Job 41 - Syin Chin Bible

¹ Leviathan awle sia ngasa tangthaakna taw na man thei tu ziam? ahibuale khau taw a leei na khii thei tu ziam?

² A naakphe khau thun thei tu ni ziam? ahibuale a khangute pailet in thikkoai bul thei tu ni ziam?

³ Ama in hong thaa ta'n ci in hong ngen tu ziam? Nang tungah hesuak hong ngen tu ziam?

⁴ Ama in nangma taw thukimna vawtin a tawntungin na na a seam tu in hong kamciam tu ziam?

⁵ Na naseam numeite nuizak natu khat in vacim khat khoai bangin ama khau na khi tu ziam?

⁶ Ngasa paaite in a man a tuuk tu ziam? Sumzuakte in a zuak tu in a sa sem tu ziam?

⁷ Ngasa matna teite taw a vun tung dimin ahibuale ngasa khawna teite taw a lu na hol let thei tu ziam?

⁸ Khatvei ama tham lete bangma hun na tham kik nuam nawn buatu hi; na kidona na mangil ngei buatu hi!

⁹ Leviathan awle a mu pawpo lau in lei ah puk hi.

¹⁰ Ama a thin uuk ciang kiitakhuai mama hi; a mai ah kuama ding ngam ngawl tu hi.

¹¹ Ama ngalvawt a simin, bangma a tat thei ngawl akua om tu ziam? Tuabang ahithei tu leitung theampo ah kuama om ngawl tu hi.

¹² Leviathan awle ii peangte thu le ama ii letna le hatna thu na tungah hong sonsak ta'n.

¹³ A puanpuasilh sia kuama in leamkeak zo ngawl hi, ahibuale a ngaldalna a silh sia kuama in sunlet thei ngawl hi.

¹⁴ A kiitakhuai hate a po iim-iam ama ii kha ngu sia akua in bal thei tu ziam?

¹⁵ A cingzaang teng ah a hawlipte a ngui in kithuap cinten a, suang bangin sak hi.

¹⁶ Tua a hawlipte khat le khat ngat takin kimatcip bikbek a, a kawm pan vui zong tum zo ngawl hi.

¹⁷ Tuate theampo kho takin kimatcip ahikom bangma in khentham thei ngeingawl hi.

¹⁸ Ama a naak thing in hetchia a law ciang khualeng vazal a, a mittangte ni suaktuung bangin tee hi.

¹⁹ A kam sung pan meikuang leng a, mei eak leang vazai hi.

²⁰ Beal khat nuai pan lopa kaangh khu suak bangin a naak sung pan meikhu pusuak hi.

²¹ A husan in mei piangsak a; a kam sung pan meikuang lengto hi.

²² A ngawng thahat mama ahikom ama taw a kisi peuma lau vadil hi.

²³ Ama ii vun tungah a nip mun om ngawl a; a kiseak zo ngawl thik bangin a vun sak hi.

²⁴ A suang lungtang in kiitak nei ngawl a, a tam thei ngawl an ngoaina suang khat bangin sak hi.

²⁵ Ama a thawto ciang a hat belte zongh in kiita a; lau in cimaw uh hi.

²⁶ Ama a liamsua thei namsau om ngawl hi; ama a nasak thei tei ahibuale thaltang ahibuale teipalh om ngawl hi.

²⁷ Ama atu in thik sia taangphaw ko bangin ngeam a, taau sia thingmuat bangin nip hi.

²⁸ Ama a taisak thei thaltang om ngawl hi; ama a kidenna suangte taangphaw bekte taw kibang hi.

²⁹ Ama atu in khetbuk khat sia taangphaw bek khat bang bek hi a, pasalte ii tei taw a khaw uh ciang ama nui hi.

³⁰ A ngilvun taalte leibeal tamhbek kiilte bang hi a; tuate in taangcilna leang khat bangin lei buanna sautham hi.

³¹ Ama in tuipi sia tuiso bangin kiloksak a, tuaciang sathau beal khat bangin phuansak hi.

³² Ama paina sa lampi sia taang a, tuaciang tuipi tui sia a kaang phuan suaksak hi.

³³ Leitung ah ama taw a teengat tu bangma om ngawl hi; ama sia kiitak a nei ngawl nganhing khat ahi hi.

³⁴ Nganhing kiphasak belte ngawngawn ama in nomu hi; ama sia ngamsa theampo ii kumpi ahi hi.