Joel 1 - Syin Chin Bible

¹ Hi sia in Pethuel tapa Joel tungah Topa ii thupuak ahi hi.

Lo An Lal hu in a Mite Khuangai

² Khanghaamzawte awng, nadon vun; Judah ngamsung a om mihing theampo awng ngai vun. Hi bang thu peuma noma khan sung ahizong na taanghpupi te khan sung ahizong a piang ngei ziam?

³ Na tate tungah tua thu son vun; amate in a tate tungah sonsawn tu hi, tuate in a khang kikte tungah sonsawn tu hi.

⁴ Khaumaw honkhat zawkciang honkhat in lo ante topha hi; Hon khat ii nusiat sate hon dang khat in khawng tum hi.

⁵ No zu khamte awng, khanglo vun a kap vun; no sapittui nete awng, kap vun; sapittui thak vawt natu sapitngate kisusia zo hi.

⁶ Khaumaw ngalkaphonpi khat in ih ngam hong sim hi; tuate thahatin tam leih a, kisim zo ngawl hi; a hate tawpi ha bangin hiam hi.

⁷ Amate in ih sapitkungte susia zo a, ih theikungte khimtham zo hi. Amate in thingbaakte a kaang dongin a haw khok keak hi.

⁸ No mite awng, a teenpui tu pa a thi ciang ngaknu khat a khuangai bangin kap vun.

⁹ Biakinnpi sungah piak tu antang ahibuale sapittui om ngawl hi; Topa biakpiak natu bangma nei ngawl ahikom thiampite khuangai hi.

¹⁰ Lote kolh hi; leitangte khuangai hi banghang ziam cile ankungte kisusia in sapitngate kikosak a, olive kungte kivulsak hi.

¹¹ No, lothote awng, khuangai vun; sapithuan cingte awng kap vun, banghang ziam cile zungtaangte, mangtaangte, ankung theampo kisusia hi.

¹² Sapitkungte le theikungte kongaw zo hi; thingnga kungte theampo vulin thi zo hi. Mite ii lungdamna bo hi.

¹³ No, biaknatau ah naseam thiampite awng, khau-ip puan silhin kap vun! Biakinnpi sungah tumin, zankhuateak khuangai vun! Na Pathian na piak tu uh antang, ahibuale sapittui om ngawl hi.

¹⁴ Antan natu thupia vun; kikhoppi khat sam vun! Lampuite le Judah mi theampo Topa na Pathian Biakinnpi sungah khawmtua in, ama ko in au vun!

¹⁵ Topa ni nai hi; Vaanglianbelpa ii siatna hong tunsak tu ni ahi hi. Tua ni in bangza launa piang tu ziam!

¹⁶ Ih ante a suksiat ciang cimaw in ih en lel hi. Ih Pathian Biakinnpi sungah lungdamna om ngawl hi.

¹⁷ Anciite leiko sungah thi hi. Khol tu antang om ngawl hi; tua ahikom ansaal hawmte lalcip hi.

¹⁸ Khuite ngilkialin haam uh hi, banghang ziam cile a tat natu lohing mun om ngawl hi; tuuhonte zongh in thuak uh hi.

¹⁹ Topa awng, nang kong ausan hi, banghang ziam cile mei ii halthap bang keakin nganthana le thingkungte kongaw hi.

²⁰ Luituite kang ahikom ngamsate ngawngawn in nang hong ko uh hi.