hi (Arba sia Anakim te sung pan a lianbel ahi hi). Ngam sungah tu in kilemna om hi.