Job 17 - Syin Chin Bible

¹ Ka nuntak hun a bo tu nai zo a, ka hu zongh ka sang lalaa hi; thaankuul simngawl kei atu bangma om nawn ngawl hi.

² Ngual theampo ii hong nunau zazaan nate ka en bek hi.

³ Pathian awng, kei thumaan khi hi. Ka kammal hong saang ta'n. Ka pauna hong panpui tu kuama om ngawl hi.

⁴ Amate khua ngaisut thiamna teng na khak hi, tu in amate in kei hong zosak heak in.

⁵ Paunak lui sungah mihing khat in sum huvau in a lawmte leeheak a, tua hu in a tate in thuak hi.

⁶ Tu in mite in hi paunak sia kei tungah hong zangh hi; Amate hong pai in ka maitang cil hong phii hi.

⁷ Ka heena in ka mit hong tawsak phial hi; ka khut le ka peang te sia limhte bangin zeen kiangkuang hi.

⁸ Thumaan khu hi a kicite in ciza in ingh a, amate theampo in kei sia Pathian sel ci in hong ningkhiin uh hi.

⁹ Zatakhuai khu hi a kicite in amate ngaisutna maan kisa vaial uh hi.

¹⁰ Ahihang amate a vekpi hong pai in ka mai ah hong ding tek le, amate sungah a ciim khat beak zongh ka mu buatu hi.

¹¹ Ka ni hunte bawbo a; ka tupnate taangtung ngawl hi; ka lametna bo hi.

¹² Ahihang ka lawmte in zan sia sun hi ci a; khuavak nai hi ci hi, ahihang khuazing sungah om lai ka hi hunlam ka he hi.

¹³ Ka lametna in mithi khua bek hi a, tua mun khuazing sungah a mu tu in ka lumsuk tu hi.

¹⁴ Thaankuul sia ka pa ka ci tu a, kei hong ne thanh te sia ka nu le ka suapuinumeite ka ci tu hi.

¹⁵ Kei atu lametna khat pawpo koi sungah om ziam? akua in tua lametna mu tu ziam?

¹⁶ Mithi khua ka zotsuk ciang kei taw lametna tonkhawm ngawl tu hi.