John 15 - Syin Chin Bible

Jesus Sapitkung Tatak

¹ “Keima in Sapitkung tatak ka hi a, ka Pa in huan neipa ahi hi.

² Ama in kei tungah a nga ngawl baak theampo sattan tu hi, sapitnga a ngana baak pawpo a thiantho natu le tamzaw a nga thei natu ho in heu tu hi.

³ Note sia hilcianna kong piakte hangin hong kithiangthosak zo hi.

⁴ Kei sungah hong om po tavun, no sungah kong om tu hi. A baak khat nguak bek a nga thei bua hi; a kung taw a kizop ciang bekin nga thei hi. Tuasia bangma in kei sungah nong om bua uh le a nga na nga thei buatu uh hi.

⁵ Keima in sapitkung hi a, note in a baakte na hi uh hi. A kuama po in kei sungah hong om a, ama sungah kei ka om le ama in nga tam mama nga tu hi; banghang ziam cile kei ngawl taw bangma na vawt thei buatu uh hi.

⁶ A kuama po kei sungah hong om ngawlte thingbaak bangin kivawkin, kocip hi; tuabang a baakte kitawm in meimang sungah kibum a, kaanghtum hi.

⁷ Kei sungah nong om uh a, ka kammalte note sungah a om le tuasia ciang na uuk pawpo nong ngen tu a, na nga tu uh hi.

⁸ A nga tam na nga uh ciang ka Pa minthanna kilanghsak hi; tuabangin keima nungzuite na suak uh hi.

⁹ Pa ii kei hong it bangma in note kong it hi; kong itna sungah kip vun.

¹⁰ Ka Pa thupiakte ni a, ama ii itna sungah ka kip bangmain, kong thupiakte na ni uh le kong itna sungah na kip tu uh hi.

¹¹ “Note sungah ka lungdamna a om natu le na lungdamna uh a kicin natu in hi thu kong son hi.

¹² Kong thupiak in hi thu ahi hi: keima ii kong it bangma in, khat le khat na ki it vun.

¹³ Mihing khat ii a lawmte atu a nei thei a lianbel itna in amate atu ama ii nuntakna a piakna ahi hi.

¹⁴ Tuaciangin, ka thupiak bangin na seam uh le, ka lawmte na hi uh hi.

¹⁵ Naseamte awng, kong ci nawn bua hi, banghang ziam cile naseampa in a topa in bang teng vawt ziam, ci in a he bua hi. Tuasia taangin lawmte awng kong ci hi, banghang ziam cile Pa kung pan ka zaak thu theampo kong son zo hi.

¹⁶ Note in kei nong teal bua uh hi; keima in note a kikhomsuan a nga namte tam mama na nga natu in, kong teal a, nasep kong pia hi. Tua ahikom Pa in kei min taw, ama tungah na nget uh po, hong pia tu hi.

¹⁷ Tua hi a, hi thu in note tungah kong thupiak ahi hi: khat le khat na ki it tavun.

Leitung ii Etsatna

¹⁸ “Leitung in note hong ensan le keima hong ensan masa ahi sia phawk tavun.

¹⁹ Note leitung neisa hi le uhte leitung in ama aituam bangin hong it tu hi. Ahihang hi leitung panin note kong teal zo a, note leitung neisa na hi nawn bua uh hi; tua hu in leitung in note hong ensan hi

²⁰ Kong sonsa thu phawk tavun: ‘Silapa in a topa sangin lianzaw ngawl hi.’ Amate in kei hong vawtsia le no zongh hong vawtsia tu hi; amate in ka hilna a mang uh le no hilna zongh zui tu hi.

²¹ Ahihang amate in hite theampo note tungah hong vawt tu hi, banghang ziam cile note keima neisa na hi uh hi; banghang ziam cile amate in kei hong sawlpa he ngawl hi.

²² Amate kungah pai in thuson ngawl hi leng amate in mawna a nei buatu uh hi; tu in ahile amate a mawna huvau in kamzon natu a nei nawn bua uh hi.

²³ Kei hong ensan sia in ka Pa zongh a ensan ahi hi.

²⁴ Ngualdang ii vawt ngeingawlte amate sungah vawt ngawl hi leng amate in mawna a nei buatu uh hi; tu in ahile amate in ka sep teng hong mu zo a, kei le ka Pa hong ensan khawm hi.

²⁵ Ahizong, amate Thukham sungah, ‘Amate in thu om ngawlpi in, kei hong ensan hi,’ ci in a ki at sia, a taangtun natu hi bang teng a pian kul hi.

²⁶ “Thaa ahi Hupa hong pai tu a — Pathian ii thumaan thutak le Pa kung pan hong paipa sia hong pualaak tu hi. Pa kung panin ama kong puak tu a, ama in kei thu hong son tu hi.

²⁷ Tuaciang note zongh in kei thu na son tu uh hi, banghang ziam cile a kipatciil panin note kei taw nong omkhawm zo uh hi.