Job 26 - Syin Chin Bible

Job

^1-2 A zawngkhal a thazawm mi kei — atu in nong huna bangza in pha ziam!

³ Tuabang ngaisutna pha nong pia a, kei bangin a mawmaw khat sia na heakna nong hawm hi!

⁴ Na kammal theampo akua in za tu in um ni ziam? Hi bang pau tu in akua in nang hong thaw ziam?

[Bildad]

⁵ A thisate ii thaate sia leinuai ah a om tui sungah liinglawng hi.

⁶ Mithi khua kihongin Pathian mai ah kilangh hi. Ama ii a mu thei ngawl natu in a khak a dal bangma om ngawl hi.

⁷ Pathian in van saksang teng phalh a, tuaciang leitung sia mun awngpi sungah kaaisak hi.

⁸ Meeite tui taw a kidimsak sia Pathian hi, ama in tuate a ngitna taw a puathap ngawl natu in keam hi.

⁹ Ama in thalik sia meeikaai khat ii nungah seal hi.

¹⁰ Ama in khuazing pan khuavak sia tuipi maitang tungah a kisuai a beampui khat sia taw khen hi.

¹¹ Ama in van a len khuamte a teih ciang tuate lau a kilok in liing uh hi.

¹² Ama ii thahatna in tuipi zothal hi; ama in a thiamna taw nganhingpui Rahab thatlum hi.

¹³ Ama ii husan sia in van thiangsak a, tuaciang ama khut in a suakta nganhing pui sia that hi.

¹⁴ Ahihang hite ama thahatna ii a hiauhiau hi bek a, ngual ii kihuau in a son vasipte ih zaak hi bek hi. Pathian bangbang tatakin lian cisia akua in he thei tu ziam?