Job 7 - Syin Chin Bible

¹ Mihing nuntakna in zawthawk thu taw ngalkap nasep bang, na ham sepna taw nuntakna bang le

² sila khat ii nilim vot a lungngul bang, naseampa khat ii a thasum ngakin a om bang ahi hi.

³ Tha khat zawk tha khat, ka nuntak pui tu bangma ka nei bua a; zan khat zawk zan khat in khuangai lungzuan hong pia hi.

⁴ A mu tu in ka lupsuk ciang naite cing hak a; zankhuateak kilumlet in khuavak tu kaal ka ngakla hi.

⁵ Ka pumpi sia thanh taw kidim hi; meima khiik in tuamcip hi; Ka meima pan meima nai luang hi.

⁶ Ka ni ka hunte muanmawk lam et om ngawlin bawbo a, thiamtakte khauphei kithalee sia sangin manlang zaw hi.

⁷ Pathian awng, na phawk in, ka nuntakna husan khat hi bek hi; ka lungdamna bo zo hi.

⁸ Tu in hong mu ni hi, ahizong hong mu kik ngeingawl tu ni hi. Kei nong zong le om nawn ngawl tu khi hi.

^9-10 Meeikaai khat a bo vadi bangin, mihing khat thi a heak kik ngeingawl hi; ama a hete theampo in ama mangil uh hi.

¹¹ Hi ngawl hi! Thim om thei ngawl tu khi hi! Ka thin uuk a, ka thin veeila khi hi. Ka pau kul hi.

¹² Banghangin kei hong cing nu ziam? Tuipi nganhing pui khat hong sa nu ziam?

¹³ Lumsuk in tawlngak tu ka hanciam hi; ka natna pan noptuamna ka zong hi.

¹⁴ Ahihang nangma mama in mangte taw nong lausak a; mukholnate le mangsiate nong puak hi,

¹⁵ hi bang a ngimhuai pumpi taw ka nuntak sangin ka tawl hong kisaanlup tu uukzaw liang khi hi.

¹⁶ Ka thinkiam zo hi; nuntakna cimtak khi hi. Kei nguak hong nusia tavun. Ka nuntak man om ngawl hi.

¹⁷ Banghangin nang atu in mihingte sia thupi mama ziam? Amate ii sep sia banghang thinnopmawkpui ni ziam?

¹⁸ Zing simin ama na vil a, a minit simin ama na ze et hi.

¹⁹ Ka ciltee valh tu hun sung beak leidang en ngawl tu ni ziam?

²⁰ Thongcing pa awng, ka mawna in nang hong nasak ziam? Banghang phutuun sinna in kei hong zangh ni ziam? Nang atu in vanh ngitpi ka hi ziam?

²¹ Ka mawna hong maisak thei ngeingawl tu ni ziam? Ka sep khialna hong hesuak thei ngawl tu ni ziam? Hai ngawlin ka thaankuul sungah ka om tu hi, tuaciang kei nong zon ciang ka om nawn buatu hi.