John 2 - Syin Chin Bible

Cana khua ah Mopoai

¹ Ni nii zawkciang Galilee ngam Cana khua ah mopoai khat om hi. Tua munah Jesus ii nu om a,

² Jesus le a nungzuite zongh, tua mopoai siim tu in, khual kihil uh hi.

³ A sapittui teng a kihawm siat zawkciang, Jesus ii nu in ama munah, “Amate in sapittui nei nawn ngawl hi,” ci hi.

⁴ Jesus in, “Ka vawt tu sia hong son heak in, ka hun hong tung ngawl lai hi,” ci in zo kik hi.

⁵ Jesus ii nu in, naseamte munah, “Ama hong sawl babangin vawt vun,” ci hi.

⁶ Jew te sia a zeksa kithiansua ngeinate nei uh a, tuaciang tuasia atu in tui litre zakhat bang veu a ta, tui thambeal luk om hi.

⁷ Jesus in naseamte munah, “Hi thambealte tui dimh vun,” ci hi. Amate in thambeal ngong ciang in tui dimh uh a,

⁸ tua zawkciang ama in, “Tu in tui hong suak tavun a, poai ukpa kungah paipui tavun,” ci hi. Tua pa kungah tui a paipui uh le,

⁹ tu in tua tui sia sapittui suak zo a, ama in tep hi. Ama in hi sapittui koisung pan hong pai ci in a he bua hi (ahihang tui suakin a paipui naseamte in ahile he uh hi); tua ahikom zineipa sam a,

¹⁰ “Ngualdangte in, sapittui limbel teng veu hawm masa a, leangnate ii tam mama a neak zawkciang, sapittui dang thawthong teng hawm hi. Ahihang nang na hile sapittui limbel teng tu dongin na khealsia hi!” ci hi.

¹¹ Jesus in hi a masabel nalamdang lakna sia Galilee ngam Cana khua ah vawt hi; tua munah ama ii minthanna kilanghsak a, a nungzuite in ama um uh hi.

¹² Hisia zawkciang, Jesus le a nu, a suapuipate le nungzuite sia Capernaum khua ah pai uh a, tuak ah ni tawmvei sung taam uh hi.

Jesus Biakinnpi sungah Pai

¹³ Paisan Poai hun hong theng dektak ahikomin, Jerusalem ah Jesus pai hi.

¹⁴ Tuak Biakinnpi sungah khuite, tuute, inn vakhute, zuakin a om mite le sum theakte zongh sabuai ah to in a om mu hi.

¹⁵ Tua ahikom ama in kivelna khauhual vawtin, nganhing theampo, tuu le khuite zongh Biakinnpi panin notkeak hi; sum theakte ii sabuai sawnthalsak a, a dangkatangte kithethaang hi;

¹⁶ tuaciangin inn vakhu zuakte munah, “Hite hi sung pan lakeak vun! Ka Pa inn sia vanh zuakna mun suaksak heak vun!” ci hi.

¹⁷ A nungzuite in, laithiangtho ii, “Na inn ka thangaina in, ka sungah mei bangin kuang hi, Pathian awng,” a ci teng phawk uh hi.

¹⁸ Jew thuneite in, “Hi bang ngamtat thei natu in, na thu ngana sia bang nalamdang lakna taw hong lak tu ni ziam?” ci in thudokna taw zo kik uh hi.

¹⁹ Jesus in, “Hi Biakinnpi baltham vun, ni thum sungin sa kik tu khi hi,” ci in zo hi.

²⁰ “Ni thum sungah sa kik thei tu ni ziam? Hi Biakinnpi sak natu sia kum sawmli le kum luk hai hi,” ci uh hi.

²¹ Ahihang Jesus ii son biakinn sia ama ii pumpi ahi hi.

²² Tua ahikom thina panin ama a kithaw kiksak ciangin a nungzuite in, hi thu a son sia phawk kik uh a, amate in laithiangtho le Jesus ii a sonsate um uh hi.

Mihing Pianzia Jesus ii Heakna

²³ Paisan Poai sungin Jerusalem ah Jesus a om laitakin, ama ii nalamdang laknate a mu uh hu in, mihing tam mamate in ama um uh hi.

²⁴ Ahihang Jesus in muang ngawlin amate tungah ama le ama a ki aap ngam bua hi, banghang ziam cile ama in amate he siat hi.

²⁵ Ama tungah amate thu sia kuama ii son kul ngawl hi, banghang ziam cile ama mama in amate ii thinsung teng a heaksa hi.