Job 12 - Syin Chin Bible

Job

^1-2 Hi hi, na kampau sia mihonpite ii a ci nop teng hi. Na thi uh ciang ciimna sia note taw thi khawm tu hi.

³ Ahihang, kei zongh no ngaisut za ma ngaisun thei khi hi; Note sang in kei nangh zaw tuan ngawl khi hi; na sonsa theampo sia a kuama po ii heaksa thu hi.

⁴ Tu in ka ngualtamhte ngawngawn in kei hong nuisan hi; kei thutang in sit baang ngawl hi napi hong kinuisan hi; ahihang Pathian in ka thungetna hong zo kik hun om ngei hi.

⁵ Note ngim nga ngawl nu hi, ahihang ciammuina in hong nei nu hi; mihing a puk dek khat vel nu hi.

⁶ Ahihang ngutate le Pathian a selte sia amate ii tha le ngal bekma a pathian hi napi thinnuamin nungta uh hi.

⁷ Vacimte le nganhingte ngawngawn in no hong hil thei natu thu tam ma nei hi,

⁸ leitung le tuipi nganhingte ii ciimna ngen in.

⁹ Amate theampo in Topa khut ii a vawt hunlam he uh hi.

¹⁰ A piansaksa te ii nuntakna lam a lak sia Pathian hi; mihing theampo nuntakna sia ama ii khut sungah om hi.

¹¹ Ahihang na leei in an tep a, diksa ahi bangma na bil in kammalte a zaak sia diksa hi.

^12-13 Pasal haamte in ciimna nei hi, ahihang Pathian in ciimna le vaangletna nei hi. Pasal haamte in thuthuk mu hi; Pathian in thuthuk muna le vaangletna nei hi.

¹⁴ Pathian in a balthap ciang akua in sa kik thei a, Pathian ii thong a khiak sia akua in suatak thei tu ziam?

¹⁵ Pathian in nguatui a khaam ciang nguatui hang a; tuite a tha ciang namthuam hi.

¹⁶ Pathian sia thahat a, a tawntungin ngalzo hi; ngual theamte le theam thuakte ama khut sungah om hi.

¹⁷ Ama in ngamukte ii ciimna laaksak a, ngam lampuite sia a mawmawte bangin ngamtasak hi.

¹⁸ Ama in kumpite za taaksak a, thong sungah khum hi;

¹⁹ Ama in thiampite le vaang nei mite kiniamkhiaksak hi.

²⁰ Ama in a kimuang mite thimthusak a, tuaciang uhaamte ii ciimna laaksak hi.

²¹ Ama in vaangletna a neite min siasak a, ngamukte ii thahatna bosak hi.

²² Ama in thina bang ahi khuazingna munte ah khuavak puak hi.

²³ Ama in ngamte thahatsakin liansak hi, ahihang a zawkciang tuate zo in lalsak hi.

²⁴ Ama in a lampuite mawmawsak a, lungmang sa le ngammang sa in vakvaisak hi;

²⁵ amate khuazing sungah zawtin vak uh a, zukhamte bangin hoi vatut uh hi.