Job 28 - Syin Chin Bible

Ciimna a Pokna

¹ Ngunn a kitawna mun ah a khukte om a, Khamh a kithiansakna munte zongh om hi.

² Khuktote in thik sia lei sung pan to in, Tuaciang suang panin taausan tuisak hi.

³ Amate in khuazing thukbelna sungah zong uh hi. Amate in lei taw thukna ah zongin Tuaciang khuazing sungah suangte to uh hi.

⁴ Mihing khat pawpo ii teenna mun Tua ahibuale mihing peang taw khual a haw ngeina mun taw a kikhualana ah Mihingte in suangkhuk tumna hawngte to uh hi. Tua mun dum thukte sungah Ama in khau luai a lungzuangin naseam hi.

⁵ Thaw ante leitang pan piang hi, Ahihang tua leitang sia ii nuai ah Na theampo kilaaikeak in kisutham hi.

⁶ Leisung suangte ii sungah sapphire suangmanpha vomte om a, Tuaciang a leivui sungah khamh kihel hi.

⁷ Suangkhukte paina lampite a mu ngei muthi om ngawl hi, Tuaciang tuate tungah vaciik leang ngeingawl hi.

⁸ Tawpi ahibuale a kiitakhuai ngamsa ngilo dangte in Tua a ngamkhing lampite tawn ngeingawl hi.

⁹ Suangkhuk naseamte in suangsak belte to a, Mualte sia mual peang dong totham hi.

¹⁰ Suangte sungsang a tawletna hawng vangte panin Amate in suangmanphate mu uh hi.

¹¹ Amate in ngun naakte dong to in, a kiseal nate a kilangh taakna ah paipui uh hi.

¹² Ahihang ciimna koisungah kimu thei ziam? Tel thei natu in koisungah ih sin thei tu ziam?

¹³ Ciimna sia a thithei mite sungah kimu ngawl tu hi. Kuama in a manphatna tatak he ngawl hi.

¹⁴ Tuipi liante le tuipi peuma ii a thuknate in zongh Tua munah ciimna om ngawl hi ci uh hi.

¹⁵ Ciimna sia ngunn le khamh taw kilei thei ngawl hi.

¹⁶ Ciimna ii manphatna sia A phabel khamh le suangmanpha te taw kitee thei ngawl hi.

¹⁷ Ciimna sia khamh sangin manpha zaw a, Khamh paakbung khat ahibuale maanhai pha belte sangin manpha zaw hi.

¹⁸ Ciimna ii manphatna sia tuipi muanpaakte, suangkaangte ahibuale suangmanpha sante ii manphatna sangin mannei zaw hi.

¹⁹ Topaz suangmanpha pha belte le khamh ciitak ii man sia Ciimna ii manphatna taw kisontee thei ngawl hi.

²⁰ Tua ahile, ciimna ii naak koisung om ziam? Koisungah tel thei natu in ih sin thei tu ziam?

²¹ A nungta nganhing in tuasia mu thei ngawl hi, A leang vacim khat zongh in mu thei ngawl hi.

²² Thina le lalna ngawngawn zongh in mu ngawl a, ngual ii kamdawn bek za khu hi ci hi.

²³ Pathian bek in a lampi he a, Ciimna a kimuna mun he hi.

²⁴ Banghang ziam cile ama in leimongte dong mu a, Van ii nuai ah a om na theampo mu hi.

²⁵ Pathian in vui ii a thahatna a piak ciang, tuipi ii phakcia tu a khensat ciang;

²⁶ Pathian in nguazuk natu mun, Tuaciang vanto khualeng meeite lampi tu a khensat ciang;

²⁷ Tuasia ciangin ama in ciimna mu a, a man neina sit hi — Ama lungkim in kipsak hi.

²⁸ Pathian in mite mun ah, “Na ciim natu uh in, Topa thasia nanak tu nu hi. Na heak thei natu uh in siatna pial hamtang tu nu hi,” ci hi.