Job 23 - Syin Chin Bible

Job

^1-2 Lungkim ngawlna pualaakin Pathian langpan lai khi hi; tau ngawlin ka om thei bua hi.

³ Koisungah ama mu thei tu khi ziam, tuaciang ama omna munah koibangin pai tu khi ziam ci sia ka he nuam hi.

⁴ A mai ah ka thu teng ka son tu a keima sang pan ka nial nopna teng ka sung tu hi.

⁵ Ama ii a son tu sia le bangbangin kei hong zo kik tu ci ka he nuam hi.

⁶ Pathian in a thahatna theampo kei tungah hong zangh tu ziam? hong zangh ngawl tu hi, ama in ka thusonte hong ngai tu hi.

⁷ Keima in thutak son khi hi; Pathian taw kam kikum thei tu khi hi; ama in kei, mawbaang ngawl hi ci in a tawntung atu in khatvei lian pualaak tu hi.

⁸ Ni suana sangah ka zong zo a, ahihang tua munah Pathian om ngawl hi; Nitumna sang ka zon hang ama ka mu bua hi.

⁹ Pathian sia saksang le thang sangah na seam hi, ahihang ama ka mu bualai hi.

¹⁰ Tua hi napi Pathian in ka kalsuanna theampo he hi; Ama in kei hong sit le a thiangin hong mu tu hi.

¹¹ Ama ii a teal lampi sia thumaan takin ka zui a, lam ka pial ngei bua hi.

¹² Pathian ii thupiakte ka seam tawntung hi; ama ii deina ka zui a, keima ii uuk bangin ka ngamta bua hi.

¹³ Ama kikheal ngeingawl hi. Kuama in ama nalh zo ngawl hi, tua ahibuale a vawt nopte kuama in khaam zo ngawl hi.

¹⁴ Kei atu a ngealsa sia ama in taangtungsak tu hi; tuasia ama ngealna tam mama sung pan khat bek hi.

¹⁵ Ama mai ah lau in ka liing vadil hi.

^16-17 Vaanglianbelpa Pathian in ka thin hanna bosak hi. Khuazing in ka mit hong tawsak ahitazong hong patausak sia khuazing hi ngawl a Pathian ahi hi.