Joshua 12 - Syin Chin Bible

Moses ii A zaw Kumpite

¹ Israel mite in ngal teng zo thal zo in Jordan nisuana Arnon Kuam pan Jordan Kuam le saksang Hermon Mual dong ngam le lei la hi. Amate in hi kumpipate nii zo hi.

² Khat sia Amor te kumpipa Sihon hi a Heshbon ah maang hi. Ama ii kumpi ngam sia Gilead ii a ngam lang kihel hi: Aroer (Arnon kuam ii kiil a om) le a kuam laizang a om khuapi pan Amon ngamngi Jabbok ngun dong ahi hi;

³ tua ii sungah Jordan Kuam, Galilee tuili ii thang pan Beth Jeshimoth (Tuipi Thi ii nisuana sang) dong, tuaciang Pisgah Mual ii mualpeang sang teng kihel hi.

⁴ Amate in Rephaim nam pan a khakbel ahi Bashan kumpipa Og zongh zo uh hi; ama sia Ashtaroth le Edrei ah maang hi.

⁵ Ama ii kumpi ngam ah Hermon Mual, Salecah, tuaciang Bashan ngam theampo Geshur le Maacah ngamngite dong le Gilead ngam lang khen, Heshbon kumpipa Sihon ii ngam dong kihel hi.

⁶ Hi kumpite nii sia Moses le Israel te in zo hi. Topa naseampa Moses in amate ngam sia Reuben nam, Gad nam le Manasseh nam a langte tungah amate ngam le lei tu in pia hi.

Joshua ii A zaw Kumpite

⁷ Joshua le Israel mite in Jordan nitumna ngam, Lebanon kuam sung Baalgad pan thangsang Edom hui Halak Mual dong a kumpipate theampo zo siat hi. Joshua in hi ngam le lei sia a minamte atu in hawmsak in a kip a kho neisa tu in pia hi.

⁸ Hi ngamkhenna sungah mualtung ngam, nitumna sang mualpeangte, nisuana susuk le thangsang kongaw ngam teng kihel hi. Hi ngam le lei sia Hit te, Amor te, Canaan te, Periz te, Hiv te, Jebus te ii teenna hi ngei hi.

⁹ Israel mite in hi kumpite ii khuapi hi teng zo siat uh hi: Ai (Bethel khua hui),

¹⁰ Jerusalem, Hebron,

¹¹ Jarmuth, Lachish,

¹² Eglon, Gezer,

¹³ Debir, Geder,

¹⁴ Hormah, Arad,

¹⁵ Libnah, Adullam,

¹⁶ Makkedah, Bethel,

¹⁷ Tappuah, Hepher,

¹⁸ Aphek, Lasharon,

¹⁹ Madon, Hazor,

²⁰ Shimron Meron, Achshaph,

²¹ Taanach, Megiddo,

²² Kedesh, Jokneam (Carmel ngam sungah)

²³ Dor (Tuipi hui ah), Goiim (Galilee ngam sungah)

²⁴ le Tirzah — a vekpi kingawm kumpi 31 ahi hi.