Job 8 - Syin Chin Bible

Bildad

^1-2 Na hawpai kamtam thuson teng na man zo ziam?

³ Pathian in thutang lumlet ngeingawl hi; ama in a maan ngawl vawt ngeingawl hi.

⁴ Pathian tungah na tate khial hi nanak tu hi, tua ahikom amate taw a kilawm bangin ama in daan pia hi.

⁵ Ahihang tu in kiheak in a, Vaanglianbelpa Pathian tungah thuum ta'n;

⁶ na thumaan mama a, na thiangtho le, Pathian hong pai a, nang hong hu tu hi, tuaciang na bangkua sia na thaman tu in puuapha tu hi.

⁷ Nei le lamh na bosua theampo sia tua hun ciang Pathian hong piak tute taw en khawm leang son thamman ngawl tu hi.

⁸ Taanghlai hun a ciimna kan pak in; ih taanghpupite heak thumaan thutak te ngaisun in.

⁹ Ih khantom a, bangma ih heak om ngawl hi; leitung nuntakna sia limhte taw kibangin ih kaantan hi.

¹⁰ Ahihang taanghpupi miciimte in hilsak in; amate hong sonna teng ngai in:

¹¹ “Pumpa sia tui om ngawlna ah po thei ngawl hi, ciknawng omna puasia ah tuate kimu ngeingawl hi.

¹² No lei lai a, zak tu in saat thamman ngawl lai ahitazong, tui a kang le tuate sia a vul phit tute hi.

¹³ Pathian selte sia tua pumpate taw kibang hi; Pathian a makngil uh po ciang a lametna bo hi.

¹⁴ Amate in khau zam khat — momkhau khat muang uh hi,

¹⁵ amate in pangpaan kaai khat neal le tuasia in amate do zo tu ziam? amate in khauzam khat zamh le tuasia in amate khuangkho zo tu ziam?

¹⁶ Mi ngilote sia nitaang sungah lopate po bangin, huan bup lopa beakte taw kibangin po a, zel keak hi.

¹⁷ A zungte in suangte vial a, tuaciang suangtum om theampo man tinten hi.

¹⁸ Ahihang tuate bot le uhte — tuate tua munah om ngei ahi hunlam a he khat zongh om ngawl tu hi.

¹⁹ Hi hi, mi ngilote ii lungdamna sia tuabang teng hi; tu in midangte hong pai in a omna suan uh hi.

²⁰ Ahihang Pathian in a thumaante taisan ngeingawl tu a, a tatsia mite huna pia ngeingawl tu hi.

²¹ Ama in nang hong nuisakin hong ausak kik tu a,

²² ahizong ama in nang hong ensante tungah minsiatna tungsak tu hi, tuaciang mi ngilote bangkua teng bomang tu hi.