Job 3 - Syin Chin Bible

Job in Pathian tungah A lungkim ngawlna son

¹ A khakbel ciang Job pau in, ama pian ni haamsiat hi.

Job

^2-3 Pathian awng, ka sua ni haamsiat in; ka nu ngil sungah ka om phit ni zan haamsiat in!

⁴ Tua ni sia khuazing suaksak in, Pathian awng. Tua ni phawk kik ngei nawn heak in; tua ni in khuavak taang kiksak nawn heak in.

⁵ Tua ni sia a thim le a zingcip ni hisak in; meeikaai taw tuamcip in a, ni phiatkeak in.

⁶ Tua zan sia kum simna sung pan phiatkeak in a, kisim kiksak nawn heak in;

⁷ tua zan sia a ngamkhing, lungdamna a om ngawl zan hisak in.

⁸ Leviathan nganhing pui a uk thei bum le ai toaite in, tua ni sia haamsiatsak in!

⁹ Nikonghong aksi taangsak heak in; Tua zan sia khuavak tu lametna omsak heak in.

¹⁰ Ngimna le heena sungah kei hong omsak in, kei hong piansak hu in tua zan haamsiat in.

¹¹ Ka nu sulh sungah thi ka na leng tua ahi buale ka sua po ciang thi ka na leng uuk ing.

¹² Banghangin ka nu in a khup tungah hong toai ziam? Banghangin a noaitui taw hong vaak ziam?

¹³ Tualai in thi hi leng, tu in ka tawlnga tu a,

¹⁴ taanghlai kumpi innte a sa kik kumpite le ngamukte bangin ka mu tu hi.

¹⁵ Khamh le ngunn taw a inn uh a dim kumpi tate bangin ka mu zo tu a,

¹⁶ ahibuale a thisa in a suak nausen bangin mu zo tu khi hi.

¹⁷ Thaankuul sungah mi ngilote in a tatsiatna uh kheal a, a toi naseamte in a khakbel ciang tawlnga tu uh hi.

¹⁸ Thongtaakte ngawngawn thinnuamin om hun nga a, ausatna le thu piakna kamhamte taw kipeal hi.

¹⁹ Tua munah a minthang le a kihe ngawl mi theampo om a, salte a khakbel in suakta hi.

²⁰ Banghangin mihingte thinngimna nei in nungtasak tan ni ziam? Banghangin a khuangaite khuavak pia ni ziam?

²¹ Amate in a thi tu ngak ahihang tuasia theng ngeingawl hi; amate in sumngum khat po sangin thaankuul deizaw uh hi.

²² Thi in a kiphum mateng amate lungdam ngawl hi.

²³ Pathian in amate mailam seal a, tuaciang a kiimkot panin nengcip hi.

²⁴ Anneak tu taangin ka kap a, tauna pan ka tawp thei ngei bua hi.

²⁵ Ka kiitak theampo le ka launa teng hong tung takpi hi.

²⁶ Keima in thinnop le tawlngak hun nei ngawlin, ka ngimnate a bo ngei nawn bua hi.