Job 22 - Syin Chin Bible

Thumvei A Kipaupuina 22:1—27:23 Eliphaz

^1-2 Mihing khat pawpo, a ciimbel ngawngawn Pathian ii zak thei a suak ngei om ziam?

³ A maan na sep na vawtte in Pathian phatuamsak ziam, tua ahibuale a peuma in na phatna in ama hu ziam?

⁴ Nangma in Pathian na zatak hu in ama in nang hong hil a, hong sitna hi ngawl hi.

⁵ Hi ngawl hi, tuasia na maw lei lam hang hi a; na tatsiatna teng theampo hang ahi hi.

⁶ Na suapui khat ii hong bat sum na losakna in a puan teng na laaksak a, bangma na kheetsak bua hi.

⁷ A toite tui na pia nuam bua a, tuaciang a ngilkialte an na pia nuam bua hi.

⁸ Leitang theampo na sungsuam natu in na vaang neina le na za neina na zangh hi.

⁹ Meingongte na hu nop ngawl bek dom ngawlin tangate zongh na suttol a, na vawtsia hi.

¹⁰ Tua ahikom tu in na kiim theampo ah na taak natu vuumte om a, tuaciang thakhat thu in launa taw na kidim hi.

¹¹ Khua hong zing mama ahikom khua na mu thei bua a, tuaciang namthuam in nang hong khuum hi.

¹² Pathian sia a saangbel vantungte ah teangin, tuaciang aksite a omna saang napi ensuk hi ngawl ziam?

¹³ Ahitazong nangma in, “Pathian in bang he ziam? Ama meeikaai in seal hi — bangbangin ama in ei tungah thu hong khen thei tu ziam?” ci in na dongh lalai hi.

¹⁴ Van khuvum tungah ama a pai ciang meeikaai saate in khua a mu ngawl tu in ama seal hi ci in, na ngaisun hi.

¹⁵ Mi ngilote tot tawntung na lampi ma tawn tu in na khensat ziam?

¹⁶ A hun uh a tun ma ngawngawnin namthuam in amate taaikeak hi.

¹⁷ Hi mite sia Pathian a nialte le Pathian in amate bangma law zo ngawl tu in a um mite ahi hi.

¹⁸ Ahihang amate nuamsa in a khangtosak sia Pathian hi a — mi ngilote thinsung ka tel thei bua hi.

¹⁹ Mi ngilote daan a kipiak a mu uh ciang miphate lungdamin maw baanna nei ngawl mite nui uh hi.

²⁰ Mi ngilote neisa theampo kisusia siat a, tuaciang a taanglai sun peuma kaanghmei in kaanghtum hi.

²¹ Job awng, tu in Pathian taw kilemna vawt in a, ngalte khat bang a ama na vawtna teng tawlnga in, tuabang hi lete ama in nangma thupha hong pia tu hi.

²² Ama ii hong thuhilnate saang in a, a kammalte na thinsung ah ciamtee in.

²³ Hi hi, Pathian kungah kiniamkhiakna taw heak kik hamtangin, na bangkua sungah a sia ngamtatna theampo na bosak ta in.

²⁴ Na khamhte vawk in; na khamh pha belte luamko sungah sung in.

²⁵ Vaanglianbelpa Pathian sia na khamh hisak in, nang atu a saangin a kiciang ngunn hisak in.

²⁶ Tuasia ciang Pathian na muang tawntung tu a, ama, na lungdamna ii naak ahi hunlam na mu tu hi.

²⁷ Thu na nget ciang ama in hong zo tu a, tuaciang na kiciamnate na len tu hi.

²⁸ Na sep na vawt theampo na taangtun tu a, na paina lampi ah khuavak taang tu hi.

²⁹ Pathian in a kiphasakte khia suk a, a kiniamkhiakte hun hi.

³⁰ Na sepna maanin, maw baanna na nei buale ama in nang hong suatak tu hi.