Job 37 - Syin Chin Bible

¹ Vuipi suangval in nasia takin ka thin hong patausak hi.

² Note theampo awng, Pathian ii aw, a kam sung pan hong pai vanto awnging ngai vun.

³ Ama in khualeng sia vanpi kaantan in leimong khat pan mong khat dongah puak hi.

⁴ Tua zawkciang a vaanglian vanto awnging ahi ama hawkna aw kiza a, tua hun sung teng khualeng tee vazal hi.

⁵ Pathian thupiakna taw nalamdangte, ih tel zawk ngawl a tumdang nate piang hi.

⁶ Ama in vuuk, lei ah a kia tu in thu pia a, nguatui tam mama zusak hi.

⁷ Ama in eite nasep hong tawlngasak a; ama vawt theite eite hong lak hi.

⁸ Ngamsate in amate ii kua tek zuan uh hi.

⁹ Suangval vui sia thangsang pan hong va a, hong vut vaval khuasik sia saksang pan hong pai hi.

¹⁰ Pathian ii husan in tuite khalsak a, vuukkhal suaksak hi.

¹¹ Khualeng sia meeikaai sung pan taang vazai hi,

¹² Pathian ii deina bang in tuate kikhiin uh hi. Simleitung mun theampo ah tuate in Pathian thupiak theampo seam uh hi.

¹³ Pathian in lei kawtsak tu in nguatui puak hi; mihingte daan a pia tu ahibuale a deisakna lak tu in ama in nguazusak thei hi.

¹⁴ Job awng, tawmvei tawlnga in ngai in; Pathian ii a lamdang a nasepte ngaisun in.

¹⁵ Pathian in thupia in meei sung pan khualeng a piansak zia na he ziam?

¹⁶ Koi bangin meeite van ah kikhaangin, Pathian ii a lamdang a nasep thiamna na he ziam?

¹⁷ He ngawl ni hi, thangsang vui hong va in ngamsung a nawk ciang sa saa in ngim thuak bek ni hi.

¹⁸ Pathian in van zalh in tua sia thik taat sa bang, a sak in a vawt lai, nang hu thei ni ziam?

¹⁹ Pathian tungah ka son tu uhte hong hil ta'n; kote thinsung ah bangma om ngawl hi; son tu bangma nei ngawl khu hi.

²⁰ Pathian taw kipaupui tu ngen ngawl tu khi hi; banghangin kei hong lalsak natu hunpha pia tu khi ziam?

²¹ Tu in van a khuavak tee vanai hi; tuasia ih et tu in taang leih hi, tuaciang van sia vui in muut thiang zo hi.

²² A taang khamh ci khat saksang ah kimu hi, tuaciang Pathian ii vaangletna in zatakna taw kidim a hong lausak hi.

²³ Pathian ii vaangletna lian mama ahikom ama ih neak thei bua hi; eite taw ih kizopna ah ama thutang thumaan hi.

²⁴ Tua hi a, mihing theampo in ama a zatak, a kiitak uh sia lamdang ngawl hi, tuaciang ama in a kiciimsakte a awlmawk ngawl sia zongh lamdang ngawl hi.