Job 6 - Syin Chin Bible

Job

^1-2 Ka ngimna le ka khuangainate khai kitee le

³ tuipi vaal a senvuite sangin ngitzaw tu hi, tua hi a kamkhal ka paunate in note lamdang hong sasak heak hen.

⁴ Vaanglianbel Pathian in thaltangte taw hong kap a, tuaciang a nguu in ka pumpi zenh hi. Pathian in a kiitakhuai nate ka mai ah ngual hi.

⁵ Laa in lopa a neak ciang lungkim a, khuipui in taangphaw a neak ciang thim dide hi.

⁶ Ahizong akua in limna nei ngawl, ci al ngawl an ne zo tu ziam? Aktuui dida sungah bang limna om na ziam?

⁷ Tuabang ante lim ka sa bua a, ka neak peuma in hong sungnimsak hi.

⁸ Pathian in ka nget sia banghang hong pia ngawl hi tu ziam? Banghangin ka thunget hong zo ngawl hi tu ziam?

⁹ Ama in kei hong that vet pole maw!

¹⁰ Tuabang hong tha nop tu sia he leng ka natna bangza in a lian tazong, lungdamin ka kilawn tu hi, Pathian thiangtho hi, ci in he khi hi; ama ii hong thupiak po nalh ngeingawl khi hi.

¹¹ Ka luhai lai natu in bang thahatna nei na khi ziam? Muanmawkna ka nei ngawl nungsang banghang nung tataa lai tu khi ziam?

¹² Kei suang taw kivawt khi ziam? Ka pumpi sia taau ahi ziam?

¹³ Keima le keima ka kihut natu tha nei ngawl khi hi; hu ngen in ka tai thei tu mun om ngawl hi.

¹⁴ Pathian nusia ka hi a, ka hi bua zong — hi bang ngimna ah lawm le ngual thumaan kisamh khi hi,

¹⁵ Ahihang no ka lawmte awng, nguazuk ngawl ciang a kang luite bangin hong theam nu hi.

¹⁶ Luite vuuk le tuikhalte in khakcip a,

¹⁷ ahizong nisa sungah tuate bo a, lui taw teng kongaw in om hi.

¹⁸ Sennealngam khualhawte tui a zonna in ngam amh a; amate sennealngam sungah vakkotin thi uh hi.

¹⁹ Sheba pan le Tema pan tua khualhawte in tui zong uh hi,

²⁰ ahihang luiko hui teng ah a lametna uh bo hi.

²¹ No teng sia kei atu in tua luikote taw kibang nu hi, ka thuak teng na mu uh ciang lau in nungkin nu hi.

²² Letsong khat nong piak tu ahizong, kei taangin khat po sumnguk nong piaksak tu in ahizong,

²³ ngal khat po ahibuale zawthawk thu a zangh thei khat pawpo pan ahizong nong hut tu in kong ngen ziam?

²⁴ Pha hi, hong hil tavun, ka khialnate hong son tavun. Thim dide in ka om tu a, kong ngai tu hi.

²⁵ Thumaan kammalte up taak hi, ahihang no nawnsan nu hi.

²⁶ Ka kam pan vui bek pusuak in a pau hong sa nu hi; tua ahile thinkiam a ka paute banghang hong zo nu ziam?

²⁷ Tanga silate na nga natu in aisaanna nuangtangte ngawngawn na lawn uh a, tuaciang na lawm phabelte duupin na hau natu zong nu hi!

²⁸ Ka maitang hong en tavun. Leilot ngawl tu khi hi.

²⁹ A vaal kai in pau zo nu hi. Na thumaan ngawlna uh kheal vun. Hong puanil heak vun. Kei sia thumaan khi hi.

³⁰ Ahihang leilot thuson hong sa nu hi — a maan le a maan ngawl khentel in son thei ngawl hong sa nu hi.