Job 29 - Syin Chin Bible

Job ii Ama Thu A khakbel A sonna

¹ Job a thuson kipan kik hi.

Job

² Pathian ii hong et hong kepcing hun lai bangkeakin ka nuntakna khatvei kipan kik thei le oai meak ing.

³ Tualai in kei taw Pathian omkhawm tawntung a, khuazing kaantan in ka va ciang khuavak hong pia hi.

⁴ Tua hun lai sia ka nopsak hunlai hi a, Pathian ii hong pawlmatna in ka bangkua hum hi.

⁵ Tualai in kei taw Vaanglianbelpa Pathian omkhawm a, kei sia ka tate theampo in hong kiim uum vaniau hi.

⁶ Ka khuipuite le ka kealpuite in noai tam mama hong pia a, ka olive kungte suang tam belna lei sungah po hi.

⁷ Khuapi upate a kikhop simin amate sungah ka kihel ciangin,

⁸ khangmoite in kei hong mu po le hong pial a, tuaciang khanghaamte in zatak piakna in hong din uh hi.

⁹ Mipite ii lampuite zongh a pau uh tawlnga uh hi;

¹⁰ a thupibel mite zongh huthe ngawlin om uh hi.

¹¹ Kei hong mu theampo ahibuale kei hong za mite theampo in ka sep ka vawt sate a pha in hong son uh hi.

¹² Mizawngte a au uh ciang ka hu hi; Zot natu mun a nei ngawl tangate ka hu hi.

¹³ Ngim le kham nasiabel a thuak mite in kei hong pok uh hi, tuaciang meingongte ngam muanna a nga natu in ka hu hi.

¹⁴ Thutang le khualna taw ka ngamta tawntung hi.

¹⁵ Mittawte atu in mittangte ka hi a, peangbaite atu in peangte ka hi hi.

¹⁶ Mizawngte atu in pa dinmun ah ka ding a, khualmi a ngimngate sangah ka pang hi.

¹⁷ Mihing cizat nei ngawlte ii thahatna ka susia a, a vawtsiat mite ka suatak hi.

¹⁸ Khansau in nuntak tu le nuam takin inn ah thi tu ka ngaisun tawntung hi.

¹⁹ Kei sia a zungte, tui a nga tawntung le a baakte daaitui a kawt thingkung khat bang ka hi hi.

²⁰ Mi theampo in kei hong pok tawntung a, ka thahatna kiam ngeingawl hi.

²¹ Ngaisutna ka piak ciang mite huthe ngawlin om a, ka son sia pha takin hong ngai hi;

²² ka man zawkciang zong bangma belap natu nei ngawl uh hi. Ka kammalte a sungah nguamalte bangin tum hi;

²³ khaal kipat hun a lothote in khuapi ngua a saan thiam bangin a kuama po in ka kammalte saan thiam uh hi.

²⁴ A thin uh a kiam ciang amate ka maitui a; ka maitaina in amate tha ngasak hi.

²⁵ Amate ka huai ka keam a, a vaite ka hawmsak hi. Kumpi khat ii a ngalkapte a lampui bangin amate lam ka pui a, a thinngim ciangin amate ka heeneam hi.