Joshua 11 - Syin Chin Bible

Joshua in Jabin le A Pawlpuite Zo

¹ Hazor kumpipa Jabin in Israel te ii ngalzawna thuthang a zaak ciang, ama in Madon kumpipa Jobab, Shimron kumpipa le Achshaph kumpipa,

² saksang mualtung ngam kumpite, Galilee Tuili thangsang Jordan Kuam, mualpeangte le tuipi hui Dor nai a kumpite munah kam taw thu zasak hi.

³ Jordan ngun lang le lang a teang Canaan te tung le Amor te, Hit te, Periz te, mual tungah a teang Jebus te, Mizpah ngam Hermon Mual nuai a teang Hiv te munah zongh thu zasak hi.

⁴ Amate in a ngalkap nei theampo — tuipivaal a, sen vui za in mihing a tam ngalkaphonpi taw kuan uh hi. Amate in ngal siphu leangte le siphute zongh tam ma nei hi.

⁵ Hi kumpi teng in a ngalkap teng ngawmtua a, Israel te sim tu in hong kuan khawm tek in, Merom Lui ah ngiaphual saat uh hi.

⁶ Topa in Joshua munah, “Amate kiita heak in. Zing ciang tubang hunin Israel atu in amate thatlum siat tu khi hi. Noma in a siphute a peang baisak in, a siphu ngalleangte haltham tu nu hi,” ci hi.

⁷ Tua ahikom Joshua le a mi theampo in a ngalte sia Merom Lui ah a muanmawk ngawl laitakin sim uh hi.

⁸ Topa in Israel te zawna pia hi; Israel te in ngalte sia saksang ah Misrephoth Maim le Sidon dong nisuana sang pan Mizpah kuam dong simin del uh hi. A ngalte khat zongh a nungta a om nawn ngawl dong kido tan uh hi.

⁹ Joshua in Topa thupiak bangin a siphu uhte a peang baisakin, a siphu ngalleang uhte halthapsak hi.

¹⁰ Tua zawkciang Joshua heak kik a Hazor la in, a kumpipa thatlum hi. (Tua hun lai in Hazor sia kumpi nei ngam teng pan a hatbel ahi hi).

¹¹ Tua munah a om theampo thisak uh hi; kuama kihingkhoai ngawl a, a khuapi kihaltum hi.

¹² Joshua in hi khuapi teng la a, kumpipate manin, Topa naseam Moses ii thupiakna bangin, mi theampo thisak uh hi.

¹³ Ahihang Israel te in Joshua ii halthap Hazor khua simngawl leivumte tungah a kisa khuapite khat zongh hal ngawl hi.

¹⁴ Israel mite in hi khuapite sung pan vanh manphate le ngannote theampo amate atu in la uh hi. Ahihang amate in mihing theampo thatlum uh a, khat zongh khoaikhe ngawl hi.

¹⁵ Topa in a naseampa Moses tungah thupia in, Moses in Joshua tungah tua thupiaknate sonsawn a, Joshua in ni hi. Ama in Topa ii Moses thu a piak theampo vawt hi.

Ngam le Lei Joshua ii Laakte

¹⁶ Joshua in ngam le lei theampo — la hi, mualtung ngam le mualpeangte ii sak le thang, Goshen ngam theampo le a thangsang kongaw ngam teng le Jordan ngun kuam teng la hi.

^17-18 A ngam sia thangsang Edom hui Halak Mual panin kithungsuk a, saksangah Baalgad, Lebanon leikuam sung Hermon Mual thangsang dong zai hi. Joshua sia hi ngam a kumpite taw khuangeipi ma kisim ahihang tuate la in amate thatlum siat hi.

¹⁹ Israel te taw kilemna a vawt khuapi khat bek sia Gibeon hi a, tua munah Hiv te teang hi. A dang khuapite theampo sia kidona sungah kizo thal hi.

²⁰ Topa in amate sia Israel te a do natu a thin khosak mama a, tua in a lalcip natu le hesuak ngawlin a kithalup siat natu ahi hi. Hi sia in Topa ii Moses tungah thu a piaksa ahi hi.

²¹ Hisia hun in Joshua pai a, Judah le Israel mualtung ngam theampo — Hebron, Debir, Anab le tua mualtung ngam theampo sungah a teang thatang lian mama Anakim a cite minam sia mongsak siat hi. Joshua in amate le a khuapi te a lalcip dipdeap dong susia hi.

²² Anakim te khat zongh Israel ngam sungah om nawn ngawl hi; ahihang tawm khawng sia Gaza, Gath le Ashdod ah taanglai hi.

²³ Topa ii Moses a thu piaksa bangma in Joshua in ngam le lei bup la hi. Joshua in tua ngam sia Israel mite neisa tu in pia a, amate in nam sim khat tek khen in hawm hi. Tuabangin a mite sia ngal simna panin tawlnga uh hi.